ލުއި ދޭން އަދި އަވަސް، އާންމު ހާލަތަށް ރުޖޫއަ ވެވޭނީ ވެކްސިނެއް ލިބިގެން!

ކޮވިޑް ރޯގާ ފެތުރުން ހުއްޓުވުމުގެ ގޮތުން އަޅާފައިވާ ފިޔަވަޅުތަކަށް ލުއި ދޭން އަދި މާ އަވަސް ކަމަށް ހެލްތް ޕޮރެޓެކްޝަން އެޖެންސީ (އެޗްޕީއޭ) ގެ ކޮންސަލްޓަންޓް ޑރ. ޝީނާ މޫސާ ވިދާޅުވެއްޖެއެވެ.

ބުރާސްފަތި ދުވަހުގެ ރޭ ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ) ގައި ބޭއްވި ނޫސްވެރިންގެ ބައްދަލުވުމެއްގައި ޑރ. ޝީނާ ވިދާޅުވީ މިހާރު އަޅާފައިވާ ފިޔަވަޅުތަކާ އެކު، ބަލި ފެތުރޭ މިންވަރު "ގްރީޏް ޒޯން" ގައި ބަހައްޓަން މުހިއްމު ކަމަށެވެ. އަދި ބަލީގެ އިންކިއުބޭޝަން ޕީރިއަޑް (14 ދުވަސް) ގްރީން ޒޯނުގައި ބަހައްޓައިގެން މެނޭޖްކުރެވިއްޖެނަމަ، ބަލި ފެތުރޭ މިންވަރު ދަށްވެގެން ދާނެ ކަމަށްވެސް ވިދާޅުވިއެވެ.

ސަތޭކައިން މަތިން ޕޮޒިޓިވް ކޭސްތައް ރިޕޯޓްކުރާތާ މަސް ދުވަހަށް ފަހު، އެ އަދަދު ސަތޭކައިން ދަށަށް ގޮސްފައިވަނީ ނިމިދިޔަ ހަފުތާގެ ތެރޭގައެވެ. އަދި މިހާރު އެވަރެޖްކޮށް ފެންނަ ކޭސްތަކުގެ އަދަދު ވަނީ ވަރަށް ބޮޑަށް ދަށަށް ގޮސްފައެވެ. އެޗްޕީއޭއިން ކުރިން ބުނެފައިވަނީ، އަޅާފައިވާ ފިޔަވަޅުތަކަށް ލުއިދެވޭނީ ބަލީގެ އާރްއޯ (ފެތުރޭ މިންވަރު) އެކަކަށް ވުރެ ދަށްކުރެވިގެން ކަމަށެވެ.

ޑރ. ޝީނާ އިތުރަށް ވިދާޅުވީ ކުރީގެ އާންމު ހާލަތަށް ރުޖޫއަވެވޭނީ ވެކްސިނެއް ލިބިގެން ކަމަށް ވިދާޅުވެފައެވެ. އެގޮތުން، ރައްކާތެރިކަމުގެ ފިޔަވަޅުތަކާ އެކުގައި ވެސް ކުރީގެ އާންމު ހާލަތަށް ދެވޭނީ، ވެކްސިނެއް ލިބިގެން ކަމަށް ގަބޫލުކުރައްވާ ކަމަށް ވިދާޅުވިއެވެ. އެންމެފަހުގެ ލަފާކުރުންތަކަށް ބަލާއިރު، ވެކްސިނެއް އެންމެ އަވަހަށް ވެސް ލިބޭނީ މި އަހަރުގެ ނޮވެމްބަރު މަހުގައެވެ.

މި ނުރައްކާތެރި ރޯގާއަށް ވެކްސިނެއް ހޯދުމުގެ މަސައްކަތް ކުރިއަށް ގޮސްފައިވާ ވަރަށް ބަލާއިރު، ހިއުމަން ޓްރަޔަލް މަރުހަލާގައި ނުވަ ވެކްސިނެއް އަންނަނީ ޓެސްޓް ކުރަމުންނެވެ. މިހާތަނަށް އެއްވެސް ވެކްސިނެއް ބޭނުންކުރުމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން ހުއްދަދީފައި ނުވީނަމަވެސް، ބައެއް ގައުމުތަކުން އަންނަނީ އެކްސްޕެރިމެންޓަލް ވެކްސިންތައް ބޭނުންކުރަން ފަށާފައެވެ.

އިންސާނުންގެ ގަޔަށް ޖަހައިގެން ކުރާ ޓެސްޓް (ހިއުމަން ޓްރަޔަލް) މަރުހަލާ ކާމިޔާބު ވެއްޖެނަމަ، ވީހާވެސް އަވަހަކަށް ވެކްސިން ޑޯޒްތައް އުފެއްދުމުގެ މަސައްކަތް ފަށާ، ވެކްސިން ފޯރުކޮށްދޭނެ ކަމުގެ ޔަގީންކަން ފާމަސޫޓީކަލް ކުންފުނިތަކުން ވަނީ ދީފައެވެ. އެގޮތުން، ފުޅާ ދާއިރާއެއްގައި ވެކްސިން އުފައްދަން ވާންޖެހޭ ހުރިހާ ތައްޔާރީތަކެއް ވެފައިވާ ކަމަށް އެ ކުންފުނިތަކުން ވަނީ ހާމަކޮށްފައެވެ.