ފަހު ވަގުތު ފެނާންޑޭސް ކާމިޔާބުކުރި ޕެނަލްޓީން ޔުނައިޓެޑަށް މޮޅެއް

ފަހު ވަގުތު ބްރޫނޯ ފެނާންޑޭސް ކާމިޔާބުކުރި ޕެނަލްޓީން ބްރައިޓަން އަތުން މެންޗެސްޓާ ޔުނައިޓެޑް ހަނި މޮޅެއް ހޯދައިފިއެވެ.

އިނގިރޭސި ޕްރިމިއާ ލީގުގައި ހޮނިހިރު ދުވަހުގެ ހަވީރު ކުޅުނު މެޗުން ބްރައިޓަން އަތުން ޔުނައިޓެޑް މޮޅުވީ 3-2 ގެ ނަތީޖާއަކުންނެވެ.

ބްރައިޓަނުގެ ދަނޑުގައި ކުޅުނު މި މެޗުގެ ކުރީކޮޅު އެ ޓީމުން މޮޅު ކުޅުމެއް ދެއްކިއިރު، ބްރައިޓަންގެ ލެއަންޑްރޯ ޓްރޮސާޑް ވަނީ ނުރައްކާތެރި ދެ ހަމަލާއެއް ފޮނުވާލާފައެވެ. އެކަމަކު އޭރިއާ ބޭރުން އޭނާ ފޮނުވާލި ދެ ހަމަލާވެސް އަމާޒުވީ ގޯލުގެ ދަނޑިއަށެވެ.

މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ބްރައިޓަނުންނެވެ. މެޗުގެ 40 ވަނަ މިނެޓުގައި ލިބުނު ޕެނަލްޓީއަކުން ބްރައިޓަނަށް ލީޑު ނަގައިދިނީ ނީލް މޯޕޭއެވެ. މިއީ އޭރިއާ ތެރެއިން ބްރައިޓަނުގެ ތާރިގް ލަމްޓީއަށް ޔުނައިޓެޑުގެ ފެނާންޑޭސް ކުރި ފައުލަކަށް ރެފުރީ ދިން ޕެނަލްޓީއެކެވެ. އެކަމަކު ބްރައިޓަނަށް ލީޑު ހިފަހައްޓާލެވުނީ ތިން މިނެޓަށެވެ. މެޗުގެ 43 ވަނަ މިނެޓުގައި ޔުނައިޓެޑުން ނަތީޖާ އެއްވަރުކުރިއިރު، މި ލަނޑަކީ ބްރައިޓަނުގެ ކެޕްޓަން ލެވިސް ޑަންކް އަތުން ބައިކޮޅަށް ވަން ލަނޑެކެވެ.

މެޗުގެ ދެވަނަ ހާފު ފަށައިގެން ދެވަނަ މިނެޓުގައި ބްރައިޓަނުގެ އާރޮން ކޮނޮލީއަށް އޭރިއާ ތެރެއިން ޔުނައިޓެޑްގެ ޕައުލް ޕޮގްބާ ފައުލް ކުރި ކަމަށް ނިންމާ ރެފުރީ ވަނީ ބްރައިޓަނަށް ޕެނަލްޓީއެއް ދީފައެވެ. އެކަމަކު ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ރެފުރީ ވަނީ އެ ޕެނަލްޓީ ނުދޭން ނިންމާފައެވެ.

އަދި މެޗުގެ 52 ވަނަ މިނެޓުގައި ޔުނައިޓެޑުގެ މާކަސް ރަޝްފޯޑް ލަނޑެއް ކާމިޔާބުކުރި ނަމަވެސް، ރަޝްފޯޑް އޮފްސައިޑުގައި ހުރުމުން ވީއޭއާރުން ވަނީ އެ ލަނޑު ބާތިލުކޮށްފައެވެ. އެކަމަކު އޭގެ ތިން މިނެޓު ފަހުން ރަޝްފޯޑް ވަނީ ޔުނައިޓެޑަށް މެޗުގައި ލީޑު ނަގާފައެވެ.

އޭގެ ފަހުން މެޗުގެ 60 ވަނަ މިނެޓުގައި ބްރައިޓަނުގެ ސޮލީ މާޗަށް ވަނީ ނަތީޖާ އެއްވަރުކުރަން މުޅިން ހުސް ފުރުސަތެއް ލިބި ބޭކާރުވެފައެވެ. އޭރިއާ ތެރެއިން ހުހަށްހުރެ އޭނާ ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ. އަދި މެޗުގެ 76 ވަނަ މިނެޓުގައި ޓްރޮސާޑް ފޮނުވާލި އިތުރު ހަމަލާއެއްވެސް ވަނީ ގޯލުގެ ހުރަސް ދަނޑިއަށް އަމާޒުވެފައެވެ.

މެޗުގައި މޮޅު ކުޅުމެއް ދެއްކި ބްރައިޓަނުން ނަތީޖާ އެއްވަރުކުރީ އިތުރު ވަގުތުގެ ފަހު މިނެޓުގައެވެ. އަލީރިޒާ ޖަހަންބަޚްޝް ހުރަސްކޮށްދިން ބޯޅައަކުން މި ލަނޑު ބްރައިޓަނަށް ކާމިޔާބުކޮށްދިނީ މާޗެވެ. އެކަމަކު އޭގެ ސިކުންތުކޮޅެއް ފަހުން އޭރިއާ ތެރެއިން ބްރައިޓަނުގެ މޯޕޭ އަތުގައި ބޯޅަ ޖެހުނުއިރު، ރެފުރީ ވަނީ މެޗު ނިންމަން ކަށިގަނޑު ފުމެފައެވެ. ނަމަވެސް ވީއޭއާރް ބެލުމަށްފަހު ރެފުރީ ވަނީ ޔުނައިޓެޑަށް ޕެނަލްޓީއެއް ދީފައެވެ. މި ޕެނަލްޓީ ކާމިޔާބުކޮށް މި މެޗުން ޔުނައިޓެޑަށް ތިން ޕޮއިންޓު ކަށަވަރުކޮށްދިނީ ފެނާންޑޭސްއެވެ.

މި މޮޅާއެކު ޔުނައިޓެޑް އޮތީ ތާވަލުގެ 13 ވަނައިގައި ދެ މެޗުން ތިން ޕޮއިންޓާއެކުއެވެ. ޔުނައިޓެޑް އަތުން ބަލިވި ބްރައިޓަން އޮތީ ތާވަލުގެ 10 ވަނައިގައި ތިން މެޗުން ތިން ޕޮއިންޓާއެކުއެވެ.