އަގު އެއްކޮށްގެން ރާއްޖެއިން މަސް ބޭރު ކުރަން ފެށިއްޖެ ނަމަ، މިފްކޯ އަކީ ފައިދާވާ ކުންފުންޏަކަށް ބަދަލު ކުރެވޭނެ ކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަޙީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ދާންދޫ ދާއިރާގެ މެމްބަރު ކުރެއްވި ސުވާލަށް ޖަވާބު ދެއްވަމުން މިނިސްޓަރ ވަނީ މިފްކޯ އާއި ގުޅިފައިވާ މަސްވެރިންގެ ކަންބޮޑުވުންތައް ނުހަނު ބޮޑުކަން ފާހަގަކުރައްވާ މަސްވެރިންނަށް ފައިސާ ނުލިބޭ މައްސަލައަށް ދާއިމީ ހައްލެއް ހޯދުމަށް ސަރުކާރުގެ ފެންވަރުގައި ގިނަ މަސައްކަތްތަކެއް ކުރަމުންދާ ކަމަށް ވިދާޅުވެފައެވެ.
ޔައުގޫބްގެ ސުވާލަކީ މިފްކޯއަށް މަސްވެރިން ވިއްކާ މަހަށް ފައިސާ ނުދީ ލަސްވަނީ ކީއްވެގެންތޯ އާއި، މަސްވެރިންނަށް ގަވާއިދުން ފައިސާ ދެވޭނެ އިންތިޒާމު ހަމަޖެއްސޭނީ ކިހާ ދުވަހެއްގެ ތެރޭގައިތޯއެވެ.
މެމްބަރުގެ ސުވާލަށް ޖަވާބުދެއްވަމުން ޒަހާ ވިދާޅުވީ މިފްކޯއިން މަސްވެރިންނަށް ދޭންޖެހޭ ފައިސާ ނުދެވި ލަސްވަނީ ގިނަ މައްސަލަތަކެއް ހުރުމުން ކަމަށެވެ. ޒަހާ މި މައްސަލަތަކުގެ އަސްލު ގުޅިފައިވަނީ މިފްކޯއިން މަސް އެކްސްޕޯޓު ކުރުމަށް ހިނގާ ހަރަދާއި ނުބައްދަލު އަގެއްގައި މަސް ގަންނަމުންދާތީ ކަމަށެވެ.
އެނގިވަޑައިގަންނަވާނެ ފަދައިން މިފްކޯއިން މަސްވެރިންގެ އަތުން މަސް ގަންނަމުން ދަނީ އެކްސްޕޯޓު ބާޒާރުގައި ލިބޭ އަގަށް ބަލާއިރު ގެއްލުމުގައި. މިދިޔަ 12 މަސް ދުވަހުގެ ތެރޭގައި މަސް ގަތް އަގުތަކަށް ބަލާއިރު އަދި މަސްގަނެ އެކްޕޯޓު ކުރުމަށް ހިނގާ ހަރަދަށް ބަލާއިރު މަސް ގަންނަ އަގު އެވްރެޖްކޮށް ތިނެއް ނޫނީ ހަތަރު ރުފިޔާއާއި ދެމެދުގެ އަދަދަކަށް ގެއްލުންވޭ. އެހެންކަމުން މިފްކޯއަށް މަސްގަންނަ އަގުން ލިބޭ ގެއްލުން މިހާރު ފޫބައްދަމުން މިދަނީ އެކި ގޮތް ގޮތުން ސަރުކާރުން ލޯނުގެ ގޮތުގައި ދޫކުރާ ފައިސާ އިން ނުވަތަ މިފްކޯގެ ބެލެނިވެރި ކުންފުނިން ފޯރުކޮށްދޭ ފައިސާ އިންމިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަޙީދު
ޒަހާ ވިދާޅުވީ މަސްވެރިންނަށް ދޭންޖެހޭ ފައިސާ ނުދެވި ލަސްވުމުގައި މިފްކޯގެ އޮޕަރޭޝަނާއި އަދި ހިންގުމާއި ގުޅޭ ގިނަ މައްސަލަތަކެއް ފާހަގަވެފައިވާ ކަމަށެވެ. އެގޮތުން އެންމެ ބޮޑު މައްސަލައަކަށް ފާހަގަކުރެވެނީ ގަނޑުކުރި މަހުގެ ގޮތުގައި ގިނަ އަދަދަކަށް އެ ކުންފުނިން މަސް ބޭރުކުރަމުންދާ ދިއުން ކަމަށެވެ. ޒަހާ ވިދާޅުވީ މިފްކޯ އާއި އެފަދަ އެހެން ކުންފުނިތަކަށް ވެސް އެންމެ ފައިދާވާނީ 'ވެލިއު އެޑް' ކޮށްގެން މަހުގެ އުފެއްދުންތައް ރާއްޖެއިން އެކްސްޕޯޓު ކުރުމުން ކަމަށެވެ.
ނިމިދިޔަ 2019 ވަނަ އަހަރު ވެސް މިފްކޯ އިން 116 މިލިއަން ޑޮލަރުގެ ގެއްލުމެއް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އަށް ލިބިފައިވެއެވެ. އެގޮތުން މިފްކޯ އަށް ގެއްލުންވާ މައިގަނޑު ސަބަބަކީ މިފްކޯގެ ބިޒްނަސް މޮޑެލްގެ ސަބަބުންވާ ގެއްލުން ކަމަށާއި މަސްވެރިންގެ އަތުން މަސް ގަންނަ އަގަށް ވުރެ ދަށް އަގުގައި ރާއްޖެ އިން ބޭރަށް މަސް ވިއްކަން ޖެހުން ކަމަށް ވެސް އެސްޓީއޯ އިން ވަނީ ބުނެފައެވެ.
