ޕީއެސްޖީގެ ރައީސްގެ މައްޗަށް ޖަލު ހުކުމެއް އިއްވަން އެދެފި
24 ސެޕްޓެމްބަރު 2020 | ބުރާސްފަތި 16:43ނާސިރު ޓީވީ ރައިޓްސް ނެގުމުގައި ފީފާގެ ވަލްކޭއަށް ރިޝްވަތު ދީފައިވާ ކަމަށް ވަނީ ތުހުމަތު ކޮށްފައި
ޕީއެސްޖީގެ ރައީސް ނާސިރު އެލް-ޚެއްލާފީ
ޕީއެސްޖީގެ ރައީސް ގަތަރުގެ ވިޔަފާރިވެރިޔާ ނާސިރު އެލް-ޚެއްލާފީގެ މައްޗަށް ސްވިޒަލެންޑުގެ ޕްރޮސެކިއުޓަރުން އުފުލާފައިވާ ކޮރަޕްޝަނުގެ ދައުވާގައި އޭނާގެ މައްޗަށް ޖަލު ހުކުމެއް އިއްވަން ކޯޓުގައި ޕްރޮސެކިއުޓަރުން އެދިއްޖެއެވެ.
ސްވިޒަލެންޑުގެ ޕްރޮސެކިއުޓަރުން ނާސިރުގެ މައްޗަށް އުފުލާފައިވާ ދައުވާއަކީ ޓީވީ ރައިޓްސް ނެގުމުގައި ފީފާގެ ކުރީގެ ޖެނެރަލް ސެކްރެޓަރީ ޖެރޯމް ވަލްކޭއަށް ރިޝްވަތު ދީފައިވާ ކަމަށް ބުނެ އުފުލާފައިވާ ދައުވާއެކެވެ.
ވަލްކޭ މިވަގުތުވެސް ހުރީ ކޮރަޕްޝަނުގެ ބޮޑު މައްސަލައެއް ސާބިތުވެ ސަސްޕެންޝަނެއްގައެވެ. ސްވިޒަލެންޑުގެ ޕްރޮސެކިއުޓަރުން ވިދާޅުވީ، ވަލްކޭ އާއި ޕީއެސްޖީގެ ރައީސް ނާސިރު އަދި އެހެނިހެން ވިޔަފާރިވެރިންތަކެއް ގުޅިގެން ފީފާ ވޯލްޑް ކަޕްގެ ޓީވީ ރައިޓްސް ނަހަމު ގޮތުގައި ބޭނުން ކޮށްފައިވާ ކަމަށެވެ.
ސްވިސް ފެޑެރަލް ކޯޓު އޮފް ބެލިންޒޯނާއިން ޕީއެސްޖީގެ ރައީސްއަށް ކޮށްފައިވާ ދައުވާތަކުގެ ތެރޭގައި ގަތަރުގެ ބެއިން ސްޕޯޓްސްއަށް ވޯލްޑް ކަޕްގެ ޓީވީ ރައިޓްސް ހޯދުމުގައި ވަލްކޭއަށް ރިޝްވަތު ދިނުމުގެ ދައުވާ އާއި، ޕީއެސްޖީ ރައީސްގެ ގޮތުގައި ހުރެ ޔުއެފާ އެގްޒެކުޓިވް ބޯޑް މެންބަރެއްގެ ހައިސިއްޔަތު ބެނުންކޮށް ބާރާއި ނުފޫޒު ބޭނުންކޮށް މަންފާއެއް ހޯދުމުގެ ދައުވާއެވެ.
ސްވިޒަލެންޑުގެ ޕްރޮސެކިއުޓަރުން ނެރުނު ބަޔާނެއްގައި ބުނީ މި މައްސަލަ ތިން އަހަރު ވަންދެން ތަހުގީގުކޮށްފައިވާ ކަމަށާއި، އެގޮތުން މި މައްސަލައިގައި ޕީއެސްޖީގެ ރައީސް ނާސިރާ ދެކޮޅަށް ގިނަ ހެކިތަކެއް ލިބިފައިވާ ކަމަށެވެ. އަދި މި މައްސަލައިގައި ފުރަތަމަ ކުރިއަށްދިޔަ އަޑު އެހުމުގައި ޕްރޮސެކިއުޓަރުން ވަނީ ނާސިރުގެ މައްޗަށް 28 މަސް ދުވަހުގެ ޖަލު ހުކުމެއް އިއްވުމަށް އެދެފައެވެ. ސަބަބެއް ގޮތުގައި ޕްރޮސެކިއުޓަރުން ފާހަގަ ކޮށްފައިވަނީ ނާސިރު މިވަގުތުވެސް ބާރާއި ނުފޫޒުން ފުޓްބޯޅައިގެ ތެރޭގައި ހަރަކާތްތެރިވަމުން އަންނާތީއެވެ. އަދި މި މައްސަލައިގައި ހެކި ނައްތާލުމަށް ނަސީރު މަސައްކަތް ކޮށްފާނެ ކަމަށްވެސް ވަނީ ތުހުމަތު ކޮށްފައެވެ.
