ހުވަދޫ ސަރަޙައްދީ ދާރުލްއާސާރުން ވައްކަން ކުރި މައްސަލަ: ބައެއް ތަކެތި ހޯދައިފި، މީހަކު ހައްޔަރެއް ނުކުރޭ
6 ސެޕްޓެމްބަރު 2020 | އާދީއްތަ 06:36މައްސަލަ ރިޕޯޓުކޮށްފައިވަނީ ހޮނިހިރު ދުވަހުގެ ރޭ 09:40 ހާއިރު
ހުވަދޫ ދާރުލްއާސާރު- މިތަން ހުޅުވާފައިވަނީ 11 ސެޕްޓެންބަރު 2018 ގައި
ގދ. ތިނަދޫގައި ހުންނަ ސަގާފީ ތަރިކަ ރައްކާތެރިކުރާ ގައުމީ މަރުކަޒު "ހުވަދޫ ސަރަހައްދީ ދާރުލްއާސާރު"ން ވަގަށް ނަގާފައިވާ ބައެއް ތަކެތި ފުލުހުން ހޯދައިފިއެވެ.
ހޮނިހިރު ދުވަހުގެ ރޭ ފުލުހުން ވައްކަމުގެ މައްސަލައިގެ މައުލޫމާތު މީޑިއާތަކަށް ހިއްސާކުރި ނަމަވެސް އެކަމާއި ގުޅޭ ތަފްސީލެއް ދީފައިނުވެއެވެ. އެގޮތުން އެކަން ބަލައި ތަފްސީލް ހިއްސާކުރަމުން ފުލުހުން ބުނީ، ހޮނިހިރު ދުވަހުގެ ރޭ 09:40 ހާއިރު ދާރުލް އާސާރުން ފައިސާތަކާއި ކޮމްޕިއުޓަރު ސިސްޓަމެއް ވަގަށް ނަގާފައިވާ މައްސަލަ ރިޕޯޓުކުރެވުނު ކަމަށެވެ. މި މައްސަލައާއި ގުޅިގެން މިހާތަނަށް ފުލުހުން ކުރި މަސައްކަތުން ގެއެއް ބަލައި ފާސްކޮށް ކޮމްޕިއުޓަރ ސިސްޓަމް ޔުނިޓާއި ކީބޯޑުގެ އިތުރުން މައުސްވެސް ހޯދާފައިވާކަމަށް ވަނީ ބުނެފައެވެ.
މިހާތަނަށް މި މައްސަލައާއި ގުޅިގެން އެއްވެސް މީހެއް ހައްޔަރުކޮށްފައި ނުވާއިރު ގެއްލުނު ފައިސާގެ ތަފްސީލްތަކެއްވެސް ފުލުހުން ހާމަކޮށްފައެއް ނުވެއެވެ. މި މައްސަލަ ފުލުހުންނަށް ހުށައަޅާފައިވަނީ ސަގާފީ ތަރިކަ ރައްކާތެރިކުރާ ޤައުމީ މަރުކަޒުންނެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
