ކުޅުދުއްފުށިން އިތުރު 2 މީހަކު ޕޮޒިޓިވް

ކުޅުދުއްފުށި ސިޓީން އިތުރު 2 މީހަކު ޕޮޒިޓިވްވެއްޖެ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.

އެޗްޕީއޭ އިން ހާމަކޮށްފައިވާ މައުލޫމާތުތައް ދައްކާގޮތުން ކުޅުދުއްފުށި ސިޓީން ޕޮޒިޓިވްވި 2 މީހުންނަކީ ހޯމް ކަރަންޓީންގައި ތިބި 2 މީހުންނެވެ. މިއާއެކު އެ ސިޓީގައި ޕޮޒިޓިވްވި މީހުންގެ އަދަދު ވަނީ 7ށް އަރާފައެވެ. ކުޅުދުއްފުށި ސިޓީން ފުރަތަމަ މީހަކު ޕޮޒިޓިވްވެފައިވަނީ މިދިޔަ މަހުގެ 25 ވަނަ ދުވަހުއެވެ.

އެ ސިޓީން ފުރަތަމަ ޕޮޒިޓިވްވީ މާލެއިން ފުރައިގެން އެރަށަށް ދިޔަ ފާޅު ބޯޓުގެ ކެޕްޓަނެވެ. އަދި އޭނާއާއި ކޮންޓެކްޓްވި 3 މީހަކު ޕޮޒިޓިވްވި އިރު އެރަށު ހޯމް ކަރަންޓީންގައި ހުރި މީހަކު މިދިޔަ މަހުގެ 27 ވަނަ ދުވަހު ޕޮޒިޓިވްވިއެވެ. ކުޅުދުއްފުށި މޮނިޓަރިންގެ ހާލަތަށް އެއިރު ލެވުނު ނަމަވެސް ކޮންޓެކްޓް ޓްރޭސިންގެ މަސައްކަތް ނިމިފައިވާތީ އެ ރަށް ވަނީ މޮނިޓަރިންގެ ހާލަތުން ނަގާފައެވެ.

އަތޮޅު ތެރޭގައި 114 އެކްޓިވް ކޭސް އެބަހުއްޓެވެ. މީގެ ތެރޭގައި ހިމެނެނީ 63 ބިދޭސީންނާއި 51 ދިވެހިންނެވެ. މޮނިޓަރިންގެ ހާލަތުގައި އޮތީ ގދ. ހޯނޑެއްދޫ އެކަންޏެވެ. އަދި ގއ. ވިލިނގިލި ކޮވިޑް ފެސިލިޓީގައި 6 މީހަކަށް އަންނަނީ ފަރުވާ ދެމުންނެވެ.