ބެއިރޫތުގެ ބަނދަރުގައި ރޯވި އަލިފާންގަނޑު ކޮންޓްރޯލްކޮށްފި

ލުބުނާނުގެ ވެރިރަށް ބެއިރޫތުގެ ކަނޑުގެ ބަނދަރުގައި ގޮތްނޭނގޭ ގޮތަކަށް ރޯވި އަލިފާންގަނޑު ކޮންޓްރޯލް ކޮށްފިއެވެ.

ބުރާސްފަތި ދުވަހު މި އަލިފާންގަނޑު ރޯވާން ދިމާވި ސަބަބެއް އެއިރު ދެނެގަނެވިފައި ނުވި ނަމަވެސް، އަލިފާން ނިއްވުމުގައި ހަރަކާތްތެރިވިނ ލުބުނާނުގެ އަސްކަރިއްޔާ އިން ބުނި ގޮތުގައި އިއްޔެ އަލިފާން ރޯވީ ބޭރޫތުގެ ބަނދަރުގެ ޑިއުޓީ ފްރީ ސަރަހައްދުގައި ހުރި، ތެލާއި ޓަޔަރު ރައްކާ ކުރާ ގުދަނެއްގައެވެ.

ބެއިރޫތުގެ ޕޯޓުގެ އޮފިޝަލަކާއި ހަވާލާދީ ބައިނަލްއަގުވާމީ މީޑިއާތަކުން ރިޕޯޓްކޮށްފައިވާ ގޮތުން، މި ގުދަނަކީ ލުބުނާނުގެ ބީސީސީ ލޮޖިސްޓިކްސް ކުންފުނިން ކުއްޔަށް ހިފާފާއިވާ ގުދަނެކެވެ. އަދި އެ ހާދިސާ ހިނގީ އެ ގުދަން މަރާމާތު ކުރުމުގެ މަސައްކަތް ކުރިއަށް ދަނިކޮށެވެ.

މިދިޔަ އޮގަސްޓްމަހުގެ 4 ވަނަ ދުވަހު ބޭރޫތު ޕޯޓުގައި ގޮވި ބާރުގަދަ ގޮވުމުގައި 191 މީހުން މަރުވެފައިވާއިރު 6000ށް ވުރެ ގިނަ މީހުން ވަނީ ޒަޚަމްވެފައެވެ. ހަ އަހަރު ވަންދެން ޕޯޓުގައި ރައްކާކޮށްފައިހުރި އެމޯނިއަމް ނައިޓްރޭޓް ކޮންޓެއިނަރތަކެއް ގޮވާ ހިނގި މިހާދިސާގައި 300،000 މީހުންގެ ގެދޮރު ގެއްލިފައިވެ އެވެ.