ކަލްވެޓް-ލެވިންގެ ލަނޑުން ޓޮޓެންހަމް އަތުން އެވަޓަނަށް މޮޅެއް

ފޯވާޑް ޑޮމިނިކް ކަލްވެޓް-ލެވިން ކާމިޔާބުކުރި ހަމައެކަނި ލަނޑާއެކު ޓޮޓެންހަމް ހޮޓްސްޕާ އަތުން އެވަޓަން މޮޅުވެއްޖެއެވެ.

އިނގިރޭސި ޕްރިމިއާ ލީގުގައި އާދީއްތަ ދުވަހުގެރޭ ކުޅުނު މެޗުން އެވަޓަން މޮޅުވީ 1-0 ގެ ނަތީޖާއަކުންނެވެ.

ޓޮޓެންހަމްގެ ދަނޑުގައި ކުޅުނު މި މެޗުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، މެޗުގެ 16 ވަނަ މިނެޓުގައި އެވަޓަންގެ ރިޗާލިސަނަށް ވަނީ ލީޑު ނަގަން ހުސް ފުރުސަތެއް ލިބި ބޭކާރުވެފައެވެ. އެގޮތުން ޓޮޓެންހަމްގެ ގޯލްކީޕަރު ހޫގޯ ލޮރިސް ކައިރިން ނައްޓާލުމަށްފަހު ރިޗާލިސަން ފޮނުވާލި ބޯޅަ ދިޔައީ ގޯލާ އަމާޒުނުވެ މާ މަތިންނެވެ.

މި މެޗުގެ ފުރަތަމަ ހާފުގައި ޓޮޓެންހަމުން އެންމެ ރަނގަޅު ހަމަލާއެއް އުފެއްދީ ޑެލެ އަލީއެވެ. އެކަމަކު އޭރިއާ ތެރެއިން އަލީ ފޮނުވާލި ބާރު ހަމަލާ އެވަޓަންގެ ގޯލްކީޕަރު ޖޯޑަން ޕިކްފޯޑް ވަނީ ދިފާއުކޮށްފައެވެ.

މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، މެޗުގައި ފެނިގެންދިޔަ ހަމައެކަނި ލަނޑު އެވަޓަނުން ކާމިޔާބުކޮށްފައިވަނީ ދެވަނަ ހާފު ފަށައިގެން 10 ވަނަ މިނެޓުގައެވެ. މި ލަނޑު ލޫކަސް ޑީނިއޭ ހުރަސްކޮށްދިން ބޯޅައަކުން އެވަޓަނަށް ކާމިޔާބުކޮށްދިނީ ޑޮމިނިކް ކަލްވެޓް-ލެވިންއެވެ.

އައު ސީޒަނުގެ ޕްރިމިއާ ލީގުގައި ކުޅުނު ފުރަތަމަ މެޗުން ޓޮޓެންހަމް އަތުން އެވަޓަން މޮޅުވިއިރު، މިއީ 2012 އަހަރަށްފަހު ޓޮޓެންހަމް އަތުން އެވަޓަން މޮޅުވި ފުރަތަމަ ފަހަރެވެ.

މީގެ އިތުރުން ލީގުގައި އާދީއްތަ ދުވަހުގެރޭ ލެސްޓާ ސިޓީ ވަނީ ވެސްޓް ބްރޮމް އަތުން ފަސޭހަކަމާއެކު 3-0 ގެ ނަތީޖާއަކުން މޮޅުވެފައެވެ.

ވެސްޓް ބްރޮމްގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފަށައިގެން 11 ވަނަ މިނެޓުގައި ލެސްޓާއިން ވަނީ ލީޑު ނަގާފައެވެ. ޑެނިސް ޕްރާޓްގެ އެހީއާއެކު މި ލަނޑު ލެސްޓާއަށް ކާމިޔާބުކޮށްދިނީ ޓިމޮތީ ކަސްޓާންޔޭއެވެ. ލެސްޓާގެ އަނެއް ދެ ލަނޑު މެޗުގެ 74 ވަނަ މިނެޓާއި 84 ވަނަ މިނެޓުގައި ލިބުނު ޕެނަލްޓީތަކުން ކާމިޔާބުކޮށްދިނީ ފޯވާޑް ޖެމީ ވާޑީއެވެ.

މި ސީޒަނުގެ ޕްރިމިއާ ލީގަށް ޕްރޮމޯޓްވި ވެސްޓް ބްރޮމް ކުޅުނު ފުރަތަމަ މެޗުން އެ ޓީމު ބަލިވިއިރު، ދެވަނަ ޑިވިޝަނުން ފުރަތަމަ ޑިވިޝަނަށް ޕްރޮމޯޓްވި ތިން ކުލަބުވެސް ވަނީ ލީގުގައި ކުޅުނު ފުރަތަމަ މެޗުތަކުން ބަލިވެފައެވެ. އެގޮތުން ހޮނިހިރު ދުވަހުގެރޭ ޗެމްޕިއަން ލިވަޕޫލް އަތުން 4-3 ން ލީޑްސް ޔުނައިޓެޑް ބަލިވިއިރު، ހޮނިހިރު ދުވަހުގެ ހަވީރު ފުލަމް ވަނީ އާސެނަލް އަތުން 3-0 ން ބަލިވެފައެވެ.