ޕެނަމާ ގައުމީ ޓީމަށް ކުޅުނު ހެންރިކުއޭޒް ގަޔަށް ބަޑިޖަހާ މަރާލައިފި

ޕެނަމާ ގައުމީ ޓީމަށް ކުރިން ކުޅެފައިވާ ތަޖުރިބާކާރު މިޑްފިލްޑަރު އަމިލްކާ ހެންރިކުއޭޒް ގަޔަށް ބަޑި ޖަހާ މަރާލައިފި އެވެ.

ހޮނިހިރު ދުވަހުގެ ވަގުތެއްގައި ހެންރިކުއޭޒް ގަޔަށް ބަޑިޖަހާ މަރާލާފައިވަނީ ކޮލަމްބިއާގެ ޓައުންއެއްކަމަށްވާ ނުއެވޯ ކޮލޯންގައެވެ. އެހެންނަމަވެސް އޭނާ މަރާލި ސަބަބެއް އަދި ކަށަވަރެއް ނުވެއެވެ. ރިޕޯޓްތައް ބުނާގޮތުން އޭނާ މަރާލީ ދިރިއުޅޭ ގެއިން ނިކުތްތަކުންނެވެ.

ރިޕޯޓްތައް ބުނާގޮތުން ހެންރިކުއޭޒް މަރުވެފައިވަނީ ހޮސްޕިޓަލަށް ގެންގޮސް ލިބިފައިވާ ޒަހަމްތަކަށް ފަރުވާދެމުން ދަނިކޮށެވެ. ހެންރިކުއޭޒް ގެންގޮސްފައިވަނީ ޕެނަމާގެ ސަބަނިޓަސްގައި ހުންނަ ހޮސްޕިޓަލަކަށެވެ.

ޕެނަމާ ގައުމީ ޓީމަށް 75 މެޗު ކުޅެފައިވާ އުމުރުން 33 އަހަރުގެ ހެންރިކުއޭޒްގެ މަރާއެކު އެގައުމުގެ ފުޓުބޯޅަ ފެޑެރޭޝަނުން ވަނީ ބަޔާނެއް ނެރެފައެވެ. އެ ބަޔާނުގައި ބުނެފައިވަނީ ހެންރިކުއޭޒްގެ މަރުގެ ހަބަރަކީ ވަރަށް ހިތާމަވެރި ހަބަރެއް ކަމަށާއި، އޭނާގެ އާއިލާ އަށް ހެޔޮ ރަހްމަތް ލެއްވުމަށް އެދި ދުއާ ކުރާ ކަމަށެވެ.

ހެންރިކުއޭޒްގެ މަރާއެކު މެކްސިކޯ ފުޓުބޯޅަ ފެޑެރޭޝަނުންވެސް ވަނީ މި ހިތާމަވެރި ވަގުތު އޭނާގެ އާއިލާއާއެކު ތިބިކަން ފާހަގަކޮށް ބަޔާނެއް ނެރެފައެވެ.

ހެންރިކުއޭޒް ޕެނަމާ ގައުމީ ޓީމަށް ކުޅެން ފަށާފައިވަނީ 2005 ވަނަ އަހަރުއެވެ. އޭނާ ވަނީ 2018 ވަނަ އަހަރު ރަޝިއާގައި ބާއްވާ ވޯލްޑް ކަޕް ކޮލިފައިންގައި އެމެރިކާ އަތުން 1-1 ގެ ނަތީޖާއިން ޕެނަމާ އެއްވަރުވި މެޗުގައި ކުޅެފައެވެ.

ކޮލަމްބިއާގެ ކްލަބް އެމެރިކާ ޑީ ކާލީ އަށް މިދިޔަ ސީޒަނުގައި ކުޅުމަށްފަހު ހެންރިކުއޭޒް ވަނީ މި ސީޒަނަށް ޕެނަމާގެ އަރާބޭ ޔުނިޑޯ އަށް ބަދަލުވެފައެވެ. އެގޮތުން އޭނާ ކުޅެމުންދިޔައީ އެޓީމަށެވެ.