ސިޓީގެ މާރޭޒް އާއި ލަޕޯޓް ކޮވިޑް-19 އަށް ޕޮޒިޓިވް ވެއްޖެ

މެންޗެސްޓާ ސިޓީއަށް ކުޅެމުން އަންނަ އަލްޖީރިއާގެ ފޯވާޑް ރިޔާދް މާރޭޒް އާއި ފްރާންސްގެ ޑިފެންޑަރު އައިމެރިކް ލަޕޯޓް ކޮވިޑް-19 އަށް ޕޮޒިޓިވް ވެއްޖެއެވެ.

މި ދެ ކުޅުންތެރިން ކޮވިޑް-19 އަށް ޕޮޒިޓިވްވިކަން ހޯމަ ދުވަހުގެ ވަގުތެއްގައި ސިޓީން ވަނީ ކަށަވަރުކޮށްދީފައެވެ.

ސިޓީން ނެރުނު ބަޔާނެއްގައި ބުނީ މާރޭޒް އާއި ލަޕޯޓް ކޮވިޑް-19 އަށް ޕޮޒިޓިވްވުމާއެކު އިނގިރޭސިވިލާތުގެ ސަރުކާރުންނާއި އިނގިރޭސި ޕްރިމިއާ ލީގުން ކަނޑައަޅާފައިވާ ކަރަންޓީން އުސޫލުގެ ދަށުން ދެ ކުޅުންތެރިންވެސް ސެލްފް-އައިސޮލޭޝަނަށް ގޮސްފައިވާ ކަމަށެވެ. އަދި ދެ ކުޅުންތެރިންގެ ހަށިގަނޑުންވެސް ވައިރަހުގެ އަލާމާތެއް ފެނިފައިނުވާ ކަމަށް ސިޓީން ވަނީ ބުނެފައެވެ.

ސިޓީގެ ދެ ކުޅުންތެރިން ކޮވިޑް-19 އަށް ޕޮޒިޓިވްވިއިރު، އައު ސީޒަނުގެ އިނގިރޭސި ޕްރިމިއާ ލީގުގައި މި މަހުގެ 21 ވަނަ ދުވަހު ވުލްވްސްއާ ދެކޮޅަށް ސިޓީ ނުކުންނާނެއެވެ. މި މަހުގެ 12 ވަނަ ދުވަހު ޕްރިމިއާ ލީގު އަލުން ފަށަން ތާވަލުކޮށްފައި އޮތް ނަމަވެސް، ސިޓީގެ ފުރަތަމަ މެޗު ހަފުތާއެއް ފަހުން ކުޅުމަށް ތާވަލުކުރީ އެޓީމުން މިދިޔަ އޮގަސްޓް މަހު ޔުއެފާ ޗެމްޕިއަންސް ލީގުގައި ވާދަކުރުމާ ގުޅިގެންނެވެ.