ހޯނޑެއްދޫ އިން އިތުރު މީހަކު ޕޮޒިޓިވްވެ ޖުމްލަ އަދަދު 45ށް
ބުދަ ދުވަހު ޕޮޒިޓިވްވީ 1 މީހަކު
ގދ. ހޯނޑެއްދޫގައި ބަލިން ރައްކާތެރިވުމުގެ މައުލޫމާތު ހިމެނޭ ބެނާތައް އާންމު ތަންތަނުގައި ހަރުކުރަނީ
ގދ. ހޯނޑެއްދޫ އިން އިތުރު މީހަކު ޕޮޒިޓިވްވެފައިވާ ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ ބުދަ ދުވަހު ހޯނޑެއްދޫ އިން އިތުރު މީހަކު ޕޮޒިޓިވެފައިވަ ކަމަށާއި، އެރަށުން މިހާތަނަށް 45 މީހަކު ޕޮޒިޓިވްވެފައިވާ ކަމަށެވެ. ނަމަވެސް މިހާތަނަށް އެ ރަށުން 34 މީހަކު ބަލިން ރަނގަޅުވެފައިވާ ކަމަށެ އެވެ.
އެޗްޕީއޭގެ ތަފާސް ހިސާބުތައް ދައްކާގޮތުން އެރަށުގެ އެކްޓިވް ކޭސްގެ އަދަދަކީ 11އެވެ. އެޗްއީއޯސީން ހާމަކޮށްފައިވާ މައުލޫމާތުތަކަށް ބަލާ އިރު، އެރަށުން ޕޮޒިޓިވްވި މީހުންގެ ތެރެއިން ޚާއްސަ ފަރުވާއަށް ބޭނުންވާ 2 މީހަކަށް ގއ. ވިލިނގިލީ ކޮވިޑް ފެސިލިޓީގައި ދަނީ ފަރުވާދެމުންނެވެ. މީގެ ކުރިން ވެސް އެރަށު 2 މީހަކަށް ވިލިނގިލި ފެސިލިޓީގައި ވަނީ ފަރުވާ ދީފައެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ ވިދާޅުވީ ހޯނޑެއްދޫން މިހާތަނަށް 230 މީހަކު ކޮންޓެކްޓުންގެ ގޮތުގައި ފާހަގަކުރެވިފައިވާ ކަމަށެވެ. އަދި އެތަނުން ބައެއް މީހުން ކަރަންޓީން ކޮށްފައިވާ އިރު، އެރަށުގައި ހަރަކާތްތެރިވާ މެޑިކަލް ޓީމުން ގެތަކަށް ވިޒިޓްކުރި އިރު، ބަލީގެ އަލާމާތްތައް ހުރި ބައެއް މީހުން ފެނިފައިވާތި އިތުރު ސާމްޕަލްތަކެއް ވަނީ ނަގާފައެވެ.
މާލެ ފިޔަވައި އެންމެ ގިނަ ކޭސްތައް ފެނިފައިވަނީ ހޯނޑެއްދޫ އިންނެއެވެ. ޖުމްލަ 45 ކޭސް ފެނިފައިވާ އިރު، އެރަށުގައި ކޮންޓެކްޓުންގެ ގޮތުގައި ވެސް 250ށް ވުރެ ގިނަ މީހުން މިހާތަނަށް ވަނީ ފެނިފައެވެ. އެ ރަށުން އެންމެ ފުރަތަމަ ޕޮޒިޓިވްވީ ހޯމް ކަރަންޓީގައި ހުރި މީހެކެވެ.
