މަސްދޯންޏެއްގައި ހުރި މީހެއްގެ ލޮލަށް ބުޅިއެއް ހެރިގެން އެމްއެންޑީއެފް އިން ހަރަކާތްތެރިވާން ފަށައިފިއެވެ.

އެމްއެންޑީއެފުން ބުނީ ކ. ދިއްފުށީ ކަނޑުފަތީގެ އިރުން 26 ނޯޓިކަލް މޭލު ބޭރުން މަސްވެރިކަަމުގައި އުޅުނު "އަޒުމް" ދޯނީގައި ހުރި 40 އަހަރުގެ ދިވެހި ފަޅުވެރިއެއްގެ ލޮލަށް ބުޅިއެއް ހެރިގެން ރިޕޯޓު ކޮށްފައިވާ ކަމަށެވެ. އަދި އެމީހާއަށް ސިއްހީ އަވަސް ފަރުވާ ފޯރުކޮށް ދިނުމުގެ މަސައްކަތް ކުރަމުންދާ އެމްއެންޑީއެފް މާލެ އޭރިޔާ ކޯސްޓްގަރޑް ސްކޮޑްރަން އިން ކުރަމުންދާ ކަމަށެވެ.

މި ހާދިސާގެ ރިޕޯޓު ލިބިފައިވަނީ އަންގާރަ ދުވަހުގެ 16:20 ހާއިރެވެ.

އަންގާރަ ދުވަހު 40 އަހަރުގެ މީހެއްގެ ލޮލަށް ބުޅިއެއްހެރި އަނިޔާވެފައިވާއިރު، ހޯމަ ދުވަހު ވެސް 65 އަހަރުގެ ދިވެހި ފިރިހެނެއްގެ ލޮލަށް ބުޅިއެއް ހެރިގެން އަވަސް ފަރުވާއަށް މާލެ ގެނެސްފައިވެއެވެ.

ކަނޑުމަތީގައި މިފަދަ ހާދިސާތައް ގިނަވަމުންދާއިރު، ޚާއްސަ ސަމާލުކަމެއް ދިނުމަށް ކަމާ ބެހޭ ފަރާތްތަކުން މީގެ ކުރިން ވެސް އިލްތިމާސް ކޮށްފައިވެއެވެ.