ސަފާރީ ބޯޓްތަކުގެ ދަތުރުތައް ދަނީ މަޑުމަޑުން ފުޅާވަމުން: ބޯޓިން އެސޯސިއޭޝަން
މިހާތަނަށް 101 ސަފާރީ ބޯޓް ހުއްދަ ނަގާފައިވޭ
ސަފާރީ ބޯޓްތަކުގެ ދަތުރުތައް ދަނީ މަޑުމަޑުން ފުޅާވަޅުން
މުޅި ދުނިޔެއަށް ކުރިމަތިވެފައިވާ ކޮވިޑްގެ ބަލިމަޑުކަމާއި އެކު ހުއްޓިފައިވާ ފަތުރުވެރިކަމުގެ ސިނާއަތުގައި، ސަފާރީ ބޯޓްތަކުގެ ދަތުރުތައް ދަނީ މަޑުމަޑުން ފުޅާވަމުން ކަމަށް ބޯޓިން އެސޯސިއޭޝަން އޮފް މޯލްޑިވްސް އިން ބުނެފިއެވެ.
ރާއްޖެއެމްވީއާއި ވާހަކަ ދައްކަވަމުން ބޯޓިން އެސޯސިއޭޝަން އޮފް މޯލްޑިވްސްގެ ނައިބް ރައީސް އިސްމާއިލް ހަމީދު (އިއްސެ) ވިދާޅުވީ ސަފާރީ ބޯޓްތަކުގެ ދަތުރުތައް ދަނީ މަޑުމަޑުން ފުޅާވަމުން ކަމަށާއި އަންނަ މަހުގެ 15ގައި ރާއްޖޭގެ ބޯޑަރު ހުޅުވާލާއިރު މިކަމަށް ވާންޖެހޭ ތައްޔާރީ ވުމަށް މިހާރު މަސައްކަތް ފަށާފައިވާ ކަމަށެވެ.
އެގޮތުން މިހާތަނަށް 101 ސަފާރީ ބޯޓް ހުއްދަ ނަގާފައިވާއިރު، ކޮވިޑާއި ގުޅިގެން މިދުވަސްވަރު އެންމެ މުހިއްމު ކަމެއްދީގެން މަޝްވަރާ ކުރަމުން ދަނީ ސަފާރީ ބޯޓްތައް ދަތުރު ކުރާ ސަރަހައްދުތަކުން ޕީސީއާރު ޓެސްޓް ހެދޭނެ އިންތިޒާމް ހަމަޖެއްސުމަށް ކަމަށެވެ.
އެގޮތުން މިހާތަނަށް އައި އިރު އައްޑޫ ސިޓީ، ރަސްދޫ ކައުންސިލް، ތޮއްޑޫ ކައުންސިލް އަދި ދަނގެއްޗާއި ދިގުރަށު ކައުންސިލްގެ މެމްބަރުންނާއި ބައްދަލުކޮށް ވަނީ މަޝްވަރާ ކޮށްފައެވެ.
ކުރެވުނު މަޝްވަރާތަކުގެ އަލީގައި އެސަރަހައްދުގެ ކައުންސިލްތަކާއި ހެލްތް ސެންޓަރުތައް ގުޅިގެން ސަފާރީތަކުން ދަތުރު ކުރާ ޓޫރިސްޓުން ރަށަށް ނާރުވާ ޕީސީއާރް ޓެސްޓް ހެދޭނެ އިންތިޒާމް ހަމަޖެއްސުމަށާއި އަދި ޓޫރިސްޓުން ރަށު ތެރޭގައި ހަރަކާތްތެރިވެ އުޅޭނެ ވަކި މިންގަނޑުތަކެއް ވެސް ވަނީ އެކުލަވާލާފައެވެ.
ރާއްޖެއެމްވީއާއި ވާހަކަދައްކަމުން ތޮއްޑޫ ދާއިރާގެ މެމްބަރު ހަސަން ޝިޔާން ވިދާޅުވީ ތޮއްޑޫ ކައުންސިލާއި އެކު ބޯޓިން އެސޯސިއޭޝަން އިން ބޭއްވި ބައްދަލުވުމަކީ ވަރަށް މުހިއްމު ބައްދަލުވުމެއް ކަމަށާއި އިގްތިޞާދީ ގޮތުން ގައުމު ހީނަރުވެފައިވާ މިދަނޑިވަޅުގައި ފަތުރުވެރިކަން މަޑުމަޑުން ފުޅާ ކުރުމަށް ކުރެވެން ހުރި ކަންކަމާއި ގުޅިގެން މި ބައްދަލުވުމުގައި މަޝްވަރާ ކުރެވުނު ކަމަށެވެ.
އެގޮތުން އއ. އަތޮޅަކީ ފަތުރުވެރިކަން ފުޅާވަމުން އަންނަ ސަރަހައްދަކަށްވެފައި ސަފާރީތަކަށް ލިބޭ ބުކިން ވެސް އިތުރު ވަމުންދިއުމާއި ގުޅިގެން މި ސަރަހައްދުގައި ޕީސީއާރް ޓެސްޓް ހެދޭނެ ގޮތްތަކެއް ކަނޑައަޅާފައިވާ ކަމަށް އޭނާ ވިދާޅުވިއެވެ.
އެގޮތުން ކޮންމެ ރަށެއްގައި ފުލޫ ކްލިނިކެއް ވަކިން ހެދުމަށް ނިންމާފައިވާއިރު، ފަތުރުވެރިން މޫދަށް ގެންދިއުމުގައި ސަމާލުވާންޖެހޭ ވަކި ކަންތައްތަކެއް ހުންނާނެ ކަމަށާއި އަދި ރެސްޓޯރަންޓް ތަކުގައި ވެސް ފަތުރުވެރިންނަށް ހާއްސަ މޭޒުތަކެއް ކަނޑައަޅާފައިވާ ކަމަށް މެމްބަރު ޝިޔާން ވިދާޅުވިއެވެ.
އަދި އިގްތިސާދު އެއްކޮށް ހުއްޓިފައި އޮތް މިދަނޑިވަޅުގައި އަލުން އަނބުރާ ގެސްޓްހައުސްތައް ހުޅުވައިގެން ޙިދުމަތް ދިނުމަށް ގެސްޓްހައުސް ހިންގާ ފަރާތްތަކުން ބޭނުންވާއިރު، ތޮއްޑޫގައި އެކަނިވެސް ފަތުރުވެރި ކަމަށް ހާއްސަ 650 އެނދު އެބަހުއްޓެވެ.
