ފްލައިމީ އިން ފުރަތަމަ ފަހަރަށް ބައިނަލްއަގުވާމީ ދަތުރެއް ކޮށްފި

ފްލައިމީ އިން ފުރަތަމަ ފަހަރަށް ބައިނަލްއަގުވާމީ ދަތުރެއް ކޮށްފިއެވެ.

ފްލައިމީގެ ފުރަތަމަ ދަތުރު ކޮށްފައިވަނީ ލަންކާގެ ބަންޑާރަ ނައިކް އިންޓަރނޭޝަނަލް އެއަރޕޯޓަށެވެ. ހުކުރު ދުވަހު ވެލާނާ އިންޓަރނޭޝަނަލް އެއަރޕޯޓުން މި ދަތުރު ފަށާފައިވަނީ މެންދުރު 1:17 ގައެވެ. މި ދަތުރަކީ ޗާޓާ ކޮށްގެން ދިވެހިން ގޮވައިގެން ކުރި ދަތުރެކެވެ.

ފްލައިމީ އަށް އެއާ އޮޕަރޭޝަން ސެޓްފިކެޓް (އޭއޯސީ) ލިބުނީ ބުރާސްފަތި ދުވަހުއެވެ. ފްލައިމީ އިން ބުނެފައިވަނީ އެ އެއަރލައިންގެ ވިސްނުމަކީ ކުރިޔަށް އޮތްތަނުގައި އިތުރު ފްލައިޓްތައް ގެނެސް ގިނަ މަންޒިލްތަކަށް ދަތުރުތައް ފެށުން ކަމަށެވެ. އަދި ބައިނަލްއަގުވާމީ ދަތުރުތައް ކުރާނެ އަގުތައް ވަރަށް އަވަހަށް ކަނޑައެޅިގެންދާނެ ކަމަށެވެ.

ބައިނަލްއަގުވަމީ ދަތުރުތައް ކުރުމަށްޓަކައި މިދިޔަ އަހަރުން ފެށިގެން ފްލައިމީ އިން އަންނަނީ މަޝްވަރާ ކުރުމުންނެވެ. އެގޮތުން ލަންކާގެ ބޯޑަރުތައް ހުޅުވާލުމާއެކު އެ ގައުމުގެ ރަޓަމަލަނަ އެއަރޕޯޓަށް ބައިނަލްއަގުވާމީ ދަތުރުތައް ފެށުމަށް ދަނީ މިހާރު ވެސް މަޝްވަރާ ކުރަމުންނެވެ. މީގެ އިތުރުން ކުރު މުއްދަތެއްގެ ތެރޭގައި އަވަށްޓެރި އިންޑިއާ އަށް ވެސް ދަތުރުތައް ފެށުމަށް ފްލައިމީ އިން އަންނަނީ މަޝްވަރާ ކުރަމުންނެވެ.

މީގެ އިތުރުން އެ އެއަރލައިނުން ބުނެފައިވަނީ ބޭރުގެ ދަތުރުތައް ފެށުމާއެކު ހީނަރުވެފައިވާ ރާއްޖޭގެ އިގްތިސާދު ކޮޅަށް ނެގުމުގައި އެހީތެރިވެވޭނެ ކަމަށެވެ.

އޭޓީއާރުގެ އެންމެ ފަހުގެ އަދި މުޅިން އާ ބޯޓެއް ފްލައިމީ އިން މިދިޔަ އަހަރު ގެނެސްފައިވާއިރު، މީގެ ކުރިންވެސް މި މަރުކާގެ ދެބޯޓު އޮޕަރޭޓް ކޮށްފައެވެ. އެހެންނަމަވެސް އެ ކުންފުންޏަށް މާލީގޮތުން ދަތިތަކަކާއި ކުރިމަތިވެ، އޭޓީއާރު 600-72 މަރުކާގެ އެ ދެބޯޓު ވަނީ އޭރު ރާއްޖޭން ފޮނުވާލާފައެވެ. އަދި އޭގެފަހުން ފްލައިމީން ބޭނުން ކުރަމުން އަންނަނީ އޭޓީއާރު 500-72 މަރުކާގެ ދެ ބޯޓެވެ.