އޮސްލޯ އެއަރޕޯޓުގައި ކޮވިޑަށް ޓެސްޓުކުރާ ސެންޓަރެއް ހުޅުވައިފި
15 ސެޕްޓެމްބަރު 2020 | އަންގާރަ 07:20ގާއިމުކޮށްފައިވަނީ ނޯރވޭގެ ޔޫލެންސޭކަރ މުނިސިޕަލްޓީއާއި ގުޅިގެން އެ އެއަރޕޯޓުގެ ބެގޭޖް ހޯލްގަ
އެވިނޯ، އޮސްލޯ އެއަރޕޯޓު
އޮސްލޯ އެއަރޕޯޓުގައި ކޮވިޑަށް ޓެސްޓު ކުރާ ސެންޓަރެއް ގާއިމުކޮށްފިއެވެ.
މި ސެންޓަރު ގާއިމުކޮށްފައިވަނީ ނޯރވޭގެ ޔޫލެންސޭކަރ މުނިސިޕަލްޓީއާއި ގުޅިގެން އެ އެއަރޕޯޓުގެ ބެގޭޖް ހޯލްގައެވެ. ބޭރުގެ މީޑިއާތަކުން ރިޕޯޓުކޮށްފައިވާގޮތުގައި މި ސެންޓަރަކީ ބޭރު ގައުމުތަކުން އޮސްލޯއަށް އަންނަ ޕެސެންޖަރުން ކޮވިޑަށް ޓެސްޓުކުރުމަށް ގާއިމުކުރެވިފައިވާ ސެންޓަރެކެވެ.
ވައިރަހަށް މީހުން ޓެސްޓު ކުރުމުގެ މަސައްކަތް ކުރާނީ އެ ގައުމުގެ ހެލްތު އޮތޯރިޓީންނެވެ. ދުވާލެއްގެ މައްޗަށް 7000 މީހުން ޓެސްޓު ކުރެވޭނެ މި ސެންޓަރުގެ ހިދުމަތް 24 ގަޑިއިރު ލިބެން ހުންނާނެ ކަމަށް ވެސް މީޑިއާތަކުން ވަނީ ރިޕޯޓުކޮށްފައެވެ.
އޮސްލޯ އެއަރޕޯޓާއި ހަވާލާދީ ރިޕޯޓުތަކުގައި ވާގޮތުން މި ފިޔަވަޅަކީ އެއަރޕޯޓުގެ މުވައްޒަފުންނާއި ފަސިންޖަރުންގެ ރައްކާތެރިކަމަށްޓަކައި އެޅުނު މުހިއްމު ފިޔަވަޅެކެވެ. މި ސެންޓަރު ހުޅުވިގެން ދިއުމާއި އެކު ކޮވިޑުގެ އިމްޕޯޓެޑް ކޭސްތައް މަދު ކުރެވޭނެ ކަމަށް އެގައުމުގެ ކަމާ ބެހޭ އިދާރާތަކުން ބުނެއެވެ.
