ޑާކާ އަބަހާނީ އަތުން މޮޅުވެ ބެންގަލޫރު އެފްސީ ގްރޫޕްގެ އެއްވަނައަށް

ބަންގްލަދޭޝްގެ ޑާކާ އަބަހާނީ އަތުން 2-0 އިން މޮޅުވެ އޭއެފްސީ ކަޕްގެ ގްރޫޕް އީގެ އެއް ވަނައިގައި އިންޑިއާގެ ބެންގަލޫރު އެފްސީ ހަ ޕޮއިންޓުގެ ލީޑެއް ނަގައިފިއެވެ.

ބެންގަލޫރުގެ އަމިއްލަ ދަނޑުގައި ކުޅުނު މި މެޗުގެ ފުރަތަމަ ހާފުގައި ދެޓީމުގެ ފަރާތުން ވެސް ހަމަހަމަ ކުޅުމެއް ފެނިގެންދިޔައިރު، މެޗުގައި ލަނޑުޖަހާނެ މާގިނަ ފުރުސަތުތަކެއް ދެޓީމަށް ވެސް ލިބިފައެއް ނުވެއެވެ.

އެހެން ނަމަވެސް ހާފުގެ ކުރީކޮޅު ސުނިލް ޗެތުރީ އާއި ލިންޑޮން ވަނީ ޑާކާ އަބަހާނީގެ ގޯލާ އަމާޒުކޮށް ދެ ހަމަލާއެއްވަރު ފޮނުވާލާފައެވެ. އަދި ޑާކާ އަބަހާނީގެ ކުޅުންތެރިން އުފެއްދި ބައެއް ހަމަލާ ބެންގަލޫރުގެ ކީޕަރު ވަނީ ހުށިޔާރުކަމާއެކު ދިފާއުކޮށްފައެވެ.

މެޗުގައި ބެންގަލޫރުން ޖެހި ފުރަތަމަ ލަނޑު 42 ވަނަ މިނެޓުގައި ކާމިޔާބުކޮށްދިނީ ނިޝޫ ކުމާރެވެ.

މިނަތީޖާގައި އޮވެ ފުރަތަމަ ހާފު ނިމުނު އިރު ދެވަނަ ހާފު ފެށިގެން ދެޓީމުން ވެސް ވަނީ ލަނޑެއް ޖެހުމަށް ބުރަކޮށް މަސައްކަތް ކޮށްފައެވެ. އެގޮތުން ބެންގަލޫރުން ވަނީ މިހާފުގައި އަބަހާނީގެ ހާފަށް ބާރު ބޮޑުކޮށް ނުރައްކާތެރި ތިން ހަމަލާއެއް ވަރު ފޮނުވާލާފައެވެ.

މި މެޗުގައި ބެންގަލޫރުން ޖެހި ދެވަނަ ލަނޑު 82 ވަނަ މިނެޓުގައި ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި މަރިޔާން ޔުގޮވިޗެވެ. އަދި އޭގެ ފަހުން ވެސް އެޓީމުން ވަނީ ލަނޑެއްޖެހުމަށް މެޗުގެ ބާކީ ބައިގައި މޮޅު ކުޅުމެއް ދައްކާފައެވެ.

މި މުބާރާތުގައި ބެންގަލޫރު ދެން ކުޅޭ މެޗުގައި އަންނަ މަހު ތިން ވަނަ ދުވަހު ނުކުންނާނީ ވެސް އަބަހާނީއާ ދެކޮޅަށެވެ. އެ މެޗު އޮންނާނީ ޑާކާގަ އެވެ.

ބެންގަލޫރުން ވަނީ ފުރަތަމަ މެޗުގައި މޯހަން ބަގާން އަތުން 2-1 އިން މޮޅުވެފަ އެވެ. އަދި ދެ ވަނައަށް އެޓީމު ކުޅުނު މެޗުގައި މާޒިޔާގެ މައްޗަށް ވަނީ ފަހު ސިކުންތުގައި ޖެހި ލަނޑާއެކު ކުރި ހޯދާފައެވެ.