ކްރިމިނަލް ކޯޓުގެ ހިންގުން ވަގުތީ ގޮތުން ޙަވާލު ކޮށްފައިވަނީ ރަނގަޅަށް: ޖޭއެސްސީ

ކްރިމިނަލް ކޯޓު ވަގުތީ ގޮތުން ހިންގުން ޖުޑީޝަލް ސަރވިސް ކޮމިޝަނުން ޙަވާލު ކޮށްފައިވަނީ އުޞޫލުތަކާ ޚިލާފަށް ކަމަށް ބުނެ، މީޑިއާގައި ބައެއް ފަރާތްތަކުން، ދައްކަމުން ދަނީ ހަޤީގަތާ ޚިލާފު ވާހަކަތަކެއް ކަމަށާއި، އެ ކޯޓު ވަގުތީ ގޮތުން ހިންގުން ހަވާލު ކޮށްފައިވަނީ ރަނގަޅަށް ކަމަށް އެ ކޮމިޝަނުން ބުނެފިއެވެ.

މިކަމާއި ގުޅިގެން ޖޭއެސްސީން ނެރުނު ބަޔާނެއްގައި ބުނެފައިވަނީ ހައިކޯޓުގެ އިސް ފަނޑިޔާރުކަން ހަމަޖެއްސުމާއި، ސުޕީރިއަރ ކޯޓުތަކުގެ އިސް ޤާޟީން ހަމަޖެއްސުމާއި، ޖުޑީޝަލް ދާއިރާތަކުގެ އިސް މެޖިސްޓްރޭޓުން ހަމަޖެއްސުމަކީ ޖުޑީޝަލް ސަރވިސް ކޮމިޝަންގެ ޤާނޫނާއި، ދިވެހިރާއްޖޭގެ ކޯޓުތަކުގެ ޤާނޫނާއި ދިވެހިރާއްޖޭގެ ފަނޑިޔާރުންގެ ޤާނޫނުގެ ދަށުން އެ ކޮމިޝަނުގެ ޒިންމާއެއް ކަމަށެވެ.

އަދި ކޯޓު ހިންގުމާ ހަވާލުވެ ހުންނަ ފަނޑިޔާރަކު ޗުއްޓީ އަށް ދާނަމަ އެކޯޓުގެ ހިންގުން އެހެން ފަނޑިޔާރަކާ ޙަވާލު ކުރުމުގައި ޢަމަލު ކުރާނެ އުޞޫލު 28 އޮކްޓޫބަރ 2019 ގައި ގެޒެޓް ކޮށްފައިވާނެ ކަމަށެވެ. އަދި ކޯޓެއްގެ އިސް ފަނޑިޔާރަކު ވަޒީފާއާބެހޭ ޤާނޫނުގައި ބަޔާން ކުރާ ޗުއްޓީއެއްގައި ހުރެއްޖެނަމަ ނުވަތަ ދާއިމީ މަސައްކަތަކަށް ވީއްލާފައި ހުރެއްޖެނަމަ ނުވަތަ ޙައްޖު، ޢުމްރާ ނުވަތަ އެނޫންވެސް ޗުއްޓީއެއްގައި ހުރެއްޖެނަމަ ނުވަތަ އިސް ފަނޑިޔާރަކު ސަލާމުގައި ހުރެއްޖެނަމަ އެ ކޯޓެއް ވަގުތީ ގޮތުން ހިންގުން ޙަވާލު ކުރަން ވާނީ އެ ކޯޓެއްގައި ތިބި ފަނޑިޔާރުންގެ ތެރެއިން އެ ތަނެއްގައި ޚިދުމަތުގައި އެންމެ ގިނަ ދުވަސްވީ ފަނޑިޔާރުންގެ ތަރުތީބުން ކަމުގައި އެ އުޞޫލުގައި ބަޔާން ކޮށްފައިވާނެ ކަމަށެވެ.

އަދި ކޯޓުގެ އިސްފަނޑިޔާރަކު ސަސްޕެންޑު ކުރެވޭ ޙާލަތުގައި އިސްވެ ދެންނެވުނު ތަރުތީބަށް ޢަމަލު ކުރުން އެ އުޞޫލު އިސްތިސްނާ ކޮށްފައިވާކަން ފާހަގަކޮށް ޖޭއެސްސީން ބުނެފައިވަނީ ކްރިމިނަލް ކޯޓުގެ އިސް ފަނޑިޔާރަކު ސަސްޕެންޑު ކުރެވޭ ޙާލަތުގައި އާއި އިސް ފަނޑިޔާރުކަން ދާއިމަށް ހުސްވާ ޙާލަތުގައި ވަގުތީ ގޮތުން މީހަކާ އެ މަސްޢޫލިއްޔަތު ޙަވާލު ކުރުމުގައި އެ ކޮމިޝަނުން ޢަމަލު ކުރަނީ ދިވެހިރާއްޖޭގެ ފަނޑިޔާރުންގެ ޤާނޫނުގެ 18 ވަނަ މާއްދާގެ (ށ) ގައި ބަޔާންކޮށްފައިވާ ގޮތަށް ކަމަށެވެ.

އަދި އެގޮތުން، ކޮމިޝަނުން ވަގުތީ ގޮތުން ކޯޓުގެ ހިނގުން އެހެން ފަނޑިޔާރަކާ ހަވާލު ކުރަމުންދަނީ، ކޯޓުގައި ނުވަތަ ދާއިރާގައި ތިއްބެވި ހުރިހާ ފަނޑިޔާރުންގެ ވަނަވަރު އަދި ރެކޯޑު ފައިލްގައި ހުރި ލިޔެކިޔުންތަކަށް ބެލުމަށްފަހު، ކޯޓެއްގައި ހިމެނޭ ފަނޑިޔާރުންގެ ތެރެއިން ތަޢުލީމާއި، ތަޖުރިބާ އާއި، އަޚްލާޤާއި ޤާބިލު ކަމަށް ބަލައި، އިސް ފަނޑިޔާރު ކަމަށް އެންމެ އެކަށޭނަ ފަރާތެއް، ޖުޑީޝަލް ސާރވިސް ކޮމިޝަނުގެ މެންބަރުންގެ އަޣުލަބިއްޔަތުން ކަނޑައަޅައިގެން ކަމަށެވެ.

މީގެ އިތުރުން އެކިއެކި ސުލޫކީ މައްސަލަތައް ސާބިތުވެގެން ފަނޑިޔާރު ކަމުން ވަކި ކުރުމަށް އެ ކޮމިޝަނުން ރައްޔިތުންގެ މަޖިލީހަށް ލަފާދިނުމުން، ފަނޑިޔާރު ކަމުގެ މަޤާމުން އިސްތިޢުފާ ދިނުމަށް ފަހު، ކޮމިޝަނުން ޝަރުޢީ ދާއިރާގެ އިތުބާރު ނެގެހެއްޓުމަށްޓަކައި ކުރާ މަސައްކަތާ ބެހޭ ގޮތުން އާއްމުންނަށް ކަންހިނގާ ގޮތް އޮޅުވާލުމަށް ޒިންމާދާރުކަން ކުޑަގޮތަކަށް ދައްކާ ވާހަކަތައް ޖޭއެސްސީން ވަނީ ކުށްވެރިކޮށްފައެވެ. އަދި އެ ކޮމިޝަނުގެ މަސްޢޫލިއްޔަތު އަބަދުވެސް އަދާކުރަމުން ދާނީ ޤާނޫނާއި ގަވާއިދުތަކުގައި ކަނޑައަޅާފައިވާ އުޞޫލުތަކާ އެއްގޮތަށްކަމުގެ ޔަޤީންކަން އެންމެހައި ފަރާތްތަކަށް އަރުވާ ކަމަށް ޖޭއެސްސީން ބުނެފައިވެއެވެ.