ނައިފަރު ރައްޔިތުން ތިބީ ބިރުވެރި ކަމެއްގެ ތެރޭގައި ކަމަށް އެ ރަށުގެ ކައުންސިލްގެ ރައީސް ވިދާޅުވެއްޖެ
7 ސެޕްޓެމްބަރު 2020 | ހޯމަ 08:13މުޅިއެކު 9 މީހުން އެރަށުން ކޮވިޑް-19 އަށް ޕޮޒެޓިވް ވެފައިވޭ
ނައިފަރުން 9 މީހަކު ވަނީ ކޮވިޑަށް ޕޮޒެޓިވް ވެއްޖެ
ރަށުގެ ރައްޔިތުން ތިބީ ބިރުވެރި ކަމެއްގެ ތެރޭގައި ކަމަށް ޅ.ނައިފަރު ކައުންސިލްގެ ރައީސް މުހައްމަދު ކާރިމް ވިދާޅުވެއްޖެއެވެ.
ހޯމަ ދުވަހު ރާއްޖެ ޓީވީގެ ކޮވިޑް-19 ގެ ހާއްސަ ކަވަރޭޖުގައި ވާހަކަ ދައްކަވަމުން ކާރިމްވަނީ ރަށުގެ ހާލަތު ހިއްސާ ކުރައްވާފައެވެ. އަދި މުޅިއެކު 9 މީހުން އެރަށުން ކޮވިޑް-19 އަށް ޕޮޒެޓިވް ވެފައިވާކަމަށާ މިހާރު އެތަނުން އެކަކު ރަނގަޅު ވެފައިވާކަމަށް އޭނާ މައުލޫމާތު ދެއްވިއެވެ.
ކާރިމް އިތުރަށް ވިދާޅުވީ ކޮންޓެކްޓް ޓްރޭސިންގް އާ ޓެސްޓުކުރުމުގެ ކަންކަން ނިމިފައިވާކަމަށެވެ. މިހާރު ޕޮޒިޓިވް ވެގެން އުޅެނީ ހޯމް ކަރަންޓީނަށް ގެނައި ބައެއްް ކަމަށާ އެމީހުންގެ ސާމްޕަލް ޕޮޒިޓިވް ވެފައި ވަނީ 14 ދުވަހަށް ފަހު ކުރި ޓެސްޓުން ކަމަށެވެ. މިހާރު ރަށުގެ ހާލަތު ނޭނގެ ކަމަށާއި ރަށުގެ އެންމެހާ ރައްޔިތުންވެސް ތިބީ ބިރުވެރި ކަމެއްގެ ތެރޭގައި ކަމަށް ކާރިމް ވިދާޅުވިއެވެ.
އަދި އެއްޗެހި ހަވާލު ކުރުމުގެ ތެރެއިން އާއްމުންނާ ކޮންޓެކްޓް ވެފައިވާކަމަށް ބެލެވޭ ކަމަށްވެސް ކާރިމް ފާހަގަ ކުރެއްވިއެވެ. ހޮސްޕިޓަލުން މިހުރިހާ ކަމެއްވެސް ނުހަނު ގާތުން ބަލަމުން ދާއިރު ވަސީލަތްތައް މަދުވަމުން ދާކަމަށް ކާރިމް ވިދާޅުވިއެވެ. ރަށު ތެރެއިން ކައުންސިލުން ބޭނުންވާ ބައެއް ތަކެރި ލިބުމަށް ދަތިތަކާ ކުރިމަތި ވަމުން ދާކަމަށްވެސް ކާރިމް މައުލޫމާތު ދެއްވިއެވެ.
ރައްޔިތުންގެ އަމަލުތައް ކިޔާދެއްވެމުން ކާރިމް ވިދާޅުވީ ބައެއް ފަރާތްތަކުން މާސްކު އަޅައިގެން އުޅޭއިރު އަނެއްބައި ފަރާތްތަކުން މާސްކު ނާޅާ ކަމަށާއި މިކަމާ ގުޅިގެން ކައުންސިލުން އަދި ހޮސްޕިޓަލުންވެސް ރައްޔިތުންނަށް ރައްކާތެރިކަމުގެ ފިޔަވަޅުތަށް އެޅުމަށް ނަސޭހަތްތެރި ވަމުން ދާކަމަށެވެ. އަދި ބައެއް ބޯޓުތަކުން ގެންނަ ތަކެތި ޑިސްއިންފެކްޓް ނުކުރެވޭ ކަމަށްވެސް އޭނާ އިތުރަށް ވިދާޅުވިއެވެ.
ރަނގަޅަށް ހުރިހާ ކަމެއް މޮނިޓަރ ނުކުރެވޭ ކަމަށާ މަސައްކަތް ހަވާލު ކޮށްފައިވާ ފަރާތްތަކުން ރަނގަަޅަށް މަސައްކަތް ނުކުރާ ކަމަށްވެސް ކާރިމް ފާހަގަ ކުރެއްވިއެެވެ.
ކޮންމެސް ވަރަކަށް މާލެއިން ދާ ފަރާތްތަކާމެދު ބައެއް ރަށްރަށުގެ ރައްޔިތުން ތަފާތު ކުރުން ގެންގުޅޭ ކަމަށާ ނަމަވެސް ނައިފަރުގައި އެހާބޮޑަށް މިކަން ފާހަގަ ނުކުރެވޭ ކަމަށް ކާރިމް ހިއްސާކުރެއްވިއެވެ. އަދި އެކަކު އަނެކަކުގެ ހާލު ބަލަމުން ދާކަމަށާ ގިނަ ރައްޔިތުން އުޅެނީ ގުޅިގެން ކަމަށްވެސް ކާރިމް ފާހަގަ ކުރެއްވިއެވެ.
