ރަޝިޔާއިން ކޮވިޑް-19ގެ ވެކްސިންގެ 200 މިލިއަން ޑޯޒް އުފައްދަނީ

ކޮވިޑް-19ށް އުފައްދާ އެކްސްޕެރިމެންޓަލް ވެކްސިންގެ 30 މިލިއަން ޑޯޒް އެ ގައުމުގައި މި އަހަރު އުފައްދަން ރާވާފައިވާ ކަމަށް ރަޝިޔާއިން ބުނެފިއެވެ.

ވެކްސިން އުފެއްދުމުގެ ގާބިލްކަންހުރި އެހެން ބަޔަކާއިއެކު އެ ގައުމުން ބޭރުގައި އިތުރު 170 މިލިއަން ޑޯޒް އުފައްދާނެ ކަމަށްވެސް އެ ގައުމުގެ ސޮވްރިން ފަންޑުން ވަނީ ހަމަކޮށްފައެވެ.

ވެކްސިނެއް އުފެއްދުމަށް ރަޝިޔާއިން ކުރަމުންދާ މަސައްކަތުގެ ތެރެއިން ފުރަތަމަ ކްލިނިކަލް ޓްރެއަލް ކާމިޔާބުކަމާއި އެކު ވަނީ ނިންމާލާފައެވެ. 38 މީހުންނާއެކު ކުރިޔަށް ގެންދިޔަ ވެކްސިން ޓްރަޔަލް ނިންމާލީ މި ހަފްތާގައެވެ. ޓްރަޔަލްތައް ނަތީޖާ ރަނގަޅު ކަމަށާއި، ބައިވެރިންގެ ދިފާއީ ނިޒާމު ރަނގަޅު ކަމަށް ރަޝިޔާއިން ވަނީ ބުނެފައެވެ.

ރަޝިޔާގެ ޑައިރެކްޓް އިންވެސްޓްމެންޓް ފަންޑު (އާރްޑީއައިއެފް) ވެރިޔާ ކްރިލް ދިމިތްރީވް ވިދާޅުވީ، ވެކްސިންގެ ދެ ވަނަ ޓްރަޔަލް އޮގަސްޓު މަހު ފަށާނެ ކަމަށެވެ. އެ ޓްރަޔަލް ގައި ހާހެއްހާ ވޮލެންޓިއަރުން ބައިވެރިވާނެއެވެ.

އޭނާ ވިދާޅުވީ، ރަޝިޔާގެ ވެކްސިން ވެގެންދާނީ އެންމެ އަވަހަށް ބޭނުންކުރާނެ ވެކްސިން ކަމަށެވެ. ކޮވިޑުގެ ބަލި މަޑުކަން ހުއްޓުމަކަށް ގެންނަން 100ށް ވުރެ ގިނަ ވެކްސިން އުފައްދާ ޓެސްޓު ކުރުމުގެ މަސައްކަތް ދަނީ ކުރަމުންނެވެ.