ޗެލްސީގެ ގޯލްކީޕަރު މެންޑީއަށް އަނިޔާވެއްޖެ

ޗެލްސީއާ ދާދި ފަހުން ގުޅުނު ސެނެގާލުގެ ގޯލްކީޕަރު އެޑޮއާޑް މެންޑީއަށް އަނިޔާވެއްޖެއެވެ.

މެންޑީއަށް އަނިޔާވީ ސެނެގާލުގެ ގައުމީ ފުޓްބޯޅަ ޓީމުން ކުރިއަށްގެންދިޔަ ފަރިތަކުރުންތަކުގެ ތެރެއިންނެވެ. ރިޕޯޓުތައް ބުނާ ގޮތުން މެންޑީގެ ކަނާތު ފައިގެ ފަލަމަސްގަނޑަށް ވަނީ އަނިޔާވެފައެވެ. އެއާއެކު އޭނާ އަނބުރާ ލަންޑަނަށް މިހާރު ގޮސްފައިވާއިރު، އަނިޔާގެ ފުރިހަމަ ތަފުސީލު ލިބޭނީ ޗެލްސީން ހަދާ ޓެސްޓުތަކަށްފަހު ކަމަށްވެސް ރިޕޯޓުތައް ބުނެއެވެ.

މީގެ ކުރިން މެންޑީގެ އޭޖެންޓް ބުނީ މެންޑީއަށް ލިބުނު އަނިޔާ ސީރިއަސް ނޫން ކަމަށާއި، އޭނާ ކުޅުމާ ދުރުގައި ހުންނަން ޖެހޭނީ 10 ވަރަކަށް ދުވަސް ވަންދެން ކަމަށެވެ.

މެންޑީއަށް އަނިޔާވުމުން އޭނާ އަނބުރާ ލަންޑަނަށް ގޮސްފައިވާއިރު، ހުކުރު ދުވަހު ސެނެގާލުން މޮރޮކޯއާ ދެކޮޅަށް ކުޅުނު ބައިނަލްއަގުވާމީ އެކުވެރިކަމުގެ މެޗުގައި އޭނާ ކުޅެފައެއް ނުވެއެވެ. އެ މެޗުން ސެނެގާލް ބަލިވީ މޮރޮކޯ އަތުން 3-1 ންނެވެ.

އުމުރުން 28 އަހަރުގެ މެންޑީއަށް އަނިޔާގެ މައްސަލައަކާ ކުރިމަތިލާން ޖެހުނުއިރު، ރެނެސް ދޫކޮށް އޭނާ ޗެލްސީއާ ގުޅުނީ މިދިޔަ ސެޕްޓެމްބަރު މަހުގެ ފަހުކޮޅެވެ. ޗެލްސީން މެންޑީގެ ސޮއި ހޯދީ ރެނެސްއަށް 22 މިލިޔަން ޕައުންޑް ދެއްކުމަށްފަހުއެވެ.

ޗެލްސީން މި ނިމުނު ޓްރާންސްފާ ބާޒާރުގައި ގޯލްކީޕަރެއްގެ ސޮއި ހޯދީ ޗެލްސީގެ ގޯލްކީޕަރު ސްޕެއިނުގެ ކެޕާ އަރިއްޒަބަލާގާއާ މެދު އެ ޓީމުގެ ކޯޗު ފްރޭންކް ލަމްޕާޑް ހިތްހަމަނުޖެހޭތީ ކަމަށް ރިޕޯޓުތައް ބުނެއެވެ. ދުނިޔޭގެ އެންމެ އަގުބޮޑު ގޯލްކީޕަރުގެ ގޮތުގައި 2018 ވަނަ އަހަރު ކެޕާ ޗެލްސީއަށް ބަދަލުވީ 71.6 މިލިޔަން ޕައުންޑުގެ ފީއަކަށެވެ. އެކަމަކު ޗެލްސީން ކުޅުނު ގިނަ މެޗުތަކުގެ ކެޕާގެ ފަރާތުން ގިނަ ގޯސްތަކެއް ފެނިފައިވާއިރު، ކެޕާއަށް ޗެލްސީގެ ސަޕޯޓަރުންވެސް ނުރުހެއެވެ.

ޗެލްސީން އެންމެ ފަހުން ކުޅުނު ދެ މެޗުގައިވެސް އެ ޓީމުގެ ގޯލު މެންޑީ ބެލެހެއްޓި ނަމަވެސް، އަނިޔާއާ ގުޅިގެން އަނެއްކާވެސް ކެޕާއަށް ޗެލްސީން ފުރުސަތު ދޭނެ ކަމަށް ރިޕޯޓުތައް ބުނެއެވެ. މީގެ ކުރިން ކެޕާ ވަނީ ޗެލްސީގެ ފުރަތަމަ އެގާރައިން ޖާގަ ލިބޭނެކަމުގެ ފުރިހަމަ ޔަގީންކަން އެބައޮތް ކަމަށް ބުނެފައެވެ.