އެމެރިކާ ވެއްޓެމުން އެދަނީ ބޮޑު އިންފެކްޝަނެއްގެ ތެރެއަށް: އެފްޑީއޭގެ ކުރީގެ ވެރިޔާ

ކޮވިޑް-19 އެންމެ ހަލުވިކަމާއެކު ފެތުރެމުން އަންނަ އެމެރިކާ ވެއްޓެމުން އެދަނީ ބޮޑު އިންފެކްޝަނެއްގެ ތެރެއަށް ކަމަށް އެ ގައުމުގެ ފުޑް އެންޑް ޑްރަގް އެޑްމިނިސްޓްރޭޝަންގެ ކުރީގެ ވެރިޔާ ޑރ. ސްކޮޓް ގޮޓްލީވް ވިދާޅުވެއްޖެއެވެ.

ޑރ. ސްކޮޓް މިހެން ވިދާޅުވެފައިވަނީ ކުރިއަށް އޮތް ފިނި މޫސުމުގައި ކޮވިޑް-19 އާއި ދެކޮޅަށް މަސައްކަތް ކުރުން އުނދަގޫވާނެކަން ހާމަކުރައްވަމުންނެވެ. އޭނާ ވިދާޅުވީ މިހާރު ވެސް ކޮވިޑް ފެތުރުން ކޮންޓްރޯލް ކުރުމަށް ނުކުޅެދިފައިވާ އިރު ކުރިއަށް އޮތް ފިނި މޫސުމަކީ ގޮންޖެހުމެއް ކަމަށެވެ.

ސީބީއެސްއަށް ދެއްވި އިންޓަރވިއުއެއްގައި ޑރ. ސްކޮޓް ވިދާޅުވީ ފިނި މޫސުމުގެ ތެރޭގައި ކޮވިޑް ފެތުރުން ކޮންޓްރޯލް ކުރުމަށް ދަތިވާނެ ކަމަށާއި، ހޫނު މޫސުމުގައި ދިމާވި ގޮންޖެހުންތަކަށްވުރެ ބޮޑެތި ގޮންޖެހުންތަކާއި ކުރިމަތިވާނެ ކަމަށެވެ. އެމެރިކާގައި ފާހަގަ ކުރާ މަސައްކަތްތެރިންގެ ދުވަހާ ގުޅުވައިގެން ޑރ. ސްކޮޓް ވިދާޅުވި މެމޯރިއަލް ޑޭގައި ފެނުނު ކޭސްތައް އިންތިހާއަށް އިތުރުވެފައިވާ އިރު، މަސައްކަތްތެރިންގެ ދުވަހު މީހުން އެއްވުމުގެ ސަބަބުން އިންފެކްޝަން ފެތުރިގެންދާ މިންވަރު އިތުރުވާނެ ކަމަށެވެ. އަދި މަސައްކަތްތެރިންގެ ދުވަސް ފާހަގަ ކުރުމަށް މީހުން އެއްވެފައިވާތި އެކަމާއި ގުޅިގެން ވެސް ޑރ. ސްކޮޓް ވަނީ ކަންބޮޑުވުން ފާޅުކުރައްވާފައެވެ.

ޑރ. ސްކޮޓް ވިދާޅުވީ މެމޯރިއަލް ޑޭގައި އެކަނި ވެސް 40 ހާހަށްވުރެ ގިނަ މީހުން އެޑްމިޓްކޮށްގެން ފަރުވާ ދީފައިވާ ކަމަށާއި، ދުވާލެއްގެ މައްޗަށް 21 ހާހަށްވުރެ ގިނަ މީހުން ބައްޔަށް ފަރުވާ ދީފައިވާ ކަމަށެވެ. އަދި އެ ދުވަހު އެކަނި ވެސް 1100 މީހުން މަރުވެފައިވާ ކަމަށެވެ. އާދިއްތަ ދުވަހު އެކަނި ވެސް 35 ހާހަށްވުރެ ގިނަ މީހުން ވަނީ ކޮވިޑަށް ޕޮޒިޓިވްވެފައެވެ.

ޑރ. ސްކޮޓް ވިދާޅުވީ ދުވާލެއްގެ މައްޗަށް މިހާރުވެސް 40،000 ގާތްކުރަ އަދަދަކަށް ޕޮޒިޓިވްވަމުން އަންނަ އިރު، ހަފްތާއެއްގެ މައްޗަށް ބަލާނަމަ ދުވާލެއްގެ މައްޗަށް 850 މީހުން މަރުވަމުންދާ ކަމަށެވެ. މި އަދަދުތަކަށް ރިއާޔަތްކޮށް އޭނާ ވިދާޅުވީ ފިނި މޫސުމަކީ ބަލި ފެތުރޭ މިންވަރު އިތުރުވާ ދުވަސްވަރެއް ކަމުން ކުރިއަށް އޮތީ ނުރައްކާތެރި ދުވަސްތަކެއް ކަމަށެވެ.

ބަލިމަޑުކަން ފެތުރެން ފެށިތާ މަސް ދުވަސް ވީއިރު އެމެރިކާ އާންމުން ވަރުބަލިވެފައިވާ ކަމަށް ޑރ. ސްކޮޓް ފާހަގަ ކުރެއްވިއެވެ. ޑރ. ސްކޮޓް ވަނި އިންފެކްޝަންގެ ތެރެއަށް ވެއްޓެމުން މި ދަނޑިވަޅުގައި މާސްކް އަޅާ މީހުންނާއި އިޖްތިމާއީ ގައިދުކަން ބަހައްޓާ މީހުންގެ އަދަދު ދަށް ވެގެންދާނެ ކަމަށް ލަފާ ކުރެވޭ ކަމަށެވެ.

ޑރ. ސްކޮޓް ވިދާޅުވީ ކޮވިޑާއި ގުޅިގެން އާންމުން ގޭގައި ތިބެ ވަރުބަލިވެއްޖެ ކަމަށާއި، ކުދި ވިޔަފާރިތަކަށް ގެއްލުން ލިބެމުންދާ ކަމަށެވެ. އެހެންކަމުން އާންމުން ކުރިއަށް އޮތްތަނުގައި މި ކަންތައްތަކާއި ދުރުވެ ފިނި މޫސުމުގައި ފެންނަ މަންޒަރު ބަދަލު ވެގެންދާނެ ކަމަށެވެ.

އާދީއްތަ ދުވަހުގެ ނިޔަލަށް އެމެރިކާގައި ކޮވިޑް-19 ޖެހުނު މީހުންގެ އަދަދު ވަނީ 6.4 މިލިއަނަށް އަރާފައެވެ. ދުވާލެއްގެ މައްޗަށް އެ ގައުމުގައި 40،000 އާއި ގާތް ކުރާ އަދަދަކަށް މީހުން ޕޮޒިޓިވްވަމުން އަންނަ އިރު ދުވާލެއްގެ މައްޗަށް ހާހަކާއި ގާތް ކުރާ އަދަދަށް މީހުން މަރުވެއެވެ.

ކޮވިޑް-19 ޖެހުނު މީހުންގެ ލިސްޓުގެ އެއްވަނައިގައި އޮތީ އެމެރިކާއެވެ. ދެވަނައިގައި އޮތް ބްރެޒިލް ވައްޓާލުމަށްފަހު މިހާރު ދެވަނައިގައި 4.2 މިލިއަން ޕޮޒިޓިވް ކޭސްއާއެކު އޮތީ އިންޑިއާއެވެ.