ސަންޗޯ ހޯދުމަށް ޔުނައިޓެޑުން އަދިވެސް މަސައްކަތް ކުރަނީ

އިންގްލެންޑުގެ ޒުވާން ފޯވާޑް ޖޭޑަން ސަންޗޯ ހޯދުމަށް މެންޗެސްޓާ ޔުނައިޓެޑުން އަދިވެސް މަސައްކަތް ކުރަމުން އަންނަ ކަމަށް ރިޕޯޓުތައް ބުނެފިއެވެ.

މީގެ ކުރިން މީޑިއާތަކުން ވަނީ އުމުރުން 20 އަހަރުގެ ސަންޗޯ 110 މިލިޔަން ޕައުންޑަށް ޔުނައިޓެޑަށް ވިއްކާލަން ޑޯޓްމުންޑުން އެއްބަސްވެފައިވާ ކަމަށް ރިޕޯޓުކޮށްފައެވެ. އެގޮތުން ޔުނައިޓެޑާއެކު ފަސް އަހަރުގެ އެއްބަސްވުމެއް ސަންޗޯ ހަދާނެ ކަމަށްވެސް ރިޕޯޓުކުރިއެވެ.

އެކަމަކު ކޮވިޑް-19 ގެ މި ދަނޑިވަޅުގައި 110 މިލިޔަން ޕައުންޑް ދެއްކުމަށް ޔުނައިޓެޑަށް ދަތިވާނެތީ، އެ ޑީލް މީގެ ކުރިން ހުއްޓުނެވެ. އެކަމަކު ޓްރާންސްފާ ބާޒާރު ބަންދުވަން ހަފުތާއަކަށް ވެފައިވާއިރު، ސަންޗޯ ހޯދުމުގެ މަސައްކަތުގައި ޔުނައިޓެޑުން ބަލި ގަބޫލުކުރަން ބޭނުންނުވާ ކަމަށް މީޑިއާތަކުން ދާދި ފަހުން ވަނީ ރިޕޯޓުކޮށްފައެވެ.

އެކަމަކު މީގެ ކުރިން ޑޯޓްމުންޑްގެ ސްޕޯޓިންގ ޑިރެކްޓަރު މައިކަލް ޒޯކް ވަނީ މި ސީޒަނުގައި ސަންޗޯ އެ ކުލަބުގައި ހިމަނަން ރާވާފައިވާ ކަމަށާއި، އެއީ ފަހުގެ ނިންމުން ކަމަށް ބުނެފައެވެ.

ސަންޗޯ ހޯދުމަށް ޔުނައިޓެޑުގެ އިތުރުން ޔޫރަޕްގެ ބޮޑެތި ކުލަބުތަކުންވެސް މަސައްކަތް ކުރަމުން އަންނައިރު، އޭނާ ވިދާލީ 2017 ވަނަ އަހަރު އިންޑިއާގައި ބޭއްވި 17 އަހަރުން ދަށުގެ ފީފާ ވޯލްޑް ކަޕުގައެވެ. އެ މުބާރާތުގެ ޗެމްޕިއަންކަން އިންގްލެންޑުން ހޯދިއިރު، އޭނާ ވަނީ މުބާރާތުގައި މޮޅު ކުޅުމެއް ދައްކާފައެވެ.

ޑޯޓްމުންޑުގެ ސީނިއާ ޓީމުގައި މިހާތަނަށް ތިން ސީޒަން ހޭދަކޮށްފައިވާ ސަންޗޯ ވަނީ އެ ކުލަބަށް 102 މެޗުގައި 35 ލަނޑު ކާމިޔާބުކޮށްފައެވެ. އަދި ވަނީ ޑޯޓްމުންޑާއެކު ޖަރުމަން ސުޕަ ކަޕް ކާމިޔާބުކޮށްފައެވެ.

މި ޓްރާންސްފާ ބާޒާރުގައި ޔުނައިޓެޑުން މިހާތަނަށް ބޮޑު ޚަރަދެއް ކޮށްފައިނުވާއިރު، އެ ޓީމުން މިހާތަނަށް ގެނައި ހަމައެކަނި ކުޅުންތެރިއަކީ އަޔަކްސްއަށް ކުޅެމުން އައި ނެދަލެންޑްސްގެ މިޑްފީލްޑަރު ޑޮނީ ވެން ޑަ ބީކެވެ.