ސްޓެލްކޯއިން ސޯލާ ޕެނެލް ހަރުކުރުމުގެ ޕްރޮޖެކްޓުގެ ދަށުން 4 ގެއެއްގައި ސޯލާ ހަރުކޮށްފި
14 ސެޕްޓެމްބަރު 2020 | ހޯމަ 07:21މިހާތަނަށް 4 ގެއެއްގައި ސޯލާ ހަރުކުރެވިފައިވާއިރު، އިތުރު 3 ގެއެއްގައި ހަރުކުރުމުގެ މަސައްކަތް ދަނީ ކުރަމުން
ސްޓެލްކޯއިން ގެއެއްގެ ފުރާޅުގައި ސޯލާ ހަރުކުރުމުގެ މަސައްކަތް ކުރިއަށްދަނީ
އާންމު ފަރުދުންގެ ގޭގޭގައި ސޯލާ ޕެނެލް ހަރުކުރުމުގެ ޕްރޮޖެކްޓުގެ ދަށުން 4 ގެއެއްގައި ސޯލާ ޕެނަލް ހަރުކޮށްފިއެވެ.
"ސްޓެލްކޯ ގްރީންލައިފް އިނިޝިއޭޓިވް" ގެ ދަށުން މާލޭގެ އިތުރު ގެއެއްގައި ސޯލާ ޕެނަލް ހަރުކުރުމުގެ މަސައްކަތްތައް ކުރިއަށްދާ ކަމަށް ސްޓެލްކޯއިން ބުނެއެވެ. ސްޓެލްކޯއިން ބުނީ މިހާތަނަށް 4 ގެއެއްގައި ސޯލާ ޕެނަލް ހަރުކޮށް ނިމިފައިވާ ކަމަށާއި، އިތުރު ގެތަކުގައި ސޯލާ ހަރުކުރުމުގެ މަސައްކަތް ކުރަމުންދާ ކަމަށެވެ.
ހެޔޮ އަގެއްގައި އަދި އިންސްޓޯލްމަންޓަށް ވިއްކަމުންގެންދާ ސޯލާ ޕެނަލްތައް ހަރުކުރުމުގެ ހުރިހާ މަސައްކަތެއްވެސް އެކުންފުނިން ކުރަން ނިންމާފައިވާއިރު، މި ކަމުގެ ސަބަބުން ކަރަންޓަށް ކުރާ ހޭދަ ކުޑަކުރެވޭނެ ކަމަށް ސްޓެލްކޯއިން ބުނެއެވެ.
ސްޓެލްކޯގެ މެނޭޖިންގ ޑިރެކްޓަރ ހަސަން މުގުނީ މީގެ ކުރިން ވިދާޅުވީ ތެލަށްކުރާ ހަރަދު ކުޑަކޮށް އިޔާދަކުރަނިވި ހަކަތައަށް ބަދަލުކުރުމަކީ ސަރުކާރުގެ އެއް ސިޔާސަތު ކަމަށާއި، އެގޮތުން ސޯލާ ޕެނެލް ފުރަތަމަ ވިއްކުމަށް ހަމަޖެހިފައިވަނީ ހަމައެކަނި އެކުންފުނީގެ މުވައްޒަފުންނަށް ކަމަށާއި، ނަމަވެސް ކުރު މުއްދަތެއްގެ ތެރޭގައި އާންމުންނަށް ސޯލާ ޕެނަލް ގަތުމުގެ ފުރުސަތު ހުޅުވާލާނެ ކަމަށެވެ.
މީގެ އިތުރުން އަތޮޅުތަކަށް މިޚިދުމަތް ފުޅާކުރާނެކަން ފާހަގަކުރައްވައި މުގުނީ ވިދާޅުވީ ފުރަތަމަ މިފުރުސަތު ހުޅުވާލަނީ މާލެސިޓީއަށް ކަމަށާއި، ނަމަވެސް ކައިރި މުސްތަގުބަލެއްގައި އަތޮޅުތަކަށް މިޚިދުމަތް ފުޅާކުރާނެ ކަމަށެވެ. އަދި ވިދާޅުވީ މާލެއާއި އެއް އަގެއްގައި އަތޮޅުތަކަށް މިޚިދުމަތް ލިބިގެންދާނެ ކަމަށެވެ.
ސޯލާ ޕެނަލް ހަރުކުރުމުގެ އެންމެހައި މަސައްކަތްތައް ކުރާނީ ސްޓެލްކޯއިންނެވެ. އަދި ވެރިފަރާތުން ދައްކަންޖެހޭނީ ފައިސާ ކަމަށާއި، މުޅި ސޯލާ ޕެނެލްގެ އަގަކީ 30،000 ރުފިޔާ ކަމަށާއި އިންސްޓޯލްމަންޓް ސްކީމަކަށް ކުޑަ އަގެއްގައި ފައިސާ ދެއްކޭނެ ކަމަށް ސްޓެލްކޯއިން ބުނެއެވެ.
މި ސޯލާ ޕެނަލަތްކަކީ އަމިއްލަ ކުރެވޭ ޕެނަލްތަކެކެވެ. ޕެނަލްތައް ހަރުކުރުމަށް 5000 ރުފިޔާގެ ޑައުންޕޭމަންޓެއް ދައްކަންޖެހެއެވެ. އަދި ދޮޅުމަސް ތެރޭގައި ކަސްޓަމަރުންނަށް އެއިން ހިދުމަތް ލިބެން ފަށާނެކަމަށް ސްޓެލްކޯއިން ބުނެއެވެ. ސްޓެލްކޯއިން ބުނީ 25 އަހަރާއި 30 އަހަރާ ދެމެދު އެއްވެސް މައްސަލައެއް ނުޖެހި ޕެނަލްތައް ބޭނުންކުރެވޭނެ ކަމަށާއި، މިކަމުގެ ސަބަބުން ކަރަންޓު ބިލަށް ބޮޑު ލުއި ކަމެއް އަންނާނެ ކަމަށެވެ.
