އަހަރު ނިމެންވާއިރު މުޅި ރާއްޖެ ދަތުރުފަތުރުގެ ނިޒާމުން ގުޅާލުމުގެ ތަފްސީލީ ޕްލޭނެއް އޮންނާނެ: އަސްލަމް
5 އޮކްޓޯބަރު 2020 | ހޯމަ 11:54މިއަހަރުގެ ބަޖެޓްގައި މިކަަމަށް 150 މިލިއަން ރުފިޔާ ވަނީ ހިމަނާފައި
ވިލިގިނލި ފެރީ
ރާއްޖޭގެ އެކި ރަށްތައް ދަތުރުފަތުރުގެ ވިއުގައަކުން ގުޅާލުމަށް ސަރުކާރުން ކުރަމުންދާ މަސައްކަތުގެ ތެރެއިން މި އަހަރު ނިމެންވާއިރަށް މި ވިއުގައިގެ ތަފްސީލީ ޕްލޭނެއް އެކުލަވާލާ ނިމޭނެކަމަށް މިނިސްޓަރ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
ދަތުރުފަތުރުގެ ނިޒާމަކުން މުޅި ރާއްޖޭ ގުޅާލާ, ސަރަހައްދީ ތަރައްގީގެ ސެންޓަރުތައް ގާއިމްކުރުމުގެ މެދުރާސްތާގެ ޕްލޭނެއް އެކުލަވާލުމަށް ސަރުކާރުން މަސައްކަތް ކުރަމުންދާކަން މި ސަރުކާރުން ހާމަކޮށްފައިވަނީ މިދިޔަ އަހަރުގެ ޖުލައި މަހުގެ 11 ވަނަ ދުވަހު ދުނިޔޭގެ އާބާދީގެ ދުވަސް ފާހަގަކުރުމަށް ބޭއްވި ރަސްމިއްޔާތެއްގެ ތެރެއިންނެވެ.
މި މަޝްރޫޢަކީ ސަރުކާރުގެ ސްޓްރެޓެޖިކް އެކްޝަން ޕްލޭންގައިވެސް ހިމެނޭ މަޝްރޫއެކެވެ. އެ އެކްޝަން ޕްލޭންގެ ދަށުން މިއަހަރުގެ ބަޖެޓްގައި މިކަަމަށް 150 މިލިއަން ރުފިޔާވެސް ވަނީ ހިމަނާފައެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި މި ވިއުގަ ގާއިމުކުރުމުގެ މަސައްކަތް އޮތް ހިސާބަކާއި ގުޅޭގޮތުން މިނިސްޓަރާއި ސުވާލުކުރެއްވީ ގަމު ދާއިރާގެ މެމްބަރ މުހައްމަދު ވިސާމެވެ.
އެ ސުވާލަށް ޖަވާބު ދެއްވަމުން މިނިސްޓަރ ވިދާޅުވީ ބަޖެޓްގައި ހިމަނައިގެން ރާއްޖޭގެ އެންމެ އުތުރުގައި ހިމެނޭ ހއ، ހދ. އަދި ށ. ގައި ދަތުރުފަތުރުގެ ނިޒާމު ގާއިމުކުރަން ޖެހޭ ކަންތައްތައް ކުރުމަށް ޕްލޭން ކުރެވިފައިވާ ކަމަށެވެ. އެ ތިން އަތޮޅުގައި މި މަޝްރޫޢު ކުރިޔަށް ގެންދާނެ ގޮތުގެ ތަފްސީލީ ޕްލޭނެއް މިއަހަރު ފެށުނުއިރު އޮތް ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އެހެންކަމުން ދެން މަސައްކަތްތައް ކުރިޔަށްދިޔައީ ދެން ހުރި ސަރަހައްދުތަކުގައި މި ވިއުގަ ގާއިމުކުރާނެ ގޮތުގެ ޕްލޭނެއް އެކުލަވާލުން ކަމަށެވެ.
ނޭޝަނަލް އެކްޝަން ޕްލޭނާ އެއްގޮތަށް ކޮންމެ ރަށެއްގައި ފެރީ ޓާމިނަލްތައް ގާއިމު ކުރެވިގެންދާނެ ކަމަށް ސަރުކާރުން ވަނީ ބުނެފައެވެ. އަދި މިކަންކަމުގައި އަމިއްލަ ވިޔަފާރިތަކަށް ފުރުސަތު ހުޅުވާލުމަށް ވަނީ ހަމަޖެހިފައެވެ.
މީގެ އިތުރުން ނިއަމި ނަމުގައި ފެރީ ޝެޑިޔުލްތައް ބަލާލެވޭނެ މޯބައިލް އެޕްލިކޭޝަނެއް ތަރައްގީކުރުމަށްވެސް ވަނީ ޕްލޭންގައި ހިމަނާފައެވެ. ރާއްޖޭގެ ރަށްތައް ދަތުރުފަތުރުގެ ނިޒާމުން ގުޅާލުމަކީ 2008 ވަނަ އަހަރު އައި އެމްޑީޕީ ސަރުކާރުގެ ވައުދެކެވެ. އަދި އެ ވައުދުގެ ދަށުން ފެރީގެ ނިޒާމުތަކެއް ގާއިމުކުރެވި ހިދުމަތް ދެމުންގެންދެއެވެ.
