އުންމީދީ މިޑްފީލްޑަރު ޓޮނާލީ މިލާނަށް

ބްރެޝިއާއަށް ކުޅެމުން އަންނަ އިޓަލީގެ އުންމީދީ މިޑްފީލްޑަރު ސަންޑްރޯ ޓޮނާލީ ލޯނު އެއްބަސްވުމެއްގެ ދަށުން އޭސީ މިލާނާ ގުޅިއްޖެއެވެ.

ލޯނު އެއްބަސްވުމެއްގެ ދަށުން 10 މިލިޔަން ޔޫރޯއަށް ޓޮނާލީ މިލާނާ ގުޅުނީ އަންނަ ސީޒަނަށެވެ. އެކަމަކު މިލާނުން ބޭނުންވެއްޖެ ނަމަ، އަންނަ ސީޒަނަށްފަހު 15 މިލިޔަން ޔޫރޯއަށް ޓޮނާލީގެ އެއްބަސްވުން ދާއިމީ ކުރެވޭ ގޮތަށް ވަނީ ހިމަނާފައެވެ. އަދި ބޯނަސް ފައިސާ ލައިގެން އެ ޑީލް ނިމޭއިރު ޖުމްލަ 35 މިލިޔަން ޔޫރޯ މިލާނުން ޚަރަދުކުރަން ޖެހޭނެ ކަމަށް ވަނީ ރިޕޯޓުކޮށްފައެވެ.

އުމުރުން 20 އަހަރުގެ މިޑްފީލްޑަރު މިލާނާ ގުޅުނީ، މީގެ ކުރިން ވާދަވެރި އިންޓަ މިލާނުން އޭނާ ގެންދިއުމަށް ހުރިހާ ކަމެއް އެއްބަސްވެފައި ވަނިކޮށެވެ. ރިޕޯޓުތައް ބުނާ ގޮތުގައި އިންޓަ އޮތީ މިއަހަރުގެ އޭޕްރީލް މަހުން ފެށިގެން ބްރެޝިއާއާއެކު އަދި ޓޮނާލީއާއެކު އަނގަ ބަހުން އެއްބަސްވުމަކަށް އައިސްފައެވެ. އެކަމަކު އިންޓައިން ތަޖުރިބާކާރު މިޑްފީލްޑަރު އާޓޫރޯ ވިޑާލް ނުވަތަ އެންގޯލޯ ކާންޓޭ ގެނައުމަށް މަސައްކަތް ފެށުމާއެކު، މިލާނުން ވަނީ އޭގެ ފައިދާ ނަގާ ޓޮނާލީއާއެކު އެއްބަސްވުމެއް ހަދާފައެވެ.

މީގެ ކުރިން ޓޮނާލީ ހޯދުމަށް އިނގިރޭސި ޕްރިމިއާ ލީގުގެ ކުލަބުތަކުންވެސް ވަނީ މަސައްކަތް ކޮށްފައެވެ.

އިޓަލީގެ ދެވަނަ ޑިވިޝަނުގައި އޮތް ބްރެޝިއާއިން ކެރިއަރު ފެށި ޓޮނާލީ ވަނީ މިދިޔަ ސީޒަނުގައި އެ ޓިމުން ފުރަތަމަ ޑިވިޝަނުގައި ވާދަކުރިއިރު މޮޅު ކުޅުމެއް ދައްކާފައެވެ. އެގޮތުން މިދިޔަ ސީޒަނުގައި ޖުމަލް 36 މެޗު އޭނާ ބްރެޝިއާއަށް ކުޅެދިންއިރު، އެއް ލަނޑު ވަނީ ކާމިޔާބުކޮށްފައެވެ.

އައު ސީޒަނަސް ސްކޮޑް ވަރުގަދަ ކުރުމަށް މިލާނުން ޓޮނާލީ ގެނައިރު، އެޓީމުން އަންނަނީ މޮނާކޯގެ މިޑްފީލްޑަރު ޓިމެޔޯ ބަކަޔޯކޯ އާއި، ރެއާލް މެޑްރިޑްގެ މިޑްފީލްޑަރު ބްރަހިމް ޑިއާޒް އަދި ޓޮޓެންހަމް ހޮޓްސްޕާގެ ޑިފެންޑަރު ސާޖް އޮރިއޭ ގެންނަންވެސް މަސައްކަތްކުރަމުންނެވެ.