ޖަރުމަނުގެ ވޯލްޑް ކަޕް ތަރި ގޮޓްޒާ ޕީއެސްވީއަށް

ޖަރުމަނަށް 2014 ވަނަ އަހަރުގެ ފީފާ ވޯލްޑް ކަޕް ކާމިޔާބުކޮށްދިން ލަނޑު ޖެހި ފޯވާޑް މާރިއޯ ގޮޓްޒާ ޕީއެސްވީ އެއިންދޯވަނަށް ބަދަލުވެއްޖެއެވެ.

އުމުރުން 28 އަހަރުގެ ފޯވާޑް ޕީއެސްވީއަށް ބަދަލުވީ ހިލޭ ޓްރާންސްފާއެއްގެ ދަށުންނެވެ. އަދި އޭނާ ވަނީ ނެދަލެންޑްސްގެ ކުލަބާއެކު ދެ އަހަރުގެ އެއްބަސްވުމެއް ހަދާފައެވެ.

ޕީއެސްވީއާ ގުޅުމަށްފަހު ގޮޓްޒާ ބުނީ މި ނިމުނު ޓްރާންސްފާ ބާޒާރުގައި ވަރަށް ގިނަ ކުލަބުތަކުން ހުށަހެޅުންތައް ލިބުނު ކަމަށާއި، އެކަމަކު ޕީއެސްވީއާ ގުޅުމަށް ނިންމީ އޭނާ އަމިއްލައަށް ކަމަށެވެ. އަދި ތަފާތު ޗެލެންޖަކަށް އޭނާ ތައްޔާރަށް ހުރި ކަމަށްވެސް ގޮޓްޒާ ބުންޏެވެ.

މީގެ ކުރިން ބަޔާން މިއުނިކަށްވެސް ކުޅުނު ގޮޓްޒާ ޕީއެސްވީއަށް ބަދަލުވިއިރު، މި ފަހަކަށް އައިސް ޑޯޓްމުންޑުގައި އޭނާއަށް އެންމެ އެދެވޭ ކުޅުމެއް ދެއްކިފައެއް ނުވެއެވެ. އެގޮތުން މިދިޔަ ސީޒަނުގައި ޑޯޓްމުންޑަށް ކުޅެދިން 21 މެޗުގައި އޭނާއަށް ކާމިޔާބުކުރެވިފައިވަނީ އެންމެ ތިން ލަނޑެވެ.

އެކަމަކު ކެރިއަރުގައި ގޮޓްޒާ ގިނަ ކާމިޔާބީތަކެއް ހޯދާފައިވާއިރު، އޭނާ ވަނީ ޑޯޓްމުންޑުގެ އިތުރުން ބަޔާނާއެކު ޖަރުމަން ލީގު ޖުމްލަ ފަސް ފަހަރު ކާމިޔާބުކޮށްފައެވެ. އަދި ވަނީ ބަޔާނާއެކު ޔުއެފާ ސުޕަ ކަޕާއި ފީފާ ވޯލްޑް ކަޕުވެސް ކާމިޔާބުކޮށްފައެވެ.

ޖަރުމަނަށް 2014 ވަނަ އަހަރުގެ ވޯލްޑް ކަޕް ކާމިޔާބުކޮށްދިން ގޮޓްޒާ ވަނީ ޖަރުމަނުގެ ގައުމީ ޓީމަށް ކުޅެދިން 63 މެޗުގައި 17 ލަނޑު ޖަހާފައެވެ. އެކަމަކު އޭގެ ފަހުން 2018 ވަނަ އަހަރު އޮތް ވޯލްޑް ކަޕަށް ޖަރުމަނުން ގޮޓްޒާ ނަގާފައެއް ނުވެއެވެ.