އިންޑިއާއާ ދެކޮޅަށް ބާއްވާ އެއްވުންތަކުގައި އައިސިސްގެ ކަޅު ދިދަ ބޭނުން ކުރާތީ ރައީސް ނަޝީދުގެ ކަންބޮޑުވުން!
9 އޮކްޓޯބަރު 2020 | ހުކުރު 04:54ދިދައިގައި މިހާރު ވާ ލިއުން އައިސިސް ދިދައިގެ ލިއުމަށް ބަދަލު ކުރުމަކީ އެކަށީގެންވާ ކަމެއް
ރައްޔިތުންގެ މަޖިލީހުގެ ރައީސް, ރައީސް މުޙައްމަދު ނަޝީދު- ރައީސް ނަޝީދު ވަނީ ދިވެހިން ވިސްނާވަޑައިގަތުމަށް އިލްތިމާސް ކުރައްވާފައި
އަވައްޓެރި އިންޑިއާއާ ދެކޮޅަށް ސިލްސިލާކޮށް ކުރިއަށްގެންދާ އެއްވުންތަކުގައި ހަނގުރާމަވެރި ޖަމާއަތެއް ކަމަށްވާ އައިސިސްގެ ކަޅު ދިދަ ރަމްޒު ކޮށްދޭފަދަ ދިދަ ބޭނުންކުރާތީ ރައްޔިތުންގެ މަޖިލީހުގެ ރައީސް, ރައީސް މުޙައްމަދު ނަޝީދު ކަންބޮޑުވުން ފާޅު ކުރައްވައިފިއެވެ.
އެކަމާ ގުޅިގެން ހުކުރު ދުވަހު ރައީސް ނަޝީދު ކުރެއްވި ޓްވީޓެއްގައި ވިދާޅުވީ، އިންޑިއާއާ ދެކޮޅަށް ހިންގާ ހަރަކާތުގެ ދިދައަކަށް އައިސިސްގެ ކަޅު ދިދަ ބޭނުން ކުރުމަކީ ކަންބޮޑުވެވަޑައިގަންނަވާ ކަމެއް ކަމަށެވެ. އަދި އެ ދިދައިގައި މިހާރު ވާ ލިޔުން އައިސިސް ދިދައިގެ ލިޔުމަށް ބަދަލު ކުރުމަކީ އެކަށީގެންވާ ކަމެއްކަން ފާހަގަ ކުރައްވައި ރައީސް ނަޝީދު ވިދާޅުވީ، އެފަދަ ރޭވުންތައް ރޭވުމަކީ މިބާވަތުގެ ކަންކަމުގައި އާންމު އުކުޅެއް ކަމަށް މާހިރުން ދެކޭ ކަމަށެވެ.
ރައީސް ނަޝީދު ވަނީ ދިވެހިން އެކަމާމެދު ވިސްނެވުމަށް އެދިވަޑައިގެންފައެވެ.
އިންޑިއާއާ ދެކޮޅަށް އަޑު އުފުލަމުންދާ ފަރާތްތަކުން އެއްވުންތަކުގައި ކަޅު ދިދަ ބޭނުން ކުރަމުންދާއިރު، ދިދައިގައި ހޭޝްޓެގްއަކަށް ބޭނުން ކުރަނީ "އިންޑިއާ އައުޓް" އެވެ. އެގޮތުން މިފަދަ ދިދަތައް ބައެއް ރަށްރަށުގައި ވެސް ނަގާފައިވާ މަންޒަރު ދައްކުވައިދޭ ވީޑިއޯތައް މީސްމީޑިއާގައި ދައުރުވަމުންދެއެވެ.
