މާރުކޭޓްގައި ބިދޭސީން ގެންގުޅޭ މައްސަލަ ވަރަށް ބޮޑަށް ކޮންޓްރޯލް ކުރެވިއްޖެ: ސިޓީ ކައުންސިލް
21 ސެޕްޓެމްބަރު 2020 | ހޯމަ 17:01ގޮޅިތަކުގެ ވެރިންނާއެކު އެއްބަސްވީ ބިދޭސީ ނުބޭތިއްބުމަށް: ޝަމާއު
މާރުކޭޓް ގޮޅިއެއްގައި މިހާކު ހަރަކާތްތެރިވަނީ
މާލޭގެ މާރުކޭޓްގައި ހުންނަ ގޮޅިތަކުގައި ބިދޭސީން ގެންގުޅުން މަނާކުރި ކުރުމާއިއެކު މާރުކޭޓްގައި ބިދޭސީން ގެންގުޅޭ މައްސަލައަށް ވަރަށް ބޮޑު ހައްލެއް ލިބިފައިވާކަމަށް މާލެ ސިޓީ ކައުންސިލުން ބުނެފިއެވެ.
''ރާއްޖެ.އެމްވީ'' އަށް ވާހަކަދައްކަވަމުން މާލެ ސިޓީ ކައުންސިލްގެ ޑެޕިއުޓީ މޭޔަރު ޝަމާއު ޝަރީފް ވިދާޅުވީ، ކޮވިޑް-19 އާ ގުޅިގެން މާރުކޭޓްތައް ބަންދުކޮށްފައި އޮތުމަށްފަހު ހުޅުވާލިއިރު މާރުކޭޓްތަކުގެ ވެރިންނާއެކު އެންމެ ބޮޑު އެއްބަސްވުމަކަށް އާދެވުނީ، އެއްވެސް ގޮތުގައި ބިދޭސީން ނުބޭތިއްބުމަށް ކަމަށެވެ. ޝަމާއު ވިދާޅުވީ، އެގޮތަށް އަމަލުކުރަމުންދޭތޯ ސިޓީ ކައުންސިލުން މިހާރުވެސް ބަލަމުންދާނެ ކަމަށާއި، އަދި އެއާ ހިލާފަށް އަމަލުކުރާ ފަރާތްތަކާއި މެދު ފިޔަވަޅުވެސް އަޅަމުންދާ ކަމަށެވެ.
އަލުން މާރުކޭޓް ހުޅުވާލުމަށްފަހު ސިޓީ ކައުންސިލުން އަންނަނީ ކޮންމެ ހަފްތާއަކު އެއް ފަހަރު މާރުކޭޓް ސާފުކޮށް ޑިސްއިންފެކްޓް ކުރަމުންނެވެ. ނަމަވެސް ޝަމާއު ވިދާޅުވީ، ކައުންސިލްގެ ގިނަ އަދަދެއްގެ ބަޔަކުވެސް ކޮވިޑް-19 އަށް ޕޮޒިޓިވްވުމާއި ގުޅިގެން މިހާރު ކޮންމެވެސް ވަރަަކަށް މަސައްކަތް މަޑުޖެހިފައިވާ ކަމަަށެވެ. އެކަމަކު އެ މަސައްކަތްވެސް ކުރިޔަށްދާނެކަން އޭނާ ފާހަގަކުރެއްވިއެވެ.
ކޮވިޑް-19 ގެ ހާލަތާއި ގުޅިގެން މާރުކޭޓްއަށް އެއް ފަހަރާ ވަދެވޭ މީހުންގެ އަދަދާއި ރައްކާތެރިކަމުގެ ގޮތުން އަމަލުކުރަންޖެހޭ ގޮތްތައް ފެންނަ ގޮތަށް ބޯޑުތަކުގެ އިތުރުން ނިޝާންތައް ވަނީ ހަރުކޮށްފައެވެ. ނަމަވެސް މާރުކޭޓް ސަރަހައްދުގައި ގައިދުރު ކަމެއް ނެތްތަން ފެނެއެެވެ. މާރުކޭޓް ސަަރަހައްދަކީ މާލެއިން އެންމެ ގިނައިން ކޭސްތައް ފެނުނު އެއް ސަރަހައްދެވެ.
