ނެދަލެންޑްސްގެ ފޯވާޑް މެމްފިސް ޑިޕާއި ބާސެލޯނާއަށް ވިއްކާލަން ލިޔޯނުން ރުހުން ދީފައިވާ ކަމަށް ރިޕޯޓުތައް ބުނެފިއެވެ.
އުމުރުން 26 އަހަރުގެ ޑީޕާއި އަކީ ބާސާގެ މިހާރުގެ ކޯޗު ރޮނާލްޑް ކޫމަން، ނެދަލެންޑްސްގެ ގައުމީ ފުޓްބޯޅަ ޓީމުގައި އިރުޝާދު ދީފައިވާ ކުޅުންތެރިއެކެވެ. ކޫމަންގެ އެދުމުގެ މަތިން ބާސާއިން ޑިޕާއި ހޯދުމަށް މަސައްކަތް ކުރަމުން އަންނައިރު، ރިޕޯޓުތައް ބުނާ ގޮތުން މި މަހުގެ ކުރީކޮޅު ޑިޕާއި ވަނީ އަމިއްލަ ގޮތުން ބާސާއަށް ބަދަލުވުމަށް އެއްބަސްވެފައެވެ.
އެހެންކަމުން ޑިޕާއި ވިއްކާނެ އަދަދަކާ ގުޅޭ ގޮތުން ބާސާއިން ލިޔޯނާއެކު މަޝްވަރާ ކުރިއިރު، ރިޕޯޓުތައް ބުނާ ގޮތުން ޑިޕާއި ހޯދަން ބާސާއިން އެންމެ ފުރަތަމަ ކުރީ 20 މިލިޔަން ޕައުންޑްގެ ބިޑެކެވެ. އެކަމަކު އެ ބިޑް ގަބޫލުނުކުރަން ލިޔޯނުން ނިންމި ނަމަވެސް، ބާސާއިން ދެވަނައަށް ކުރި ބިޑް ގަބޫލުކުރަން ލިޔޯނުން ނިންމާފައިވާ ކަމަށް ރިޕޯޓުތައް ބުނެއެވެ. ރިޕޯޓުތައް ބުނާ ގޮތުން ޑިޕާއި ހޯދުމަށް ބާސާއިން 25 މިލިޔަން ޕައުންޑް ދައްކަން އެއްބަސްވެފައިވާއިރު، ބޯނަހުގެ ގޮތުގައި އިތުރު ފަސް މިލިޔަން ޕައުންޑް ޚަރަދުކުރާނެއެވެ.
ޑިޕާއި ބާސާއަށް ވިއްކާލަން ލިޔޯނުން ރުހުން ދިން ނަމަވެސް، ދާދި ފަހުން ބާސާގެ ކޯޗު ކޫމަން ބުނީ ޑިޕާއިގެ ސޮއި ހޯދޭނީ އެ ކުލަބުގެ ބައެއް ކުޅުންތެރިން ވިއްކާލައިގެން ކަމަށެވެ. އެގޮތުން ބާސާއިން އަންނަނީ އެ ޓީމަށް ކުޅެމުން އަންނަ އުރުގުއޭގެ ފޯވާޑް ލުއިސް ސުއަރޭޒް އާއި ޗިލީގެ މިޑްފީލްޑަރު އާޓޫރޯ ވިޑާލް ވިއްކާލުމަށް މަސައްކަތް ކުރަމުންނެވެ.
މީގެ ކުރިން މެންޗެސްޓާ ޔުނައިޓެޑަށްވެސް ކުޅުނު ޑިޕާއި ލިޔޯނާ ގުޅުނީ 2017 ވަނަ އަހަރު، ހަތަރު އަހަރާ ބައިގެ އެއްބަސްވުމެއްގެ ދަށުންނެވެ. ލިޔޯންގައި ޑިޕާއި މޮޅު ކުޅުމެއް ދައްކަމުން އަންނައިރު، އޭނާ ވަނީ މިހާތަނަށް ލިޔޯނަށް ކުޅެދިން 141 މެޗުގައި 58 ލަނޑު ކާމިޔާބުކޮށްފައެވެ.
ބާސާގެ ކޯޗުގެ މަގާމާ ކޫމަން ހަވާލުވުމަށްފަހު ނެދަލެންޑްސްގެ ގައުމީ ޓީމުގެ ކުޅުންތެރިން ބާސާއަށް ގެނައުމަށް މަސައްކަތް ކުރަމުން އަންނައިރު، ލިވަޕޫލަށް ކުޅެމުން އަންނަ ނެދަލެންޑްސްގެ މިޑްފީލްޑަރު ޖޯޖީނިއޯ ވައިނަލްޑަމް ހޯދުމަށްވެސް ކޫމަން ބޭނުންވާ ކަމަށް ރިޕޯޓުތައް ބުނެއެވެ.
މިހާތަނަށް ބާސާއިން މި ޓްރާންސްފާ ބާޒާރުގައި އެޓީމަށް ގެނައި ހަމައެކަނި ކުޅުންތެރިޔަކީ ޔުވެންޓަސްއަށް ކުޅުނު ބޮސްނިއާގެ މިޑްފީލްޑަރު މިރަލެމް ޕިޔަނިޗެވެ. އަދި މިދިޔަ ސީޒަނުގައި ލޯނު އެއްބަސްވުމެއްގެ ދަށުން ބަޔާން މިއުނިކަށް ކުޅުނު ބްރެޒިލްގެ މިޑްފީލްޑަރު ފިލިޕް ކުޓީނިއޯ ވަނީ ބާސާއާ އަލުން ގުޅެފައެވެ.
