ސްޕޯޓްސް ކައުންސިލުގެ ރައީސްގެ މަގާމަށް އިބްރާހިމް ނާހިދު އައްޔަންކުރައްވައިފިއެވެ.
ކުރީގެ މަޝްހޫރު ބާސްކެޓްބޯޅަ ކުޅުންތެރިޔާ އަދި ކޯޗު ސްޕޯޓްސް ކައުންސިލުގެ ރައީސް ކަމަށް އައްޔަން ކުރައްވާފައިވަނީ ބުދަ ދުވަހުއެވެ. މި މަގާމަށް ނާހިދު އައްޔަން ކުރެއްވީ މިދިޔަ ސެޕްޓެމްބަރު މަހު އިބްރާހިމް އިސްމާއިލް މަގާމުން އިސްތިއުފާ ދެއްވުމުންނެވެ.
ސްޕޯޓްސް ކައުންސިލުގެ ނައިބު ރައީސްގެ ގޮތުގައި ހުންނެވި ނާހިދަކީ 2008 ވަނަ އަހަރުން 2013 ވަނަ އަހަރަށް ބާސްކެޓްބޯޅަ އެސޯސިއޭޝަނުގެ ހިންގާ ކޮމިޓީގައި މަސައްކަތް ކުރެއްވުމުގެ އިތުރުން، 13 އަހަރު ބާސްކެޓްބޯޅައިގައި ޚިދުމަތް ކުރެއްވި ބޭފުޅެކެވެ. ފީބާ އިންޓަނޭޝަނަލް ކޯޗިންގ ލައިސަންސް ހޯދާފައިވާ ނާހިދު ވަނީ ގައުމީ ބާސްކެޓްބޯޅަ ޓީމުގެ ކެޕްޓަންކަން ކުރެއްވުމުގެ އިތުރުން، ގައުމީ ބާސްކެޓްބޯޅަ ޓީމަށް ކޯޗުކަންވެސް ކޮށްދެއްވާފައެވެ. އަދި އެކި ކުލަބުތަކަށް ކޯޗުކަން ކޮށްދެއްވާ، ގިނަ ކާމިޔާބުތަކެއް ބާސްކެޓްބޯޅައިން ވަނީ ހޯއްދަވާފައެވެ.
ޖަކަޓާގައި 2018 ވަނަ އަހަރު ބޭއްވި އޭޝިއަން ގޭމްސް އާއި، 2019 ވަނަ އަހަރު މޮރިޝަސްގައި ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ) އާއި، 2019 ވަނަ އަހަރު ކަތަމަންޑޫގައި ބޭއްވި ސައުތު އޭޝިއަން ގޭމްސްގައި ރާއްޖެއިން ބައިވެރިވި ކޮންޓިންޖެންޓުގެ ޗެފް ޑި މިޝަނަރަކީވެސް ނާހިދެވެ. މީގެ އިތުރުން ރާއްޖޭގައި 2023 ވަނަ އަހަރު ބޭއްވުމަށް ނިންމާފައިވާ އައިއޯއައިޖީގެ ބިޑް ކޮމިޓީގައިވެސް މަސައްކަތް ކުރައްވާފައިވެއެވެ.
ޖުމްލަ 11 މެންބަރުން އެކުލެވޭ ސްޕޯޓްސް ކައުންސިލުގައި ތިބެނީ އެސޯސިއޭޝަންތައް ތަމްސީލުކުރާ ހަތަރު މެންބަރުންނާއި، ކުޅިވަރާ ބެހޭ ވުޒާރާގެ ތެރެއިން ވަޒީރު އައްޔަން ކުރައްވާ ދެ މެންބަރުންނާއި، ދެ އަންހެން މެންބަރުންނާއި، ޤާނޫނީ ވަކީލަކާއި، ތައުލީމާ ބެހޭ ވުޒާރާ ތަމްސީލުކުރައްވާ މެންބަރަކާއި، މޯލްޑިވްސް އޮލިމްޕިކް ކޮމިޓީން ކަނޑައަޅާ މެންބަރެކެވެ.
ސްޕޯޓްސް ކައުންސިލުން ކުޅިވަރުގެ ޤާނޫނުގެ ދަށުން ހަދަން ޖެހޭ ގަވާއިދުތަކާއި އުސޫލުތައް ހަދަންޖެހޭއިރު، އެ މަސައްކަތުގެ ބޮޑުބައި ކުރީގެ ރައީސް އިބްރާހިމް އިސްމާއިލުގެ ދައުރުގައި ވަނީ ނިންމާފައެވެ. އެ މަސައްކަތުގެ 90 އިންސައްތަ ނިމިފައިވާއިރު، ހުރިހާ މަސައްކަތްތަކެއް މި އަހަރުގެ ނިޔަލަށް ނިންމައި، ކުލަބްތަކާއި ޖަމްޢިއްޔާތައް އިތުރަށް ހަރުދަނާކުރާނެ ގޮތްތަކާ މެދު އަންނަ އަހަރު ފުޅާ ދާއިރާއެއްގައި މަސައްކަތް ކުރެވޭނެ ކަމަށް އިބްރާހިމް އިސްމާއިލް ވަނީ ވިދާޅުވެފައެވެ.
