ކައްދޫން އިތުރު 24 މީހަކު ޕޮޒިޓިވްވެއްޖެ
ޕޮޒިޓިވްވި 24 މީހުންނަކީ ކޮންޓެކްޓުންގެ ގޮތުގައި ފާހަގަ ކުރެވުނު މީހުން
ލ. ކައްދޫގައި މަަސައްކަތް ކުރާ ސިފައިން
ލ. ކައްދޫއަށް ތަމްރީނަށް ދިޔަ ސިފައިންގެ ތެރެއިން އިތުރު 24 މީހަކު ޕޮޒިޓިވްވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އާންމުކޮށްފައިވާ މައުލޫމާތުތަކަށް ބަލާއިރު، ކައްދޫއަށް މާލެއިން ތަމްރީނަށް ދިޔަ ސިފައިންގެ ތެރެއިން ހޮނިހިރު ދުވަހު ޕޮޒިޓިވްވީ 26 މީހުންނެވެ. އަދި އާދީއްތަ ދުވަހު އިތުރު 9 މީހަކު ޕޮޒިޓިވްވެފައިވާ އިރު، ބުރާސްފަތި ދުވަހުގެ އިރުއޮއްސި 6:00 އާ ހަމައަށް އިތުރު 24 މީހަކު ވަނީ ޕޮޒިޓިވްވެފައެވެ.
މިއާއެކު ކައްދޫން ޖުމްލަ 59 މީހަކު ވަނީ ޕޮޒިޓިވްވެފައެވެ. އެޗްޕީއޭއިން އާންމުކޮށްފައިވާ މައުލޫމާތުތަކަށް ބަލާއިރު، ކައްދޫއަށް ދިޔަ 93 ސިފައިންގެ ތެރެއިން ހޯމް ކަރަންޓީންގެ މުއްދަތު ހަމަވުމުން ސާމްޕަލް ނެގި 26 މީހަކު ހޮނިހިރު ދުވަހު ޕޮޒިޓިވްވި އިރު އާދީއްތަ ދުވަހު ނަތީޖާ ލިބުނު ސާމްޕަލްތަކުގެ ތެރެއިން 9 ސާމްޕަލެއް ޕޮޒިޓިވްވެފައި ވެއެވެ. ބުރާސްފަތި ދުވަހު ޕޮޒިޓިވްވި 24 މީހުންނަކީ ކޮންޓެކްޓުން ކަމަށް އެޗްޕީއޭއިން ބުނެއެވެ.
އެޗްޕީއޭގެ ތަފާސް ހިސާބުތައް ދައްކާގޮތުން ބުރާސްފަތި ދުވަހުގެ އިރުއޮއްސި 6:00 އާ ހަމައަށް އަތޮޅު ތެރެއިން 146 އެކްޓިވް ކޭސް ވަނީ ފާހަގަކުރެވިފައެވެ. މީގެތެރޭގައި ހިމެނެނީ 82 ދިވެހިންނާއި 64 ބިދޭސީންނެވެ. އެންމެ ގިނަ އެކްޓި ކޭސް ހިމެނެނީ ލ. ކައްދޫގައެވެ. އެއީ 59 މީހުންނެވެ.
އެންމެ ފަހުން ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވިދާޅުވީ ކުޅުދުއްފުށި ސިޓީން ޕޮޒިޓިވްވި މީހާއާއި ކޮންޓެކްޓްވި 8 މީހަކު ކޮވިޑް-19 އަށް ޕޮޒިޓިވްވެފައިވާ ކަމަށެވެ. ޑރ. ނަޒްލާ ރަފީގު ވިދާޅުވީ އުތުރުގެ ބައެއް ރަށްރަށުގައި އަދި ރާއްޖޭގެ ބައެއް އެހެން ހިސާބުތަކުގައި މިދިޔަ މަހުގެ 14 ވަނަ ދުވަހުން ފެށިގެން ފުލުހުން ވަނީ ހާއްސަ އޮޕަރޭޝަނެއް ހިންގާފައިވާ ކަމަށެވެ.
އޭގެ ތެރޭގައި މާލެއިން ދިޔަ ބައެއް ފުލުހުންނާއި ރަށްރަށުގެ ފުލުހުންގެ ބައިވެރިވެގެން މި އޮޕަރޭޝަން ހިންގާފައިވާ ކަމަށާއި، އެ އޮޕަރޭޝަންގައި ކުޅުދުއްފުށިން ބައިވެރިވި ފަރާތެއް ޕޮޒިޓިވްވެފައިވާ ކަމަށެވެ. އެގޮތުން 5 އޮކްޓޯބަރުގައި ޕޮލިސް މީހާ ޕޮޒިޓިވްވެ 6 އޮކްޓޯބަރުގައި އޭނާއާއި ކޮންޓެކްޓްވި 2 މީހަކު ޕޮޒިޓިވްވެފައިވާ ކަމަށެވެ. އަދި މުޅިއެކު ޖުމްލަ 8 ފަރާތެއް މި ކޭސްއާއި ގުޅިގެން ޕޮޒިޓިވްވެފައިވާ ކަމަށް ޑރ. ނަޒްލާ ވިދާޅުވިއެވެ.
