އޭއެފްސީ ކަޕް ކެންސަލް ކޮށްފި

މި އަހަރުގެ އޭއެފްސީ ކަޕް ކެންސަލް ކުރަން އޭއެފްސީން ނިންމައިފިއެވެ.

ކޮވިޑް-19 އާ ގުޅިގެން އޭއެފްސީ ކަޕްގެ މެޗުތައް މެދުކަނޑާލީ މާޗު މަހުގެ ތެރޭގައެވެ. އަދި އޭގެ ފަހުން އޭއެފްސީން ވަނީ ގްރޫޕް ސްޓޭޖުގެ މެޗުތައް ސެންޓްރަލައިޒް ކޮށްގެން އޮކްޓޯބަރު މަހު އަލުން ފެށުމަށް ނިންމާފައެވެ. އެގޮތުން ދެކުނު އޭޝިއާއަށް ހާއްސަ ގްރޫޕްގެ މެޗުތައް ރާއްޖޭގައި ބޭއްވުމަށް އޭރު ނިންމިއެވެ.

އެކަމަކު އޭއެފްސީ ކަޕްގެ މެޗުތައް ދެކުނު އޭޝިއާ ސަރައްހަދު ފިޔަވައި އެހެން ސަރަހައްދުތަކުގައި ކޮވިޑް-19 ގެ ސަބަބުން ކުރިއަށްގެންދެވޭނެ ގޮތެއް ނެތްއިރު، ބައެއް ގްރޫޕްތަކުގެ މެޗުތައް ހޯސްޓް ކުރާނެ ގައުމެއްވެސް ހަމަޖެހިފައެއް ނުވެއެވެ.

އެހެންކަމުން މުބާރާތާ މެދު ގޮތެއް ނިންމަން އޭއެފްސީގެ ކޮމްޕެޓިޝަން ކޮމިޓީން ވަނީ ބައްދަލުވުމެއް ބާއްވާފައެވެ. އަދި އެ ބައްދަލުވުމަށްފަހު އޭއެފްސީގެ ހިންގާ ކޮމިޓީގެ ބައްދަލުވުމެއް އޮންލައިންކޮށް ބުރާސްފަތި ދުވަހު ބޭއްވިއިރު، މި ބައްދަލުވުމުގައި ވަނީ ކޮމްޕެޓިޝަން ކޮމިޓީގެ ލަފާގެ މަތިން އޭފްސީ ކަޕް މިއަހަރު ކުރިއަށް ގެންދެވޭނެ ގޮތެއް ނެތުމުން މުބާރާތް ކެންސަލް ކުރަން ނިންމާފައެވެ. އޭގެ އިތުރަށް އޭފްސީ ސޮލިޑާރިޓީ ކަޕާއި، އޭއެފްސީ ފުޓްސަލް ކުލަބު ޗެމްޕިއަންޝިޕްވެސް މިއަހަރު ނުބޭއްވުމަށް މި ބައްދަލުވުމުގައި ވަނީ ނިންމާފައެވެ.

އޭއެފްސީ ކަޕް ކެންސަލް ކުރި ނަމަވެސް، އޭއެފްސީ ޗެމްޕިއަންސް ލީގު މިއަހަރު ކުރިއަށްދާނެ ކަމަށާއި، އަދި މުބާރާތުގެ ފައިނަލް މެޗު ޑިސެމްބަރު މަހުގެ 19 ވަނަ ދުވަހު ބޭއްވުމަށް އޭއެފްސީން ވަނީ ނިންމާފައެވެ.

މިއަހަރުގެ އޭއެފްސީ ކަޕް ކެންސަލް ކުރިއިރު، އޭއެފްސީ ކަޕްގެ ދެކުނު އޭޝިއާގެ ޓީމުތަކުގެ ގްރޫޕްގައި މިފަހަރު ރާއްޖޭގެ ދެ ޓީމެއް ވާދަކުރިއެވެ. އެއީ މާޒިޔާ ސްޕޯޓްސް އެންޑް ރެކްރިއޭޝަނުގެ އިތުރުން ޓީސީ ސްޕޯޓްސް ކްލަބެވެ. ދެން މި ގްރޫޕްގައި ހިމެނުނީ ބަންގްލަދޭޝްގެ ބަޝުންދަރާ ކިންގްސް އާއި އިންޑިއާގެ ޗެންނާއީ ސިޓީ އެފްސީއެވެ.

މީގެ ކުރިން ގްރޫޕް ސްޓޭޖުގެ ފުރަތަމަ މެޗުގައި މާޒިޔާ އާއި ޓީސީ ވަނީ މާޗު މަހު 12 ވަނަ ދުވަހު ވާދަކޮށްފައެވެ. އެ ދުވަހު ބަންގްލަދޭޝްގައި އެ ގައުމުގެ ބަޝުންދަރާ ކިންގްސްއާ ދެކޮޅަށް ޓީސީ ކުޅުނު މެޗުން އެޓީމު ވަނީ 5-1 ން ބަލިވެފައެވެ. އަދި އިންޑިއާގައި މާޒިޔާ ވަނީ އެ ގައުމުގެ ޗެންނާއީ ސިޓީ އެފްސީއާ 2-2 ން އެއްވަރުކޮށްފައެވެ.