ރެގިއުލޭޝަންތައް ހަރުކަށި ކުރަން ޖެހެނީ ގިނަ ފަރާތްތަކުން ގަވައިދާ ހިލާފުވާތީ: ވިސާމް
މިނިސްޓްރީ އިން އުސޫލުތައް އެކުލަވާލާއިރު، ހިޔާރު ކުރަން ޖެެހެނީ މެދެ މިންގަނޑެއް
އިކޮނޮމިކް މިނިސްޓްރީގެ ރެޖިސްޓްރާ އޮފް ކޮމްޕެނީޒް، މަރިޔަމް ވިސާމް
މިނިސްޓްރީގެ ރެގިއުލޭޝަންތައް ހަރުކަށި ކުރަން ޖެހެނީ ގިނަ ފަރާތްތަކުން ގަވައިދާ ހިލާފަށް އަމަލުކުރާތީ ކަމަށް އިކޮނޮމިކް މިނިސްޓްރީގެ ރެޖިސްޓްރާ އޮފް ކޮމްޕެނީޒް، މަރިޔަމް ވިސާމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން ވިސާމް ވިދާޅުވީ، މިނިސްޓްރީ އިން އުސޫލުތައް އެކުލަވާލާއިރު، ހިޔާރު ކުރަން ޖެެހެނީ މެދެ މިންގަނޑެއް ކަމަށާއި އެހެން ނަމަވެސް ރެގިއުލޭޝަންތައް ހަރުކަށި ކުރަން ޖެހެނީ މެދު މިންގަނޑުގައި ހިފަހައްޓައިގެން ކަންކަން ކުރަން ބަލާއިރު، އާންމު ގޮތެއްގައި ގިނަ ފަރާތްތަކުން އަމަލުތައް ބެހެއްޓުމުން ކަމަށެވެ.
ވިސާމް ވިދާޅުވީ، ބިދޭސީން ރާއްޖޭގައި ވަޒީފާ އަދާކުރުމުގެ ގަވައިދު ވެސް އަމަލު ކުރަންޖެހޭ ގޮތް ތަފްސީލު ކުރުމަށް ފަހު އެކުލަވާލާ އާންމުކޮށްފައި ވަނީ ވެސް މިކަމުގެ ސަބަބުން ކަމަށެވެ. ވިޔަފާރި އަށް ބެލިނަމަވެސް މިނިސްޓްރީގެ ވިސްނުމަކީ ފުރަތަމަ ތިން މަސް ދުވަހު ގަވައިދުތައް ކަޑަތު ކުރުމަށް ފަހު އެ ޗެކްލިސްޓް ފުރިހަމަ ކުރުން ނޫން ކަމަށާއި، ބޭނުން ވަނީ ދުނިޔޭގެ އެހެން ގައުމުތަކެކޭ ވެސް އެއްފަދައިން މިކަން ކުރުން ކަމަށެވެ.
މީގެ އިތުރުން ރާއްޖޭގެ އާބާދީގެ ބޮޑުބަޔަކީ ޒުވާނުން ކަމަށާއި ޒުވާނުން ވިޔަފާރީގެ ދާއިރާއަށް ނެރުމަކީ ވަރަށް ބޮޑު އިސްކަމެއްދޭ ކަމެއް ކަމަށް ވިސާމް ވިދާޅުވިއެވެ. އަދި މިގޮތަށް ޒުވާނުން ވިޔަފާރީގެ ދާއިރާ އަށް ނެރެވޭނީ ކަންތައްތައް ވީހާވެސް ބޮޑަކަށް ސާފުކޮށްދީގެން ކަމަށް ވެސް ވިސާމް ވަނީ ފާހަގަކުރައްވާފައެވެ.
މިނިސްޓްރީ އިން ވިޔަފާރި ރަޖިސްޓްރީ ކުރުމުގެ ގާނޫނު އިސްލާހު ކޮށް ތަންފީޒުކުރަން ފެށިއިރު ވެސް މިނިސްޓްރީގެ ގަސްތަކަށްވީ ރައްޔިތުންނަށް ކަންކަން ފަސޭހަކޮށްދީ އޮޅުން އަރާފައިވާ ކަންތައްތައް ސާފުކޮށްދީ އެހެން އިދާރާތަކުން ވެސް ފުރިހަމަ ކުރަން ޖެހޭ ކަންތައްތައް މުސްތަގުބަލުގައި އެއް ފުރާޅެއްގެ ދަށުން ލިބެން ހުންނާނެ ނިޒާމެއް ގާއިމު ކުރުން ކަމަށް ވިސާމް ވިދާޅުވިއެވެ.
ވިސާމް ވަނީ ޕްރޮގްރާމްގައި މިނިސްޓްރީގެ ދުވެލި އާންމު ރައްޔިތުންގެ ދުވެއްޔާ ބައްދަލުވާހާ އެ ބާރުމިނުގައި ދިއުމަށް މަސައްކަތް ކުރާ ކަމަށާއި އެހެން ނަމަވެސް އެކަމުގައި ދަތިތަކާ ދިމާވެ، އެ ބާރުމިނުގައި އަދި ނުދެވޭކަން ގަބޫލު ކުރާ ކަމަށް ވެސް ވިދާޅުވެފައެވެ.
