އިބްރަހިމޮވިޗުގެ ދެ ލަނޑާއެކު މިލާނަށް މޮޅެއް

ސްވިޑެން ފޯވާޑް ޒްލަޓާން އިބްރަހިމޮވިޗް ކާމިޔާބުކުރި ދެ ލަނޑާއެކު އައު ސީޒަނުގެ އިޓާލިއަން ލީގުގައި އޭސީ މިލާނުން ކުޅުނު ފުރަތަމަ މެޗުން މޮޅުވެއްޖެއެވެ.

ލީގުގައި ހޯމަ ދުވަހުގެރޭ ކުޅުނު މެޗުން މިލާން މޮޅުވީ ބޮލޯނިއާ އަތުން 2-0 ގެ ނަތީޖާއަކުންނެވެ.

މިލާންގެ ދަނޑުގައި ކުޅުނު މި މެޗުގައި އެޓީމުން ރަނގަޅު ކުޅުމެއް ދެއްކިއިރު، މެޗުގެ ފުރަތަމަ ހާފުގައި އެޓީމުން ވަނީ ލީޑު ނަގާފައެވެ. ތިއޯ ހެނާންޑޭޒްގެ އެހީއާއެކު މެޗުގެ 35 ވަނަ މިނެޓުގައި މި ލަނޑު މިލާނަށް ކާމިޔާބުކޮށްދިނީ އިބްރަހިމޮވިޗެވެ.

އަދި މި މެޗުގައި މިލާނުން ލީޑު ފުޅާކޮށްފައިވަނީ ދެވަނަ ހާފު ފަށައިގެން ފަސްވަނަ މިނެޓުގައި ޕެނަލްޓީއަކުން އިބްރަހިމޮވިޗް ކާމިޔާބުކުރި ލަނޑުންނެވެ. މިއީ އޭރިއާ ތެރެއިން މިލާނުގެ އިސްމާއިލް ބިނަޝްރީއަށް ބޮލޯނިއާގެ ރިކާޑޯ އޮސޮލީނީ ކުރި ފައުލަކަށް ރެފުރީ ދިން ޕެނަލްޓީއެކެވެ.

މި މެޗުގައި އުމުރުން 38 އަހަރުގެ އިބްރަހިމޮވިޗް ދެ ލަނޑު ޖެހިއިރު، 1999 ވަނަ އަހަރު ފުޓްބޯޅަ ކެރިއަރު ފެށި އިބްރަހިމޮވިޗް މިހާރު ވަނީ މިހާތަނަށް ކުޅުނު 22 ސީޒަނުގައިވެސް ލަނޑު ޖަހާފައެވެ.

މިދިޔަ އަހަރުގެ ޑިސެމްބަރު މަހުގެ ފަހުކޮޅު މިލާނާ ގުޅުނު އިބްރަހިމޮވިޗް އެފަހަރު މިލާނުގެ އެއްބަސްވުން ހެދީ މިދިޔަ ސީޒަނުގެ ނިޔަލަށެވެ. އެކަމަކު މިދިޔަ ސީޒަނުގައިވެސް އިބްރަހިމޮވިޗް މޮޅު ކުޅުމެއް ދެއްކުމުން، މިލާނުން ވަނީ އިބްރަހިމޮވިޗުގެ އެއްބަސްވުން އިތުރު އެއް އަހަރަށް އާކޮށްފައެވެ.

އައު ސީޒަނުގެ އިޓާލިއަން ލީގުގައި ކުޅުނު ފުރަތަމަ މެޗުން މިލާން މޮޅެއް ހޯދިއިރު، ލީގުގައި ދެން އެޓީމުން މެޗެއް ކުޅޭނީ އަންނަ އާދީއްތަ ދުވަހުގެރެއެވެ. އެރޭ ރަށުން ބޭރުގައި މިލާން ނުކުންނާނީ ކްރޮތޯނޭއާ ދެކޮޅަށެވެ.