ޗެލްސީގެ ބެލްޖިއަމްގެ ފޯވާޑް މިޝީ ބަޓްޝުއާއީ އަލުން އަނބުރާ ކްރިސްޓަލް ޕެލަސްއާ ގުޅިއްޖެއެވެ.
2016 ވަނަ އަހަރު ޗެލްސީއާ ގުޅުނު އުމުރުން 26 އަހަރުގެ ބަޓްޝޫއާއީއަށް އެޓީމުގައި އެންމެ އެދެވޭ ކުޅުމެއް ދެއްކިފައި ނުވާއިރު، ޗެލްސީން މީގެ ކުރިން ވަނީ އޭނާ ތިން ސީޒަނުގައި ލޯނު އުސޫލުން ކުލަބުތަކަށް ދޫކޮށްފައެވެ. އެގޮތުން މީގެ ކުރިން ބަޓްޝުއާއީ ޕެލަސްއަށް ކުޅުނީ 2018-2019 ވަނަ އަހަރުގެ ސީޒަނުގައެވެ. އެ ސީޒަނުގައި ބަޓްޝުއާއީ ވަނީ ޕެލަސްއަށް ކުޅެދިން 13 މެޗުގައި ހަ ލަނޑު ކާމިޔާބުކޮށްފައެވެ.
އޭގެ ފަހުން މިދިޔަ ސީޒަނުގައި ބަޓްޝުއާއީ ޗެލްސީއަށް އަލުން ބަދަލުވިއިރު، އޭނާ މިހާރު ވަނީ ޗެލްސީގެ އެއްބަސްވުން 2022 ވަނަ އަހަރުގެ ހޫނު މޫސުމުގެ ނިޔަލަށް އާކޮށްފައެވެ. އެއާއެކު އަންނަ ސީޒަނަށް ޗެލްސީން ވަނީ ބަޓްޝުއާއި އަލުން ލޯނު އުސޫލުން ޕެލަސްއަށް ދޫކޮށްފައެވެ.
ލޯނު އެއްބަސްވުމެއްގެ ދަށުން އަންނަ ސީޒަނަށް ބަޓްޝުއާއީ ޕެލަސްއާ ގުޅުނުއިރު، މި އެއްބަސްވުމުގެ ދަށުން ޕެލަސްއިން ބޭނުންވާނަމަ، ލޯނު އެއްބަސްވުން ހަމަވުމުން ބަޓްޝުއާއީ ގަތުމުގެ ފުރުސަތު ލިބެއެވެ.
ޗެލްސީގައި ބަޓްޝުއާއިއަށް އެންމެ އެދެވޭ ކުޅުމެއް ދެއްފައިނުވި ނަމަވެސް، މިހާތަނަށް ޗެލްސީއަށް ކުޅެދިން 77 މެޗުގައި ބަޓްޝުއާއީ ވަނީ 25 ލަނޑު ކާމިޔާބުކޮށްފައެވެ. އަދި އޭނާ ވަނީ ޗެލްސީއާއެކު އިނގިރޭސި ޕްރިމިއާ ލީގު ކާމިޔާބުކޮށްފައެވެ.
