ރާއްޖެ ސަސްޕެންޑް ކުރާނެ ކަމުގެ އެއްވެސް ވާހަކައެއް ސިޓީގައި ހިމަނާފައެއް ނެތް: ހަސަން ލަތީފް

ކޯޓަށް ގޮސްފިނަމަ ޓޭބަލް ޓެނިސް އެސޯސިއޭޝަން އޮފް މޯލްޑިވްސް ސަސްޕެންޑް ކުރާނެ ކަމުގެ އެއްވެސް ވާހަކައެއް އިންޓަނޭޝަނަލް ޓޭބަލް ޓެނިސް ފެޑެރޭޝަން (އައިޓީޓީއެފް) އިން ފޮނުވި ސިޓީގައި ހިމަނާފައި ނުވާ ކަމަށް ޤާނޫނީ ވަކީލު ހަސަން ލަތީފް ވިދާޅުވެއްޖެއެވެ.

ޓީޓީ އެސޯސިއޭޝަނުގެ އިންތިޚާބުގެ މައްސަލަ ސިވިލް ކޯޓަށް ހުށަހަޅާފައިވާއިރު، ކޯޓުން އަންނަނީ އެ މައްސަލަ ބަލަމުންނެވެ. ޓީޓީ އެސޯސިއޭޝަނުގެގެ މައްސަލަ ކޯޓަށް ހުށަހަޅާފައިވަނީ އެ އެސޯސިއޭޝަނުގެ ހިންގާ ކޮމިޓީގައި ހިމެނިވަޑައިގަންނަވާ އަދި ކުރީގެ މަޝްހޫރު ޓީޓީ ކުޅުންތެރިޔާ އަލީ އާދަމް މަނިކް (ތާޅަފިލި އަލިބެ) އެވެ. އަލިބެގެ ޤާނޫނީ ވަކީލަކީ ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު އަދި އެމްޑީޕީގެ ޗެއާޕާސަން ހަސަން ލަތީފެވެ.

މި މައްސަލަ ކޯޓަށް ހުށަހެޅުމާއެކު ޓީޓީ އެސޯސިއޭޝަނުން ވަނީ ތިންވަނަ ފަރާތަކުން ނުފޫޒު ފޯރުވާނަމަ، އައިޓީޓީއެފްއިން ރާއްޖެ ސަސްޕެންޑް ކުރާނެ ކަމުގެ އިންޒާރެއް ލިބިފައިވާ ކަމަށް ބުނެފައެވެ. އެކަމަކު ތާޅަފިލި އަލިބެ ވަނީ އެވާހަކަތައް ދޮގު ކުރައްވާފައެވެ.

މީގެ ކުރިން ޓީޓީގެ އިންތިޚާބު މައްސަލަ ސިވިލް ކޯޓަށް ހުށަހެޅުމާއެކު، ޓީޓީ އެސޯސިއޭޝަނުން ވަނީ މި މައްސަލަ ސިވިލް ކޯޓަށް ނުބެލޭނެ ކަމަށް ބުނެފައެވެ. އެއާއެކު އާދީއްތަ ދުވަހު ސިވިލް ކޯޓުން ނެރުނު އިޖުރާއީ ނިންމުމުގައި ބުނެފައިވަނީ މި މައްސަލަ ސިވިލް ކޯޓަށް ބަލައި ނުގަނެވޭނެ ކަމަށް ޓީޓީ އެސޯސިއޭޝަނުން ދެއްކި ވާހަކަތަކަކީ އެއްވެސް އަސާސެއްގެ މައްޗަށް ބިނާވެފައިވާ ވާހަކަތައް ނޫން ކަމަށާއި، މި މައްސަލަ އެ ކޯޓަށް ބެލޭނެ ކަމަށެވެ.

ރާއްޖެޓީވީއަށް ދިން އިންޓަވިއުއެއްގައި ހަސަން ލަތީފް ވިދާޅުވީ އައިޓީއެފްއިން ޓީޓީ އެސޯސިއޭޝަނަށް ފޮނުވި ސިޓީގައި ބުނެފައިވަނީ އެ އެސޯސިއޭޝަނުގެ ހިންގާ ގަވާއިދުގެ ތެރެއަށް ނިންމާ ކަންކަމަށް ހުރިހާ ފަރާތްތަކަކުންވެސް އިހުތިރާމް ކުރަންވާނެ ކަމަށެވެ. އެގޮތުން ތާޅަފިލި އަލިބެ އާއި ހިންގާ ކޮމިޓީގައި ދެން ތިއްބެވި އަނެއް ދެ މެންބަރުން ކަމަށްވާ އާއިޝަތު ނިޝާ އަދި އިބްރާހީމް ލަތީފް، ސްޕޯޓްސް ކޮމިޝަނާއި ސްޕޯޓްސް ކައުންސިލަށްވެސް އެދެފައިވާނީ ހިންގާ ގަވާއިދުގައި ބަޔާންކޮށްފައިވާ ކަންކަން ކޮށްދިނުމަށްފަހު މިނިވަން އިންތިޚާބެއް ބޭއްވުމަށް ކަމަށާއި، އައިޓީއެފްއިން ފޮނުވި ލިޔުމުގައި ކޯޓަށް ނުދެވޭނެ ކަމަށާއި، ކޯޓަށް ގޮސްފިނަމަ ރާއްޖެ ސަސްޕެންޑް ކުރާނެ ކަމުގެ އެއްވެސް ވާހަކައެއް ހިމަނާފައި ނުވާ ކަމަށްވެސް ހަސަން ލަތީފް ވިދާޅުވިއެވެ.

މީގެ ކުރިން ތާޅަފިލި އަލިބެ ނެރުއްވި ބަޔާނުގައިވެސް ބުނެފައިވަނީ އިންސާފު ހޯދުމަށް ކުރެވޭ މަސައްކަތާއި ދެކޮޅަށް ބައެއް ފަރާތްތަކުން ދައްކާ ވާހަކަތަކުގެ ތެރޭގައި އެކަމުގެ ސަބަބުން ޓީޓީގެ ބައިނަލްއަގުވާމީ އިދާރާ ކަމަށްވާ އައިޓީޓީއެފްއިން ރާއްޖޭގެ ޓީޓީ އެސޯސިއޭޝަނާ މެދު ފިޔަވަޅު އަޅައި، އަދި އެފިޔަވަޅުތަކުގެ ސަބަބުން ރާއްޖޭގެ ޓީޓީ ސަސްޕެންޑްވެދާނެ ކަމަށް ބުނެ ދޮގު މައުލޫމާތު ފަތުރަމުން ގެންދާ ކަމަށެވެ. އަދި އެއީ ކަނޑައެޅިގެން ކޯޓުގައިވާ މައްސަލައަށް ނުފޫޒު ފޯރުވަން ކުރަމުންދާ މަސައްކަތެއް ކަމަށްވެސް ވަނީ ވިދާޅުވެފައެވެ.

އެކަމަކު އާދީއްތަ ދުވަހު ޓީޓީ އެސޯސިއޭޝަނުގެ ޤާނޫނީ ވަކީލު މުޙައްމަދު ޖައުޝަން ޝަރީފް ވިދާޅުވީ ސަސްޕެންޝަނުގެ ވާހަކަތަކަކީ ހަގީގަތެއް ކަމަށެވެ. އަދި ކުޅިވަރުގެ މައްސަލައެއް ކޯޓަށް ހުށަހެޅޭނެ ގޮތެއް ކުޅިވަރުގެ ޤާނޫނުގައިވެސް ހިމެނިފައި ނެތްކަން އެނގެން އެބައޮތް ކަމަށާއި، މައްސަލަ ހުށަހެޅި ފަރާތުން އައިޓީޓީއެފްއިން ފޮނުވި ސިޓީގައިވާ ކަންތައްތަކަށް ނުބަލައި ހަގީގަތާ ޚިލާފު ވާހަކަތަކެއް ފަތުރާތީ ހިތާމަކުރާ ކަމަށްވެސް ވިދާޅުވިއެވެ.

ޓީޓީ އެސޯސިއޭޝަން މައްސަލަ ކޯޓުގައި އޮތް ނަމަވެސް، އަންގާރަ ދުވަހު އެ އެސޯސިއޭޝަނުގެ އިންތިޚާބު ބޭއްވުމަށް ވަނީ ނިންމާފައެވެ. މި އިންތިޚާބުގައި މިހާރުގެ ރައީސް އަލީ ރަޝީދު އާއި ތޯހާ ސަލީމް އަދި މުހައްމަދު ޖަލާލް ވާދަކުރައްވާއިރު، ޖަލާލުގެ ނަން އަނބުރާ ނެގުމަށް އޭނާ ނިންމާފައިވާ ކަމަށް ވަނީ މައުލޫމާތު ލިބިފައެވެ.