މި އަހަރު ނިމޭ އިރު ދެ ލައްކަ ފަތުރުވެރިންވެސް ރާއްޖެ އަންނާނެ ކަމަށް ނުބެލެވޭ: ވީއައިއޭ
ފަތުރުވެރިންގެ އަދަދު އިތުރު ކުރެވޭނީ ޕީކް ދުވަސްވަރު ދުވާލެއްގެ މައްޗަށް އަންނަ ފަތުރުވެރިންގެ އަދަދު އިތުރު ކޮށްގެން
ރާއްޖެ އަށް އައި ފަތުރުވެރިންތަކެއް ވެލާނާ އިންޓަރނޭޝަނަލް އެއަރޕޯޓްގައި
މި އަހަރު ނިމޭ އިރު ވެސް ދެ ލައްކަ ފަތުރުވެރިންވެސް ރާއްޖެ އަންނާނެ ކަމަށް ނުބެލެވޭ ކަމަށް ވެލާނާ އިންޓަނޭޝަނަލް އެއާޕޯޓް އިން ބުނެފިއެވެ.
ރާއްޖެޓީވީގެ "ފަށާއިރު" ޕްރޮގްރާމަށް ދެއްވި އިންޓަވިއުއެއްގައި ވާހަކަ ދައްކަވަމުން އެއަރޕޯޓުގެ ޓަރމިނަލް އޮޕަރޭޝަންސް ޖެނެރަލް މެނޭޖަރ އިބްރާހިމް ހުސެއިން ވިދާޅުވީ މިއަހަރުގެ ބާކީ އޮތް ދުވަސްތަކުގައި ފަތުރުވެރިން އަންނަ އަދަދު ދެގުނަ ނުވަތަ ތިން ގުނަ އިތުރު ކުރެވުނު ނަމަ އަހަރު ނިމޭ އިރަށް 200،000 (ދެ ލައްކަ) އާއި ގާތްކުރާ އަދަދަކަށް ފަތުރުވެރިން ރާއްޖެ އަންނާނީ ކިރިޔާކަމަށެވެ.
އޭނާ ވިދާޅުވީ، މިހާރުވެސް އިތުރު ފަސް ފްލައިޓް ފެށުމަށް ހަމަޖެހިފައިވާކަމަށެވެ. އަދި ކުރިއަށް އޮތް ދުވަސްވަރަކީ ފަތުރުވެރިކަމުގެ ޕީކް ސީޒަނަށް ވުމާއި އެކު ދުވާލެއްގެ މައްޗަށް އަންނަ ފަތުރުވެރިންގެ އަދަދު 1200 އާއި 3000 އާއި ދެމެދަށް އިތުރުކުރެވި ނަމަވެސް އެ އަދަދު ހާސިލް ނުވާނެ ކަމަށެވެ.
މިހާރު ދުވާލެއްގެ މައްޗަށް ރާއްޖެ އަންނަނީ 300 އާއި 400 އެއްހާ ފަތުރުވެރިންނެވެ.
ޖުލައި މަހުގެ 15 ވަނަ ދުވަހު ރާއްޖޭގެ ބޯޑަރު ހުޅުވާލުމާއި އެކު 60 ދުވަހުގެ ތެރޭގައި ރާއްޖެ އަށް 12،766 ފަތުރުވެރިން އައިސްފައިވެ އެވެ. މިކަން ފާހަގަކުރައްވާ އިބްރާހިމް ހުސެއިން ވިދާޅުވީ، ރާއްޖޭގެ 150 ރިސޯޓަށް މި އަހަރު ނިމެންދެން އަންނާނެ ކަމަށް ލަފާކުރެވެނީ ދެ ލައްކަ އެއްހާ ފަތުރުވެރިން ކަމަށާއި މިއީ ގަބޫލުކުރަން އެހާ ފަސޭހަ އަދަދެއް ނޫން ކަމަށެ އެވެ.
އެހެންނަމަވެސް މިއަދަދަށް އަމާޒު ވެވޭނީ ކޮވިޑް-19 ގެ ކޭސްތައް މިހާރު މި ފެންނަމުން ދާ ވަރަށް ވުރެ އިތުރުވިޔަނުދީ، ބަލިޖެހޭ މީހުންގެ އަދަދު މަދުކުރެވިގެން ކަމަށް އޭނާ ވިދާޅުވިއެވެ. ރާއްޖެ އަށް އަންނަ ފްލައިޓްތައް އިތުރުވާން ޖެހޭނެ ކަމަށް އިބްރާހިމް ހުސެއިން ފާހަގަކުރައްވާފައިވާ އިރު، ފަސިންޖަރުންގެ އިތުބާރު ހޯދާ ބުކިންތައް ކެންސަލް ކުރާ މިންވަރު މަދުކުރަން ޖެހޭ ކަމަށް އޭނާ ވިދާޅުވިއެވެ.
އިބްރާހިމް ހުސެއިން ވަނީ މިއީ ހުރިހާ ރައްޔިތުންގެ ކޮނޑުގައި އެޅިފައިވާ ގައުމީ ޒިންމާއެއް ކަމަށް ވެސް ވިދާޅުވެފައެވެ.
ރާއްޖެ ދަތުރު ކުރާ އެއާލައިން ތަކަކީ ސްރީލަންކަން އެއާލައިން އާއި ޗައިނާގެ ކެރިއަރ ތައް ކަމަށާއި މި އެއާލައިންތަކުގެ ދަތުރުތައް ފެށުމުން ފަތުރުވެރިން އަންނަ ވަރު އިތުރު ވެގެން ދާނެ ކަމަށް އިބްރާހިމް ވިދާޅުވިއެވެ.
