ދައުލަތާއި ދައުވާ ލިބޭ ފަރާތުގެ ގާނޫނީ ވަކީލުންނަށް ލެޕްޓޮޕާއި ޓެބްލެޓާއި ސްމާޓް ފޯނު ޝަރީއަތުގެ މަޖިލީހަށް ވެއްދުމުގެ ފުރުސަތު ދިނުމަށް ކްރިމިނަލް ކޯޓުން ނިންމައިފި އެވެ.

ކްރިމިނަލް ކޯޓުން ހޯމަ ދުވަހު ބުނީ، ކޮވިޑް-19 އާ ގުޅިގެން ރާއްޖޭގައި އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާން ކޮށްފައިވުމާއެކު، މި ބަލި ފެތުރުން ކޮންޓްރޯލް ކުރުމުގެ ގޮތުން އަތުން އަތަށް ބަދަލު ކުރެވޭ ލިޔެކިޔުންތައް ވީހާވެސް މަދުކުރުމަށްޓަކައި، ޕްރޮސެކިއުޓަރ ޖެނެރަލް (ޕީޖީ)ގެ ފަރާތުން ކްރިމިނަލް ކޯޓަށް އިލެކްޓްރޯނިކް ޒަރީއާ އިން މައްސަލަ ހުށަހެޅުމުގެ އިންތިޒާމުތައް ހަމަޖައްސައި، ކޯޓަށް ހުށަހަޅާ މައްސަލަތަކުގެ ލިޔުންތައް އީމެއިލްގެ ޒަރީއާ އިން ދައުވާ ލިބޭ ފަރާތްތަކަށް ފޮނުވަމުންދާ ކަމަށެވެ. އަދި ކޯޓަށް ހާޒިރުވާ ވަކީލުންނަށް ވެސް މައްސަލަތަކުގެ ލިޔެކިޔުންތަކުގެ ކަރުދާސް ކޯޓަށް ގެނައުމުގެ ބަދަލުގައި، އެ ލިޔުމުގެ ޑިޖިޓަލް ކޮޕީ ބޭނުންކު ރުމުގެ ފުރުސަތު ދިނުމަށް މިހާރު ނިންމާފައިވާ ކަމަށެވެ.

މީގެއިތުރުން، ޖިނާއީ އިޖުރާއަތުގެ ޤާނޫނުގެ 116 ވަނަ މާއްދާގެ ދަށުން، ޝަރީޢަތުގެ އަޑުއެހުންތަކުގެ ތާވަލް އެކުލަވާލަމުންދަނީ ދައުލަތާއި ދަޢުވާ ލިބޭ ފަރާތާ މަޝްވަރާ ކުރުމަށްފަހުގައި ކަމަށް ކްރިމިނަލް ކޯޓުން ބުނެއެވެ. އަދި އިބްތިދާއީ އަޑުއެހުން ނިމިގެން ޝަރީޢަތަށް ތާވަލް ކުރާއިރު، ދެގޮތަކަށް ތާވަލް ކުރެވޭ ކަމަށާއި ފުރަތަމަ ގޮތަކީ، ދެފަރާތުން ހެކިން ގެނެވޭނެ ކަމުގެ ޔަގީންކަން އޮތްނަމަ، ޝަރީޢަތުގެ އެއް އަޑުއެހުން އޮންނަ ގޮތަށެވެ. އެ އަޑުއެހުމުގައި ދެފަރާތުގެ ހެކިންގެ ހެކިބަސް ނަގައި ޚުލާސާ ބަޔާން ވެސް ހުށައަޅާ ގޮތަށެވެ.

ދެވަނަ ގޮތަކީ، އެއްދުވަހު ދެފަރާތުގެ ހެކިން ގެނެވޭނެކަމުގެ ޔަގީންކަން ނެތް ނަމަ، އަޑުއެހުންތައް ބާއްވާނެ ދުވަސްތަކެއް ދުރާލައި ކަނޑައަޅައި، ތާވަލެއް އެކުލަވާލަނީއެވެ. ބުނެވިދިޔަ ދެ ގޮތުގެމަތިން ޢަމަލު ކުރާނީ ދައުލަތާއި ދަޢުވާ ލިބޭ ފަރާތާ މަޝްވަރާކޮށް، ދެފަރާތުގެ ވަކީލުންގެ ތާވަލަށް ބަލައިގެން ކަމަށް ކްރިމިނަލް ކޯޓުން ބުނެއެވެ.

ކްރިމިނަލް ކޯޓުން ބުނީ، މައްސަލައިގެ އަޑުއެހުންތައް ތާވަލުކުރުމަށް ވަކީލުންނާ މަޝްވަރާ ކުރަން ބަލާއިރު، ޢާންމު ގޮތެއްގައި ވަކީލުންގެ ތާވަލު އިންތިޒާމު ކުރަމުން ގެންދަނީ އޮންލައިން އެޕްލިކޭޝަންތަކުގެ އެހީގައި ކަމަށް ވުމާއެކު، ޝަރީޢަތުގެ މަޖިލީހަށް ލެޕްޓޮޕާއި ޓެބްލެޓާއި ފޯނު ފަދަ ވަސީލަތްތައް ނުވެއްދޭތީ، ތާވަލު ބެލުމުގެ ފުރުޞަތު ދިނުމަށް ވަކީލުން އެދެމުންދާ ކަމަށެވެ. އެ ފުރުޞަތު ދިނުމަށްޓަކައި ޝަރީޢަތުގެ އަޑުއެހުން މެދުކަނޑާލަން ޖެހޭ ކަމަށް ކްރިމިނަލް ކޯޓުން ބުނެއެވެ. އަދި ނަތީޖާއެއްގެ ގޮތުން ކޯޓާއި ވަކީލުންގެ ވަރަށް ގިނަ ވަގުތު ގެއްލިގެންދާ ކަމަށް ކޯޓުން ބުނެއެވެ.

މި ކަމަށް ޙައްލެއް ހޯދުމުގެ ގޮތުން، 07 ސެޕްޓެމްބަރ 2020 އިން ފެށިގެން، ދައުލަތާއި ދަޢުވާ ލިބޭ ފަރާތުގެ ވަކީލުންނަށް ލެޕްޓޮޕާއި ޓެބްލެޓާއި ސްމާޓްފޯން ޝަރީޢަތުގެ މަޖިލީހަށް ވެއްދުމުގެ ފުރުޞަތު ދިނުމަށް ކްރިމިނަލް ކޯޓުގެ ޤާޟީންގެ މަޖިލީހުން ނިންމާފައިވާ ކަމަށް އެކޯޓުން ބުނެފައި ވެއެވެ.

ދައުލަތާއި ދަޢުވާ ލިބޭ ފަރާތުގެ ވަކީލުންނަށް ލެޕްޓޮޕާއި ޓެބްލެޓާއި ސްމާޓް ފޯން ޝަރީޢަތުގެ މަޖިލީހަށް ވެއްދުމުގެ ފުރުޞަތު ދިން ނަމަވެސް، މި ވަސީލަތްތައް މެދުވެރިކޮށްގެން ޝަރީޢަތުގެ މަޖިލީހުގެ ކަންކަން ރެކޯޑްކޮށް ފޮޓޯ ނަގާ ހެދުމަކީ މަނާ ކަމެއް ކަމަށް ކްރިމިނަލް ކޯޓުން ބުނެއެވެ. އަދި އެފަދަ ކަމެއް ކޮށްފިނަމަ، އެ ވަކީލަކާމެދު ފިޔަވަޅު އެޅުމުގެ އިޚްތިޔާރު މައްސަލަ ބަލާ ޤާޟީއަށް ލިބިގެންވާ ކަމަށާއި މި ބަދަލުތަކަކީ ޖިނާއީ ޢަދުލު ނިޒާމުގެ ދުވެލި އަވަސްކޮށް ޒަމާނީ އުޞޫލުތައް ތަޢާރަފު ކުރުމަށް ކްރިމިނަލް ކޯޓުން ކުރަމުންދާ މަސައްކަތް ތަކުގެ ތެރެއިން އެޅި ފިޔަވަޅެއް ކަމަށް ވެސް ކްރިމިނަލް ކޯޓުން ބުނެފައި ވެއެވެ.