މި ހާލަތުގައި ޗެމްޕިއަންސް ލީގު ފެށުން ރަނގަޅެއް ނޫން: ޒޯކް

ޔޫރަޕުގައި ކޮވިޑް-19 އަށް ޕޮޒިޓިވްވާ މީހުންގެ އަދަދު އިތުރުވަމުން އަންނަ މި ހާލަތުގައި ޔުއެފާ ޗެމްޕިއަންސް ލީގުގެ ކުޅުން ފެށުން ރަނގަޅު ނޫން ކަމަށް ބޮރޫޝިއާ ޑޯޓްމުންޑުގެ ސްޕޯޓިންގ ޑިރެކްޓަރު މައިކަލް ޒޯކް ބުނެފިއެވެ.

ކޮވިޑް-19 ގެ ސަބަބުން މިދިޔަ ސީޒަނުގެ ޗެމްޕިއަންސް ލީގާއި ޔޫރޮޕާ ލީގު ކުރިއަށް ގެންގޮސްފައިވަނީ ކުއާޓާފައިނަލް މެޗުތަކުން ފަށައިގެން އެއް ސަރަހައްދެއްގައެވެ. އެގޮތުން މިދިޔަ ސީޒަނުގެ ޗެމްޕިއަންސް ލީގުގެ މެޗުތައް ޕޯޗުގަލްގެ ވެރިރަށް ލިސްބަނުގައި ކުރިއަށް ގެންދިޔައިރު، ޔޫރޮޕާ ލީގުގެ މެޗުތައް ކުޅުނީ ޖަރުމަނުގައެވެ.

ޖަރުމަނުގެ މީޑިއާއަކަށް ދިން އިންޓަވިއުއެއްގައި ޒޯކް ބުނީ ޔޫރަޕުގެ ބޮޑެތި ގައުމުތަކުގައި ކޮވިޑް-19 އަށް ޕޮޒިޓިވްވާ މީހުންގެ އަދަދު އަންނަނީ ދުވަހެއް ދުވަހަކަށް އިތުރުވަމުން ކަމަށާއި، އެހެންކަމުން މި ހާލަތުގައި ޔޫރަޕުގެ ކުލަބުތަކުގެ މެދުގައި ބޭއްވޭ އެންމެ ބޮޑު ދެ މުބާރާތް ކަމަށްވާ ޗެމްޕިއަންސް ލީގާއި ޔޫރޮޕާ ލީގުގެ ކުޅުން އަލުން ފެށުން އެއީ އެންމެ ރަނގަޅު ގޮތެއް ނޫން ކަމަށެވެ.

މީގެ ކުރިން ޔޫރަޕުގެ ކުޅިވަރުގެ ހާލަތު ދިރާސާކުރަމުން އަންނަ ފަރާތްތަކުންވެސް ވަނީ ކޮވިޑް-19 ގެ ކޭސްތައް އިތުރުވަމުން އަންނަނަމަ، ޔޫރަޕުގައި ބާއްވަމުން އަންނަ ބޮޑެތި މުބާރާތްތައް ބޭއްވުމުގައި ގޮންޖެހުންތަކާ ކުރިމަތިލާން ޖެހޭނެ ކަމަށް ބުނެފައެވެ.

ޒޯކް ބުނީ ކޮވިޑް-19 ގެ ސަބަބުން ކުލަބުތަކަށް މާލީ ގޮތުންނާއި އަދި އެނޫންވެސް ގޮތް ގޮތުން ގޮންޖެހުންތަކާ ކުރިމަތިލާން ޖެހިފައިވާ ކަމަށާއި، އެގޮތުން ބައެއް ކުލަބުތަކުގެ ކުޅުންތެރިން ކޮވިޑް-19 އަށް ޕޮޒިޓިވްވެ މެޗުތަކުގައި ނުކުޅެވޭކަން ފާހަގަވާ ކަމަށެވެ. އޭގެ ސަބަބުން އެ ކުލަބުތަކުގެ "ޕާފޯމަންސް" ދަށްވަމުން އަންނަ ކަމަށްވެސް ޒޯކް ބުންޏެވެ.

ޒޯކް މިހެން ބުނިއިރު، ޔުއެފާއިން އަންނަނީ މި ސީޒަނުގެ ޗެމްޕިއަންސް ލީގާއި ޔޫރޮޕާ ލީގު ކުރިޔަށް ގެންދިއުމުގެ ޕްލޭނެއް ތައްޔާރު ކުރަމުންނެވެ. އެގޮތުން ޔުއެފާއިން ބުނީ ކުރިއަށް އޮތް ހަފުތާއެއްހާ ދުވަހުގެ ތެރޭގައި އެ އިދާރާއިން ތައްޔާރުކުރާ ޕްލޭން ނިމޭނެ ކަމަށާއި، އަދި ޕްލޭން ކުރެވިފައިވާ ގޮތުން ޗެމްޕިއަންސް ލީގާއި ޔޫރޮޕާ ލީގުގެ މެޗުތައް ކުޅޭނީ ދަނޑަށް ސަޕޯޓަރުން ނުވައްދާ ކަމަށެވެ.

ޔޫރަޕުގެ ބޮޑު ފަސް ލީގުން އައު ސީޒަން ފަށާފައިވާއިރު، ޖަރުމަން ލީގާއި، އިޓާލިއަން ލީގުގެ އިތުރުން ފްރެންޗް ލީގުގެ މެޗުތައް ކުޅެމުން އަންނަނީ ވަކި އަދަދަކަށް ސަޕޯޓަރުން ދަނޑަށް ވައްދައިގެންނެވެ. އެކަމަކު އިނގިރޭސި ޕްރިމިއާ ލީގާއި ސްޕެނިޝް ލީގުގެ މެޗުތައް އަދިވެސް ކުޅެމުން އަންނަނީ ސަޕޯޓަރުންނާ ނުލައެވެ.