ސީއެންބީޖީ ކުންފުނިން އުފައްދަމުންދާ ވެކްސިންގެ ކްލިނިކަލް ޓްރައެލްގެ ފަހު މަރުހަލާގައި އިތުރު ގައުމުތަކުން ބައިވެރިވެއްޖެ

ޗައިނާގެ ނެޝަނަލް ބަޔޯޓެކް ގްރޫޕް (ސީއެންބީޖީ) އަދި އެ ގައުމުގެ ސިނޮވެކް ބަޔޯޓެކް ލިމިޓެޑް އިން ކޮވިޑް-19 އަށް އުފައްދާ ވެކްސިންގެ ކްލިނިކަލް ޓްރައެލްގެ ފަހު މަރުހަލާގައި އިތުރު ގައުމުތަކުން ބައިވެރިވެފައިވާ ކަމަށް އެ ދެ ކުންފުނިން ބުނެފިއެވެ.

ކޮވިޑް-19 އެންމެ ފުރަތަމަ ފެނިފައިވާ ގައުމު ކަމަށްވާ ޗައިނާ އިން އަންނަނީ މި ވައިރަހަށް ވެކްސިނެއް އުފެއްދުމަށް ބޮޑު ހަރަދެއް ކުރަމުންނެވެ.

ސީއެންޖީބީ ކުންފުނިން ނެރުނު ބަޔާނުގައި ބުނެފައިވަނީ އެ ކުންފުނިން އުފައްދާ ވެކްސިންގެ ކްލިނިކަލް ސްޓޭޖްގެ ފަހު މަރުހަލާގައި، ސާބިއާ އަދި ޕާކިސްތާނުން ބައިވެރިވާން ނިންމާފައިވާ ކަމަށެވެ. އަދި މި ދެ ގައުމުގެ އެހީ ތިން ވަނަ މަރުހަލާގެ ޓްރައިލްތަކުގައި ލިބޭނެ ކަމަށާއި، މީގެ ސަބަބުން ތިން ވަނަ މަރުހަލާގެ ޓްރައިލްތަކަށް އިތުރު ކުރިއެރުންތަކެއް ލިބޭނެ ކަމަށް ގަބޫލު ކުރާ ކަމަށެވެ.

ސީއެންޖީބީ އިން އުފައްދާ ވެކްސިންގެ ތިން ވަނަ މަރުހަލާގައި 10 ގައުމަކުން 50،000 މީހުންގެ ބައިވެރި ކުރުމަށް ވަނީ ނިންމާފައެވެ. މި ކުންފުނިން އުފައްދާ ވެކްސިންގެ ތިން ވަނަ މަރުހަލާގެ މަސައްކަތްތައް މިހާރު ފަށާފައިވާއިރު، މި ކުންފުނިން ބުނީ ތިން ވަނަ މަރުހަލާގެ މަސައްކަތް ޔުނައިޓެޑް އަރަބި އެމިރޭޓްސް (ޔޫއޭއީ) އާއި، ބަހުރެއިން، އާއި ޕެރޫ، އާއި މޮރޮކޯ، އާއި އާޖެންޓީނާގެ އިތުރުން ޖޯޑަންގައި މިހާރު ކުރިއަށްދާ ކަމަށެވެ.

ސީއެންޖީބީ ތަރުޖަމާނު ވިދާޅުވީ އެ ކުންފުނިން އުފައްދަމުންދާ ވެކްސިންގެ 500 މިލިއަން ޑޯސް ހޯދުމަށް ގައުމުތަކުން ޝައުގުވެރިކަން ފާޅު ކޮށްފައިވާ ކަމަށެވެ.

ތަރުޖަމާނު އިތުރަށް ވިދާޅުވީ ވެކްސިން ރަޖިސްޓްރީ ކުރެވުމާއެކު، 300 މިލިއަން ޑޯސް ވެކްސިން ލިބޭނެ ކަމަށާއި، އުންމީދަކީ މި އަދަދު 1 ބިލިއަން އަށް އަހަރެއްގެ ތެރޭގައި އިތުރު ކުރުން ކަމަށެވެ.

ސިނޮވެކް އިން ކޮވިޑަށް އުފައްދާ ވެކްސިންއަށް ބްރެޒިލް އަދި އިންޑޮނޭޝިއާ އިން އެޕްރޫވަލް ދީފައިވާ ކަމަށް އެ ދެ ގައުމުން ބުނާއިރު، ސިނޮވެކް އިން ބުނީ ކުރިއަށް އޮތްތާނގައި އިތުރު ދެ ގައުމަކުން ވެކްސިން އެޕްރޫވް ކުރާނެ ކަމަށެވެ.

ސިނޮވެކްގެ ޑިރެކްޓަރ ޖެނެރަލް ހެލެން ޔަންގް ވިދާޅުވީ އެ ކުންފުނިން އުފައްދާ ވެކްސިންގެ ތިންވަނަ މަރުހަލާގައި ބޮޑެތި ކުރިއެރުންތަކެއް ލިބިފައިވާ ކަމަށާއި، އުންމީދަކީ އަންނަ ނޮވެމްބަރު މަހަށް ވެކްސިން ރަޖިސްޓްރީ ކުރެވޭ ވަރު ވުން ކަމަށެވެ.