ރިސޯޓް ތަރައްގީ ކުރަން ދޫކޮށްފައިވާ 13 ރަށުގެ މައްސަލައިގައި ނ. އަތޮޅު މެމްބަރުންގެ ކަންބޮޑުވުން!
ރިސޯޓްތައް ހުޅުވުމުން ނ އަތޮޅުގައި 5000 އެއްހާ ވަޒީފާގެ ފުރުސަރު ހުޅުވިގެންދާނެ
ނ އަތޮޅުގެ ރަށްތައް ނިސްބަތްވާ ދާއިރާތަކުގެ ރައްޔިތުންގެ މަޖިލީހުގެ މެންބަރުން ޓޫރިޒަމް މިނިސްޓަރާއި ބައްދަލުކުރެއްވުން
ނ. އަތޮޅުގައި ރިސޯޓްގެ ގޮތުގައި ތަރައްޤީ ކުރަމުންދާ ރަށްތަކުގެ މަސައްކަތް ލަސްވަމުންދާތީ އެ އަތޮޅުގެ ދާއިރާތަކަށް ނިސްބަތްވާ ރައްޔިތުންގެ މަޖިލީހުގެ މެންބަރުން ކަންބޮޑުވުން ފާޅުކުރައްވައިފިއެވެ.
ނ. އަތޮޅުގެ ފަތުރުވެރިކަމާއި ގުޅުން ހުރި ކަންކަމާއި ގުޅޭ ގުޅޭގޮތުން މަޝްވަރާ ކުރެއްވުމަށް އެއަތޮޅުގެ މަނަދޫ ދާއިރާގެ މެންބަރު އަހުމަދު ހާރޫނާއި، ވެލިދޫ ދާއިރާގެ މެންބަރު މުހައްމަދު އަބްދުﷲ ޝަފީޤާއި، ކެނދިކުޅުދޫ ދާއިރާގެ މެންބަރު އަހުމަދު އީސާ އަދި ހޮޅުދޫ ދާއިރާގެ މެންބަރު ޔޫނުސް އަލީ ވަނީ ބުދަ ދުވަހު ޓޫރިޒަމް މިނިސްޓަރ އަބްދުﷲ މައުސޫމްއާ ބައްދަލުކުރައްވާފައެވެ.
މި ބައްދަލުވުމުގައި ނ. އަތޮޅުގައި ރިސޯޓް ތަރައްޤީ ކުރުމަށް ދޫކޮށްފައިވާ 13 ރަށުގެ މަސައްކަތްތައް ލަސްވަމުންދާތީ މެންބަރުން ވަނީ ކަންބޮޑުވުން ފާޅުކުރައްވާފައެވެ. އޭގެ ތެރެއިން ބައެއް ރަށްތަކަކީ މީގެ ދިހަ ވަރަކަށް އަހަރު ކުރިން ރިސޯޓް ތަރައްްޤީ ކުރުމަށް ހަވާލުކޮށްފައިވާ ރަށްތަކަށް ވުމުން، މަސައްކަތްތައް ނުނިމި ލަސްވަމުން ދިއުމަކީ ދާއިރާގެ ތަރައްްޤީއަށާއި ދާއިރާގެ ރައްޔިތުނަށް ވަޒީފާގެ ފުރުސަތުތަކަށް އެޅިފައިވާ ހުރަހެއްކަން މެންބަރުން ވަނީ ފާހަގަ ކުރައްވާފައެވެ. އެ ރިސޯޓްތައް ހުޅުވުމުން ނ އަތޮޅުގައި 5000 އެއްހާ ވަޒީފާގެ ފުރުސަތުތައް ފަހިވެގެންދާނެ ކަމަށް މެންބަރުން ވިދާޅުވިއެވެ.
ނ. އަތޮޅުގައި ރިސޯޓްގެ ގޮތުގައި ތަރައްޤީ ކުުރަމުންދާ 13 ރަށުގެ ތެރޭގައި ހިމެނެނީ ހުއިވަނި، ހުވަނދުމާވައްޓަރު، ރާފުށި، ކުންނަމަލެއި، ކުޑަފުށި، އެކުޅިވަރު، އެއްދުއްފަރުމައިރަށް، މާކަނާފުށި، މާވެލަވަރު، ދިގުރަށް، ތޮށިގަނޑުކޮޅު، ތަނބުރުދުއްފުށި އަދި ލޯފަރެވެ.
މީގެ އިތުރުން ނ. އަތޮޅަކީ ފަޅުރަށްތައް ގިނަ އަތޮޅަކަށް ވީނަމަވެސް އެ އަތޮޅުގެ ރަށްރަށުގެ ރައްޔިތުންނާއި ގެސްޓްހައުސް ހިންގާ ފަރާތްތަކުން ޕިކްނިކް ދާނެ ރަށެއް ނެތުމުން އެކަމުގެ ކަންބޮޑުވުންވެސް ވަނީ މިނިސްޓަރާއި ހިއްސާކުރައްވާފައެވެ. އަދި ރިސޯޓް ތަރައްޤީ ކުރުމަށް މިއަހަރު އިއުލާން ކުރާ ރަށްތަކުގެ ތެރޭގައި އެ ކުޅިވަރު އަލުން ހިމެނުމާއި ގުޅޭގޮތުންވެސް ބައްދަލުވުމުގައި ވަނީ މަޝްވަރާ ކޮށްފައެވެ.
މި ބައްދަލުވުމާއި ގުޅޭ ގޮތުން މިނިސްޓަރ މައުސޫމް ވިދާޅުވީ ނ. އަތޮޅުގެ މެންބަރުގެ ކަންބޮޑުވުންތަކަށް ހައްލެއް ހޯދުމާއި ގުޅޭ ގޮތުން މަޝްވަރާތައް ކުރެވިގެން ދިޔަކަމަށާއި ދެން އޮތީ އެކަމަށް އަަމަލީ މަސައްކަތްތައް ކުރުން ކަމަށެވެ.
ނ. އަތޮޅުގައި 69 ރަށެއް ހިމެނޭއިރު އޭގެތެރޭގައި މީހުން ދިރިއުޅެމުންދާ 13 ރަށެެއް އަދި މީހުން ދިރިނޫޅޭ 47 ރަށެއް ހިމެނެއެވެ. އެ އަތޮޅުގައި ރިސޯޓް ތަރައްްޤީ ކުރުމަށް 13 ރަށެއް ހަވާލުކޮށްފައިވާއިރު ރިސޯޓްގެ ގޮތުގައި ހަތް ރަށެއް ދަނީ ބޭނުން ކުރަމުންނެވެ. އަދި ސިނާއީ މަސައްކަތްތަކަށް ދެ ރަށެއް، ދަނޑުވެރިކަން ކުރުމަށް އަށް ރަށެއް، އަދި އެކުއަރކަލްޗަރ މަސައްކަތަށް އެއް ރަށް ވަނީ ދޫކޮށްފައެވެ.
މީގެ އިތުރުން ތިމާވެށި ޤާނޫނުގެ ދަށުން ހިމާޔަތްކޮށްފައިވާ އެއް ރަށެއް، އަދި އިންޓަނޭޝަނަލް އެއަރޕޯޓެއްގެ ގޮތުގައިވެސް އެއް ރަށް ވަނީ ތަރައްޤީކޮށްފައެވެ. އެއްވެސް މަސައްކަތެއް ނުކޮށް ފަޅުރަށުގެ ގޮތުގައި 12 ރަށެއް ނ. އަތޮޅުގައި މިވަގުުތުވެސް އެބައޮތެވެ.
