އިދިކޮޅު ފަރާތްތަކުން އިންޑިއާ އާއި ދެކޮޅަށް އަޑު އުފުލަނީ ލިބޭ ވަކި ސިޔާސީ ފައިދާއެއް ހާސިލު ކުރުމަށް: މެމްބަރު ރޮޒެއިނާ
11 ސެޕްޓެމްބަރު 2020 | ހުކުރު 16:15އިންޑިއާއަކީ އަބަދުވެސް ރާއްޖެއަށް އެހީތެރިކަން ފޯރުކޮށްދޭ ގައުމެއް
އެމްޑީޕީން ބޭއްވި އިވެންޓެއްގެ ތެރެއިން، ރައްޔިތުންގެ މަޖިލީހުގެ އައްޑޫ މީދޫ ދާއިރާގެ އެމްޑީޕީ މެމްބަރު ރޮޒެއިނާ އާދަމް
އިންޑިއާ އާއި ރާއްޖެއާ ދެމެދު ގޮތް ގުޅުމަށް ހިތްހަމަ ނުޖެހި އިންޑިއާ ދެކޮޅަށް ޕީޕީއެމް-ޕީއެންސީންގެ މެމްބަރުން މަސައްކަތް ކުރަނީ ލިބޭ ވަކި ސިޔާސީ ފައިދާއެއް ހާސިލު ކުރަން ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ އެމްޑީޕީ މެމްބަރު ރޮޒެއިނާ އާދަމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެމްބަރު ރޮޒެއިނާ ވިދާޅުވީ އިދިިކޮޅު ފަރާތްތަކުން މަސައްކަތް ކުރަނީ ގައުމާ ރައްޔިތުންނަށް ހެޔޮ އެދިގެން ނޫން ކަމަށާއި، އިންޑިއާ ދެކޮޅަށް ނުކުމެ މަސައްކަތް ކުރަނީ ލިބޭ ވަކި ސިޔާސީ ފައިދާތަކެއް ހާސިލު ކުރުމަށް ކަމަށެވެ.
އިންޑިއާ އަކީ އަބަދުވެސް ރާއްޖެއަށް އެހީތެރިކަން ފޯރުކޮށްދޭ ގައުމެއްކަން ފާހަގަކުރައްވައި މެމްބަރު ރޮޒެއިނާ ވިދާޅުވީ ރާއްޖެއަށް އެހީވެދޭ ގައުމުތައް ކަމަށްވާ ޗައިނާ އަދި އިންޑިއާ އަށް އެއްޗެހި ކިޔަން ނުޖެހޭ ކަމަށެވެ. ގައުމުގެ ތަރައްގީ އަށް އެހެން ގައުމުތަކުން ކޮށްދޭ ކަންކަން ބަލައިގަންނަކަން މެމްބަރު ފާހަގަކުރެއްވިއެވެ.
''އިންޑިއާ އައުޓް'' ހޭޝްޓެގަށް އަލިއަޅުއްވާލައްވައި މެމްބަރު ރޮޒެއިނާ ވިދާޅުވީ މިކަމުގެ ސަބަބުން އިންޑިއާގެ ރައްޔިތުންގެ ހިތުގައި ނުތަނަވަސްކަން އުފެދޭ ކަމަށެވެ. އަދި މިއީ ރައްޔިތުން ކުރަން ހެޔޮވާވަރުގެ ކަމެއް ނޫން ކަމަށް މެމްބަރު ވިދާޅުވިއެވެ.
މެމްބަރު ރޮޒެއިނާ ވިދާޅުވީ ރާއްޖެއަށް އަންނަ ތަރައްގީ އަށް ހުރަސް އެޅުމުގެ ފުރުސަތު ރައްޔިތުން ނުދޭނެ ކަމަށާއި، މިކުޅޭ ސިޔާސީ ގޭމާ ދޭތެރޭގައި ރައްޔިތުން ވިސްނަން ޖެހޭ ކަމަށެވެ.
މީގެ އިތުރުން ރޮޒެއިނާ ވިދާޅުވީ ކުރީގެ ރައީސް އަބްދުﷲ ޔާމީންގެ ސަރުކާރުގައި ވެސް ބޮޑެތި މަޝްރޫއުތައް ހިންގި ކަމަށާއި، އެގްރިމެންޓްތައް ވެސް ސިއްރު ކުރި ކަމަށެވެ. ނަމަވެސް މަޝްރޫއުތައް ހުއްޓުމަށް ހުރަސް ނާޅާކަން މެމްބަރު ފާހަގަކުރެއްވިއެވެ.
މެމްބަރު ރޮޒެއިނާ ވިދާޅުވީ އިންޑިއާ ރާއްޖޭގެ ގުޅުން ބަދަހިވެގެން ދިއުމަކީ އިންޑިއާ އިން ރާއްޖެއަށް އަތް ގަދަ ކުރުން ނޫން ކަމަށެވެ. އަދި އިންޑިއާ އަކީ ގައުމުތަކުގެ މިނިވަންކަމަށް އަބަދު ވެސް ވަކާލާތު ކުރާ ގައުމެއް ކަމަށެވެ.
