ޔޫއޭއީ އިން ސެނިޓައިޒް ކުރަން ބޭނުން ކުރާ ދެ ޓްރަކް ހަދިޔާކޮށްފި
މިޓްރަކް ބޭނުންކުރާނީ މީހުން އެއްވެ އުޅޭ ސަރަހައްދުތައް ޑިސްއިންފެކްޓު ކުރުމަށް
ޔޫއޭއީ އިން ސެނިޓައިޒް ކުރަން ބޭނުން ކުރާ ދެ ޓްރަކް ހަދިޔާކުރުން
ޔުނައިޓެޑް އަރަބް އެމިރޭޓްސް (ޔޫއޭއީ) އިން ސެނިޓައިޒް ކުރަން ބޭނުން ކުރާ ދެ ޓްރަކް ދިވެހިރާއްޖެ އަށް ހަދިޔާކޮށްފިއެވެ.
ފޮރިން މިނިސްޓަރު އަބްދުﷲ ޝާހިދު މިއަދު ކުރެއްވި ޓުވީޓެއްގައި ވަނީ މި ޓްރަކް ހަދިޔާ ކުރުމާ ގުޅިގެން ޔޫއޭއީ އަށް ޝުކުރު ދަންނަވާ އަދި މިއާއެކު، ކޮވިޑް-19 އާއި ދެކޮޅަށް ކުރަމުންދާ މަސައްކަތް އިތުރަށް ވަރުގަދަ ކުރެވޭނެ ކަމަށް ވިދާޅުވެފައެވެ.
ޔޫއޭއީން ހަދިޔާ ކުރެއްވި ދެ ޓްރަކް ބޭނުން ކުރުމަށް ހަމަޖެހިފައި ވަނީ މީހުން އެއްވެ އުޅޭ ސަރަހައްދުތައް ޑިސްއިންފެކްޓު ކުރުމަށެވެ.
ރާއްޖެއަށް ޔޫއޭއީ އިން ވަނީ މީގެ ކުރިން ވެސް އެހީ ފޯރުކޮށްދީފައެވެ. އެގޮތުން ޔޫއޭއިން ވަނީ ފަސް މިލިއަން ޑޮލަރުގެ އަގު ހުރި މެޑިކަލް އިކުއިޕްމަންޓް އެއް މީގެ ކުރިން ހަދިޔާ ކުރައްވާފައެވެ.
ރާއްޖެއިން ކޮވިޑް-19އާއި ދެކޮޅަކަށް ކުރާ މަސައްކަތްތަކަށް ދުނިޔޭގެ އެކި ގައުމުތަކުން އަންނަނީ އެކި އެކި ގޮތްގޮތުން އެހީތެރިވެދެއްވަމުންނެވެ.
ސެނެޓައިޒް ކުރުމަށް ބޭނުން ކުރާ މިދެ ޓްރަކް މިހާރު އޮތީ ހުޅުމާލޭގައެވެ.
