ގއ. ވިލިނގިލިން މަސްތުވާތަކެއްޗާއެކު ދެ މީހަކު ހައްޔަރު ކޮށްފިއެވެ.
މި ދެ މައްސަލައިގައި ހައްޔަރު ކޮށްފައި ވަނީ އުމުރުން 22 އަހަރުގެ މީހަކާ 25 އަހަރުގެ މީހެކެވެ.
މަސްތުވާތަކެއްޗާ ދެކޮޅަށް ފުލުހުހުން ކުރަމުންދާ މަސައްކަތުގެ ތެރެއިން ގއ. ވިލިނގިލި ފުލުހުންނާ ފުލުހުންގެ އިންޓެލިޖެންސްއިން ހިންގި ހާއްސަ ދެ އޮޕަރޭޝަނެއްގައި ދެ މީހަކު ހައްޔަރު ކޮށްފައިވާ ކަމަށް ފުލުހުން ބުނެފިއެވެ.
ފުލުހުން ބުނީ އެރަށުގައި މަސްތުވާތަކެތި ގެންގުޅުމާއެކު އެތަކެތީގެ ވިޔަފާރި ކުރާ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ހުކުރު ދުވަހު ދެ އޮޕަރޭޝަނެއް ހިިންގާފައިވާ ކަމަށެވެ.
އިތުރަށް މައުލޫމާތު ދެމުން ފުލުހުން ބުނީ އެތަނުން އެކަކު ހައްޔަރު ކޮށްފައިވަނީ އޭނާ ބަލާފާސްކުރިއިރު މަސްތުވާތަކެތި ކަމަށް ޝައްކު ކުރެވޭ އެއްޗެއްހުރި ބޮޑު 10 ރަބަރު ޕެކެޓުތަކެއް ފެނުމާ ގުޅިގެން ކަމަށެވެ. އަދި ދެވަނަ މީހާ ހައްޔަރު ކޮށްފައިވަނީ މަސްތުވާތަކެތި ކަމަށް ޝައްކު ކުރެވޭ އެއްޗެއްހުރި 12 ސެލޯފިން ކޮޅު ފެނުމާއި ގުޅިގެންނެވެ.
ފުލުހުން ބުނީ މި ދެ މައްސަލަ ތަހުގީގު ކުރަމުންދާ ކަމަށެވެ.
