ހޮނިހިރު ދުވަހު 111 މީހަކު ބަލިން ރަނގަޅުވެ 81 މީހަކު ޕޮޒިޓިވްވެއްޖެ
ޕޮޒިޓިވްވި މީހުންގެ ތެރޭގައި ހިމެނެނީ 58 ދިވެހިންނާއި 23 ބިދޭސީން
ކޮވިޑް-19ށް ސާމްޕަލް ޓެސްޓް ކުރުމުގެ މަސައްކަތް އައިޖިއެމްއެޗްގެ ލެބޯޓަރީގައި ކުރިއަށްދަނީ
ހޮނިހިރު ދުވަހު 11 މީހަކު ބަލިން ރަނގަޅުވެ 81 މީހަކު ކޮވިޑް-19ށް ޕޮޒިޓިވްވެއްޖެއެވެ.
އެޗްޕީއޭ އިން ބުނީ ހުކުރު ދުވަހުގެ އިރުއޮއްސި 6:00ން ހޮނިހިރު ދުވަހުގެ އިރުއޮއްސި 6:00އާ ހަމައަށް 81 މީހަކު ޕޮޒިޓިވްވި އިރު އޭގެ ތެރޭގައި ހިމެނެނީ 58 ދިވެހިންނާއި 23 ބިދޭސީން ކަމަށެވެ. 81 މީހުންގެ ތެރެއިން 70 މީހުން ޕޮޒިޓިވް ވެފައިވަނީ މާލެ ސަރަހައްދުންނެވެ. އަދި އަތޮޅު ތެރެއިން ހުކުރު ދުވަހު ޕޮޒިޓިވްވީ 11 މީހުންނެވެ.
ހުކުރު ދުވަހު ބަލިން ރަނގަޅުވީ 111 މީހުންނެވެ. މި ހަފްތާގެ ކޮންމެ ދުވަހެއްގެ ވެސް 100ން މަތިން މީހުން ބަލިން ރަނގަޅުވެފާ އިރު އެންމެ މަދުން މީހުން ބަލިން ރަނގަޅުވީ ހުކުރު ދުވަހުއެވެ. އެއީ 44 މީހުންނެވެ. ހޮނިހިރު ދުވަހު 111 މީހުން ބަލިން ރަނގަޅުވި އިރު ރާއްޖޭގައި ބަލިން ރަނގަޅުވި މީހުންގެ އަދަދު ވަނީ 8188ށް އަރާފައެވެ.
މިހާތަނަށް ރާއްޖޭގައި ކޮވިޑް-19ށް ޕޮޒިޓިވްވި މީހުންގެ އަދަދު ވަނީ 9649ށް އަރާފައެވެ. އެކްޓިވް ކޭސްގެ އަދަދަކީ 1422 އެވެ. މީގެ ތެރެއިން 111 މީހަކަށް އަންނަނީ އެޑްމިޓްކޮށްގެން ފަރުވާދެމުންނެވެ. 33 މީހަކު މި ބަލީގައި ވަނީ ނިޔާވެފައެވެ. ނިޔާވި މީހުންގެ ތެރޭގައި ވެސް ގިނައީ ދިވެހިންނެވެ.
ރާއްޖޭގައި ބަލިޖެހުނު މީހުންގެ ތަފާސް ހިސާބުތަކަށް ބަލާ އިރު، ޕޮޒިޓިވްވި ދިވެހިންގެ އަދަދު ވަނީ 6122ށް އަރާފައެވެ. ބިދޭސީންގެ އަދަދު ވަނީ 3564ށް އަރާފައެވެ. ބިދޭސީންގެ ތެރެއިން އެންމެ ގިނައީ ބަންގުލަދޭޝް މީހުންނެވެ.
އަތޮޅު ތެރޭގެ ކޮވިޑްގެ ހާލަތަށް ބަލާއިރު އެކްޓިވް ކޭސްތައް މިވަގުތު ހިމެނެނީ 21 ރަށެއްގައެވެ. މީގެ ތެރެއިން ހޯނޑެއްދޫން މިހާތަނަށް 44 ކޭސް ފެނިފައިވާ އިރު އެރަށުގައި އެކްޓިވް ކޭސްގެ އަދަދަކީ މިހާރު 19އެވެ. 22 ރަށުގައި މިވަގުތު 48 އެކްޓިވް ކޭސް ހިމެނޭ އިރު މީގެ ތެރޭގައި ގިނައީ ދިވެހިންނެވެ. އެއީ 34 ދިވެހިންނެވެ. އަތޮޅު ތެރޭގެ އެކްޓިވް ކޭސްގެ ތެރެއިން ބިދޭސީންގެ އަދަދަކީ 14އެވެ.
މޮނިޓަރިންގެ ހާލަތުގައި އޮތީ ދެ ރަށެވެ. އެއީ ގދ. ހޯނޑެއްދޫއާއި ގދ. މަޑަވެއްޔެވެ. އަތޮޅު ކޮވިޑް ފެސިލިޓީތަކުގެ ތެރެއިން ށ. އަތޮޅު ކޮވިޑް ފެސިލިޓީ އަދި ގއ. ވިލިނގިލި ކޮވިޑް ފެސިލިޓީގައި ދަނީ 4 މީހަކަށް ފަރުވާ ދެމުންނެވެ.
