ޕްލެޓިނީ ފަހަތަށް ޖައްސާލައި ޖިރޫޑް ދެވަނައަށް

ފުޓްބޯޅަ ލެޖެންޑް މިޝޭލް ޕްލެޓިނީ ފަހަތަށް ޖައްސާލައި، ފްރާންސްގެ ގައުމީ ފުޓްބޯޅަ ޓީމުގެ ލަނޑު ލިސްޓުގެ ދެވަނައަށް ފޯވާޑް އޮލިވިއޭ ޖިރޫޑް ޖެހިލައިފިއެވެ.

ބުދަ ދުވަހުގެރޭ ކުޅުނު ބައިނަލްއަގުވާމީ އެކުވެރިކަމުގެ މެޗުގައި ދުނިޔޭގެ ޗެމްޕިއަން ފްރާންސް ވަނީ އަމިއްލަ ގައުމުގައި ޔޫކްރޭން އަތުން 7-1 ން މޮޅުވެފައެވެ.

ޖިރޫޑް ގައުމީ ޓީމަށް ކުޅެދިން 100 ވަނަ މެޗުގައި އޭނާއަށް ކެޕްޓަން ބޭންޑް ދިންއިރު، މި މެޗުގައި އޭނާ ވަނީ ދެ ލަނޑު ޖަހާފައެވެ. އެއާއެކު 100 މެޗުން ޖިރޫޑް ވަނީ ފްރާންސަށް ޖުމްލަ 42 ލަނޑު ކާމިޔާބުކޮށްދީފައެވެ.

ޕްލެޓިނީ ފަހަތަށް ޖައްސާލައި ލަނޑު ލިސްޓުގެ ދެވަނައަށް ޖިރޫޑް ޖެހިލިއިރު، ޕްލެޓިނީއަށް ފްރާންސްގެ ޖާޒީގައި ކާމިޔާބުކުރެވިފައިވަނީ 41 ލަނޑެވެ. މި ލިސްޓުގެ އެއްވަނައިގައި 51 ލަނޑާއެކު އޮތީ ކުރީގެ ފޯވާޑް ތިއަރީ އޮންރީއެވެ. އެހެންކަމުން އޮންރީއާ ހަމަކުރަން ޖިރޫޑަށް ދެން ބޭނުންވަނީ އެންމެ ނުވަ ލަނޑެވެ.

ޔޫކްރޭން އަތުން ފްރާންސް ބުދަ ދުވަހުގެރޭ ބޮޑު މޮޅެއް ހޯދިއިރު، މި މެޗުގައި ފްރާންސްގެ 17 އަހަރުގެ އެޑުއާޑޯ ކަމަވިންގާ ލަނޑު ޖެހިއިރު، އޭނާ ވަނީ ގަރުނެއްގެ ތެރޭ ފްރާންސަށް ލަނޑު ޖަހައިދިން އެންމެ ޒުވާން ކުޅުންތެރިޔާގެ ޝަރަފު ހޯދާފައެވެ.

ދެން މި މެޗުގައި ފްރާންސްގެ ލަނޑުތައް ޖަހައިދިނީ ކޮރެންޓިން ޓޮލިސޯ އާއި، ކީލިއަން އެމްބާޕޭ އަދި އެންޓޮއިން ގްރީޒްމެނެވެ. ފްރާންސްގެ އަނެއް ލަނޑަކީ އަނެއް ލަނޑަކީ ޔޫކްރޭނުގެ ވިޓާލީ މައިކޮލެންކޯ އަތުން ބައިކޮޅަށް ވަން ގޯލެކެވެ. މެޗުގައި ޔޫކްރޭނުން ޖެހި ހަމައެކަނި ލަނޑު އެ ޓީމަށް ކާމިޔާބުކޮށްދިނީ ވިކްޓަ ސިގަންކޯވެވެ.

ބައިނަލްއަގުވާމީ އެކުވެރިކަމުގެ މެޗުން ޔޫކްރޭން އަތުން ފްރާންސް މޮޅުވިއިރު، ދެން ފްރާންސުން ކުޅޭ މެޗުގައި ޔުއެފާ ނޭޝަންސް ލީގުގައި ނުކުންނާނީ އެންމެ ފަހުގެ ޗެމްޕިއަން ޕޯޗުގަލާ ދެކޮޅަށެވެ. އެ މެޗު ކުޅޭނީ އަންނަ އާދީއްތަ ދުވަހުގެރެއެވެ.