މާދަމާގެ ޖަލްސާއަށް މިނިސްޓަރ ޒަހާ ހާޒިރު ކުރަނީ
މަޖިލީހަށް ހާޒިރުކުރުމަށް ހުށައެޅުއްވީ ކާށިދޫ ދާއިރާގެ މެމްބަރު އަބްދުﷲ ޖާބިރު
މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު
ހޯމަ ދުވަހުގެ ޖަލްސާއަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު ހާޒިރު ކުރުމަށް އެޖެންޑާ ކޮށްފިއެވެ.
މިނިސްޓަރ މަޖިލީހަށް ހާޒިރުކުރުމަށް ހުށައެޅުއްވީ ކާށިދޫ ދާއިރާގެ މެމްބަރު އަބްދުﷲ ޖާބިރުއެވެ. ޖާބިރު މިނިސްޓަރާއި ކުރައްވަން ހުށައަޅުއްވާފައިވާ ސުވާލަކީ ދިވެހި މަސްވެރިންނަށް ލިބެން ޖެހޭ މަންފާތައް ހިފަހައްޓައި އެފަރާތްތަކަށް ވެފައިވާ ވައުދުތައް ނުފުއްދަވަނީ ކީއްވެގެންތޯއެވެ.
މެމްބަރުގެ ސުވާލުގައި ވަނީ ދިވެހި ސަރުކާރުން ޗައިނާއާ ދެމެދު ހަދާފައިވާ ފްރީ ޓްރޭޑް އެގްރިމެންޓްގެ ދަށުން، ދިވެހި މަސްވެރިންނަށް ލިބެންޖެހޭ މަންފާތައް ހިފަހައްޓައި، މަސްވެރިކަމުގެ ދޮރުތައް ބަންދުކޮށް، މި ސަރުކާރުން މަސްވެރިންނަށް ވެފައިވާ ވައުދުތައް ނުފުއްދައި މަސްވެރިން މަގުމަތިކޮށް ނިކަމެތި ކުރަމުންދާއިރު، މިނިސްޓަރ ގެންދަވަނީ ދިވެހި މަސްވެރިންނަށް އިތުރުފުޅު ހައްދަވައިގެން ކަން ފާހަގަ ކުރައްވާފައެވެ.
މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދަށް މަޤާމުގެ ޒިންމާ އަދާނުކުރެއްވޭ މައްސަލައެއް މީގެކުރިން މަޖިލީހުން ވަނީ ބަލާފައެވެ. މި މައްސަލަ ފެންމަތި ވެގެންދިޔައީ މަސްވެރިކަމުގެ ގާނޫނުގެ ދަށުން ހަދަން ޖެހޭ ގަވާއިދުތައް އެ މުއްދަތުގެ ތެރޭގައި ކުރައްވާފައި ނުވާތީއެވެ. މަޖިލީހުގެ ކޮމިޓީން ނިންމީ ޒަހާއަށް ދެވަނަ ފުރުސަތެއް ދިނުމަށެވެ.
