ބަޔާން މިއުނިކް ކުޅެމުން އައި ސްޕެއިންގެ މިޑްފީލްޑަރު ތިއާގޯ އަލްކަންޓާރާ އިނގިރޭސި ޗެމްޕިއަން ލިވަޕޫލަށް ސޮއިކޮށްފިއެވެ.
ހުކުރު ދުވަހުގެރޭގެ ވަގުތެއްގައި ލިވަޕޫލުން ވަނީ ތިއާގޯ އެޓީމާ ގުޅުނުކަން ހާމަކޮށްފައެވެ. ލިވަޕޫލުން ހާމަކޮށްފައިވާ ގޮތުގައި ތިއާގޯ ވަނީ އެ ޓީމާއެކު ދިގު މުއްދަތެއްގެ އެއްބަސްވުމެއް ހަދާފައެވެ. އަދި ތިއާގޯގެ ސޮއި ހޯދުމަށް ލިވަޕޫލުން 20 މިލިޔަން ޕައުންޑް ދެއްކިއިރު، ބޯނަހުގެ ގޮތުގައި އިތުރު ފަސް މިލިޔަން ޕައުންޑް ދައްކާނެ ކަމަށް ވަނީ ރިޕޯޓުކޮށްފައެވެ.
އުމުރުން 29 އަހަރުގެ ތިއާގޯ ލިވަޕޫލާ ގުޅުނުއިރު، އޭނާ ހޯދުމަށް މެންޗެސްޓާ ޔުނައިޓެޑާއި ބާސެލޯނާއިން ވަނީ މަސައްކަތް ކޮށްފައެވެ. ލިވަޕޫލަށް ބަދަލުވުމަށްފަހު ބަޔާނާއެކު މިދިޔަ ސީޒަނުގެ ތިން ތަށި އުފުލާލި ތިއާގޯ ބުނީ މިއީ ދިގު އިންތިޒާރެއްގެ ނިމުން ކަމަށާއި، ލިވަޕޫލަށް ބަދަލުވެވުމުން ވަރަށް އުފާވާ ކަމަށެވެ. އަދި ލިވަޕޫލާއެކު ހޯދެން ހުރި ހުރިހާ ކާމިޔާބީއެއް ހޯދުމަށް މަސައްކަތް ކުރާނެ ކަމަށްވެސް ވަނީ ބުނެފައެވެ.
ބަޔާން ދޫކޮށް ތިއާގޯ ލިވަޕޫލަށް ބަދަލުވިއިރު، 2013 ވަނަ އަހަރު 25 މިލިޔަން ޔޫރޯއަށް ބަޔާނާ ގުޅުނު ތިއާގޯ ވަނީ އެ ކުލަބުގެ މެދުތެރޭގައި މޮޅު ކުޅުމެއް ދައްކާފައެވެ. އެގޮތުން ބަޔާންގައި ހޭދަކުރި ހަތް ސީޒަނުގައި ތިއާގޯ ވަނީ 235 މެޗު ކުޅެދީ 31 ލަނޑު ކާމިޔާބުކޮށްފައެވެ. އަދި ވަނީ ބަޔާނާއެކު ޖަރުމަން ލީގު ހަތް ފަހަރު އަދި ޔުއެފާ ޗެމްޕިއަންސް ލީގު އެއް ފަހަރު ކާމިޔާބުކޮށްފައެވެ.
ލިވަޕޫލުން ތިއާގޯގެ ސޮއި ހޯދިއިރު، އެޓީމުން މީގެ ކުރިން ވަނީ މި ޓްރާންސްފާ ބާޒާރުގައި އޮލިމްޕިއާކޯސްގެ ޑިފެންޑަރު ކޮސްޓަސް ޓިމިސްކަސް ގެނެސްފައެވެ. އަދި އަންނަނީ ލީޑްސް ޔުނައިޓެޑަށް މިދިޔަ ސީޒަނުގައި ކުޅުނު ޒުވާން ޑިފެންޑަރު ބެން ވައިޓާއި، ވަޓްފޯޑްގެ އިސްމާއިލް ސާގެ އިތުރުން ވުލްވްސް ޑިއޯގޯ ޔޮޓާ ހޯދުމަށް މަސައްކަތް ކުރަމުންނެވެ.
