ޕާކިސްތާން ޓެކްނިކަލް އެސިސްޓަންސް ސްކޮލަރޝިޕް ޢިއުލާންކޮށްފި

މިނިސްޓްރީ އޮފް ހަޔަރ އެޑިޔުކޭޝަންއިން, ޕާކިސްތާން ޓެކްނިކަލް އެސިސްޓަންސް 2020-2021 ސްކޮލަރޝިޕް އިއުލާންކޮށްފިއެވެ.

ޕާކިސްތާން ޓެކްނިކަލް އެސިސްޓަންސް ސްކޮލަރޝިޕްގައި ހަތަރޔ ފުރުސަތު އެމް.ބީ.ބީ.އެސް އަދި 01 ފުރުސަތު ބެޗެލަރ އޮފް ޑެންޓިސްޓްރީ ހިމެނެއެވެ. މިނިސްޓްރީން ބުނި ގޮތުގައި މި ކޯސްތަކުގައި ކިޔެވުމަށް ޕާކިސްތާނުގެ 14 ޔުނިވަރސިޓީއެއް ވަނީ ލިސްޓްކުރެވިފައެވެ.

ބެޗެލަރސް ޑިގްރީ ލެވެލްގެ ކޯސްތަކަށް އެދި ހުށަހަޅާއިރު ކޯހުގެ ޝަރުތުތަކުގެ ތެރޭގައި ހިމެނެނީ ޖީ.ސީ.އީ އޯލެވެލް/އައި.ޖީ.ސީ.އެސް.ސީ/އެސް.އެސް.ސީ އިމްތިހާނުގެ 05 މާއްދާއިން "ސީ" އިން ފެށިގެން މަތީ ގްރޭޑެއް ހާސިލްކުރައްވައިފުމާއި ޖީ.ސީ.އޭ ލެވެލް ތިން މާއްދާއިން ސީ އިން ފެށިގެން މަތީ ގްރޭޑެއް ހާސިލް ކުރައްވައިފައިވުމެވެ.

މި މާއްދާތަކުގެ ތެރޭގައި ކެމިސްޓްރީ، ބަޔޮލޮޖީ، ފިޒިކްސް ނުވަތަ ހިސާބު ހިމެނެންވާނެކަމަށް މިނިސްޓްރީން ބުނެއެވެ. މީގެ އިތުރުން ވެސް ހުރި ޝަރުތުތައް ވަރަށް ތަފްސީލުކޮށް ޢިއުލާންގައި ވަނީ ހިމަނާފައެވެ.

މި ސްކޮލަރޝިޕްގެ ފައިނަލް ސިލެކްޝަން ހެދުމަށް ހަމަޖެހިފައިވަނީ ޕާކިސްތާން ޓެކްނިކަލް އެސިސްޓަންސް ގެ ފަރާތުންނެވެ. އަދި މި ސްކޮލަރޝިޕްގެ ހުރިހާ ޚަރަދެއް ހަމަޖައްސަންޖެހެނީ ދަރިވަރު އަމިއްލައަށެވެ. މި ސްކޮލަރޝިޕް ކޮލެޖްތަކުގެ ހޮސްޓެލް ފީ އަކީ ކެއުމުގެ ޚަރަދު ނުލާ މަހަކު 150 ޑޮލަރާއި 200 ޑޮލަރާ ދެމެދުގެ އަދަދެކެވެ.

މި ކޯސްތަކަށް އެޕްލިކޭޝަން ފޯމާއި އެކު ހުށަހަޅަން ޖެހޭ ލިޔެކިއުންތަކުގެ ތަފްސީލް މިނިސްޓްރީ އޮފް ހަޔަރ އެޑިޔުކޭޝަންގެ ވެބްސައިޓުގައި އަޕްލޯޑް ކުރެވިފައިވާނެކަމަށް މިނިސްޓްރީން ބުނެއެވެ.

މިނިސްޓްރީ އޮފް ހަޔަރ އެޑިޔުކޭޝަނުން ކެނޑިޑޭޓުން ނޮމިނޭޓްކުރުމަށް ހަމަޖެހިފައިވަނީ އެކެޑެމިކް މެރިޓްއަށް ޕޮއިންޓް ދީގެން އެންމެ މަތިން ޕޮއިންޓް ލިބޭ ތަރުތީބުންނެވެ. މިގޮތަށް ޕޮއިންޓް ދޭ ގޮތުގެ ތަފްސީލް މިނިސްޓްރީ އޮފް ހަޔަރ އެޑިޔުކޭޝަންގެ ވެބްސައިޓްގައި ފެންނަން ހުންނާނެކަމަށް މިނިސްްރީން ބުންޏެވެ.

މިނިސްޓްރީން ބުނި ގޮތުގައި މި ސްކޮލަރޝިޕްގެ ފުރުސަތުތަކަށް އެޕްލިކޭޝަން ހުށަހަޅުއްވާނީ "މައި އެޑިޔު" ޕޯޓަލް މެދުވެރިކޮށެވެ. އަދި މި ސްކޮލަރޝިޕްއަށް އެދި ހުށަހެޅުމުގެ ސުންގަޑިއަކީ 15 އޮކްޓޯބަރ 2020 ވަނަ ދުވަހުގެ 1330 ގެ ކުރިންނެވެ.