ކޭސްތައް މަދުވި ނަމަވެސް ގްރީން ޒޯނަށް ނުދޭ، ފިޔަވަޅުތަކަށް ލުއި ދިނުން ރައްކާތެރިއެއް ނޫން: ޑރ. ޝީނާ
އަންލިންކް ކްލަސްޓަރތަކާއި އަންލިންކް ކޭސްތައް މަދު
ބުރާސްފަތި ދުވަހު އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގެ ތެރެއިން
ރާއްޖޭގައި ކޮވިޑް-19ށް ޕޮޒިޓިވްވާ ކޭސްތައް މަދުވި ނަމަވެސް ގްރީން ޒޯނަށް އަދިވެސް ނުދާ ކަމަށާއި، ރައްކާތެރިކަމުގެ ފިޔަވަޅުތަކަށް ލުއި ދިނުމަކީ ރައްކާތެރިކަމެއް ނޫން ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ކޮންސަލްޓެންޓް ޑރ. ޝީނާ މޫސާ ވިދާޅުވެއްޖެ އެވެ.
ބުރާސްފަތި ދުވަހު ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ޑރ.ޝީނާ ވިދާޅުވީ އަންލިންކް ކްލަސްޓަރތަކާއި އަންލިންކް ކޭސްތައް މަދުވާ ކަމަށެވެ. ނަމަވެސް އަދިވެސް ދަށްކުރަން ބޭނުންވާ ހިސާބަށް ދަށް ނުވާ ކަމަށާއި، މިދަނޑިވަޅުގައި ރައްކާތެރިކަމަށް އަޅާފައިވާ ފިޔަވަޅުތަކަށް ކުޑަކޮށް ވެސް ފަރުވާ ކުޑަކޮށްގެން ނުވާނެ ކަަމަށް ޑރ. ޝީނާ ވިދާޅުވިއެވެ.
އިންޑިކޭޓަރސްތަކަށް ބަލާއިރު އަދިވެސް ހުރީ މަތީގައިކަން ފާހަގަކުރައްވައި ޑރ. ޝީނާ ވިދާޅުވީ މަޒީން ފިލާވަޅު ލިބިގަންނަން ޖެހޭ ކަމަށެވެ. މިހާރު އަޅާފައިވާ ފިޔަވަޅުތަކަށް ލުއިދީ ކުރިން އުޅުނު ގޮތަށް އުޅެން ފަށައިފިނަމަ ބަލި ފެތުރިގެން ހިނގާދާނެ ކަމަށް ޑރ. ޝީނާ ވިދާޅުވިއެވެ.
ޑރ. ޝީނާ ވިދާޅުވީ ކުރިއަށް އޮތްތަނުގައި ބަލި ފެތުރޭ މިންވަރަށް ބަލާ ބައެއް ހަރާކާކަތްތައް ކުރިއަށް ގެންދިއުމަށް ހުއްދަ ދިން ނަމަވެސް ކޮވިޑް-19ގެ ވެކްސިން އެއް ލިބެންދެން ދިރިއުޅުމުގެ ވައްޓަފާޅު ބަހައްޓަންޖެހޭނީ ނިއު ނޯރމަލްއާ އެއްގޮތަށް ކަމަށެވެ.
